Luk 22:33-70

³³Na man Fiter, “Amu, tagatlagad agu magin ge balù bnilanggù agu demen fnati.”

³⁴Na man Dyisas, “Tulenta ge, Fiter, di là fa kamleet i anuk butang ani, tmulen ge tlu dulê i laam agu dilè.”

³⁵Kafnge én, snalek Dyisas i kdeela, manan, “Di muna di kdekgu gamu i landè nebeyu filak ku demen kuyut, na landè tlas talumfà, nun kè gukulangyu?” Na manla, “Landè sa!”

³⁶Na manan, “Kabay ani tamahal, du ku nun filakyu, nebeyu, na nebeyu kuyut. Na ku landè sundang satu di gamu, fye ku fablin saulan tahà sigal fye nun bayadan dun, du ani bang i kalimayu.

³⁷Du tulengu gamu, gdohò gsulat di Tnalù Dwata gablà di deg, manan, ‘Fakufla kenen di dad to gamsalà,’ du là fakay ku là gdohò i tagsulat gablà di deg ani.”

³⁸Na man i dad gal mlalò kenen, “Amu, neyem, talwe sundangmi.” Na man Dyisas di dale, “Tong nan.”

³⁹Na mdà Dyisas salu di bulul dnagit Olib, salngad i tagnè galan nimò. Na magin kenen i dad gal mlalò kenen.

⁴⁰Kakella déén, manan dale, “Dmasal gamu, du fye là gamu gfisan di tilew.”

⁴¹Na fawag Dyisas di dale i kawag gnumah tnudà batu, na lkuad kenen du dmasal,

⁴²manan, “E Mà, ku fakay di ge nweam di deg i kaflayam fangu nagu ani. Kabay nimoam i ge knayè, ise deg.”

⁴³Na nun kasaligan mdà di langit msut di kenen du tamgal i nawan.

⁴⁴Na too sè kliduan, taman too kenen fgal dmasal. Na i tun mbaling gambet malbang tdak i litè tamdak di tanà.

⁴⁵Di ktadagan kafngen dmasal, samfulê kenen di dad gal mlalò kenen faginan gine, na teenan ale kudang, du too ale mlungay mdà di bong klidùla.

⁴⁶Na snalek ale Dyisas, manan, “Tan duenyu kudang? Mték gamu na dmasal, du fye là gamu gfisan i tilew.”

⁴⁷Di laman fa talù, nun kel dee dad to. Na i mebe dale, dunan Dyudas, satu di dad sfalò lwe gal mlalò ku Dyisas. Fdadong kenen du nalakan i baweh Dyisas.

⁴⁸Kabay man Dyisas di kenen, “Dyudas, nangkalam kè i Tingà To fagu di alak?”

⁴⁹Na i dad to magin ku Dyisas, kantola teen i fan kel, manla, “Amu, nun sa sundangmi. Mayè ge ku tnibemi ale?”

⁵⁰Na satu di dale, tniben i lifan i gumdatah dad bà di Dwata, na masfek i bali klingen gsen di kwanan.

⁵¹Kabay man Dyisas, “Tong nan!” Na nagotan klinge i lifan, na fanguléan.

⁵²Kafnge én, talù Dyisas di dad to fan kamfè kenen, dunan dad ulu i dad bà di Dwata, dad ganlal gal mantay i Bong Gumnè Dwata, na dad tua gal mebe i dad Dyu, na manan, “Kan, to tmaku agu kè, du mebe gamu sundang na bunal di kakfèyu deg?

⁵³Klit duh déén agu di safédyu di Bong Gumnè Dwata, na làyu agu kanfè. Kabay ani sa i bang faloh di gamu dmohò i knayè Satanas, i ulu magot i gukmifun.”

⁵⁴Kmanan ani, kanfèla Dyisas, na nebela kenen salu di gumnè i gumdatah i dad bà di Dwata. Na mlalò Fiter dale, bay fawag di fulé.

⁵⁵Kakella ditù mto i dad mantay i lifoh di gutngà nasel i gumnè. Na Fiter fasbool di dad to sudeng samlibut i lifoh.

⁵⁶Na nun satu libun gal dek i gumdatah i dad bà di Dwata, teenan Fiter sudeng déén du magtuyal kenen i dinè lifoh. Na toon kenen neye, na manan, “I to ani satu gal magin ku Dyisas!”

⁵⁷Kabay malew Fiter, manan, “Libun, làgu kenen dilè.”

⁵⁸Na di là mlo, lêman nun to dmilè kenen, na manan, “Ge i satu dademen!” Kabay man Fiter, “Ise deg sa.”

⁵⁹Kafnge én, nun kè satu uras i klon nun lêman satu to talù, manan, “Too sa, i to ani gal magin ku Dyisas du mdà kenen di Galili.”

⁶⁰Kabay tmimel Fiter, manan, “Làgu gadè i manam.” Na di slengan talù, kamleet i anuk.

⁶¹Na falê Dyisas meye di ku Fiter, na gafaldam Fiter i gman Dyisas, “Di là fa kamleet i anuk kadang butang ani, tatmulen ge tlu dulê laam agu dilè.”

⁶²Na taman lamwà kenen na too mngel.

⁶³Na i dad to mantay ku Dyisas, toola kenen snilo na fatduk.

⁶⁴Na snafangla i matan, na manla, “Manam sa kun, ku simto smamfak ge.”

⁶⁵Na dee fa dademe sasè manla di kafyàla kenen.

⁶⁶Na di kwalan, stifun i dad tua gal mebe i dad Dyu, mdà di dad ulu i dad bà di Dwata, na i dad tamdò i dad flalò blé Dwata fagu di ku Mosis, na nebela Dyisas di munala.

⁶⁷Na manla, “Ku ge Krayst, i Mgalék Dwata, tulenam gami.” Kabay manan di dale, “Balù ku tulengu gamu, knean là gamu faglut.

⁶⁸Na ku snalekgu gamu, làyu agu tnimel.

⁶⁹Kabay mdà ani, agu i dnagit Tingà To, déén gusudenggu di kwanan i mdatah ganlal, Dwata Too Mtulus.”

⁷⁰Na smalek kdeela, manla, “Tay, Tingà ge Dwata kè?” Na tmimel kenen, manan, “Tagmanyu sa.”