LUKA 22:33-70

³³Ila Petulo kalonga, “Mndewa, nie nitogola kugeligwa mkifungo hamoja nagwe ama kudanganhika hamoja nagwe!”

³⁴Yesu kamulongela, “Nokulongela, Petulo, kilo cha lelo nzogolo hanakwika, konibela mianza midatu kamba hunimanyile.”

³⁵Abaho, Yesu kawauza wanahina zake yolonga, “Viniwatumile kipigiti kija bila mkwiji wa hela na bila mkoba na bila vilatu viyagwe, mkala muhungukilwe na kinhu?” Wamulongela, “Hatuhungukilwe na kinhu.”

³⁶Yesu kawalongela, “Ila kipigiti kino yoyose yali na mkwiji wa hela ama mkoba, nayavisole, na munhu yalibule zele yaguze koti jake yakagule zele.

³⁷Avo, nowalongela, Nyandiko Zing'alile zolonga, ‘Kapetigwa hamoja na watenda gehile,’ Zolondigwa zivikile kumwangu, kwavija ugima wangu wokwenhuka kuisota.”

³⁸Wanahina zake walonga, “Lola, Mndewa! Hano hana mizele mibili!” Na heyo kalonga, “Yotosha.”

³⁹Yesu kasegela haja hakiwambo kachola Hakigongo cha Mizaituni na wanahina zake kamba vayatendaga.

⁴⁰Viwavikile haja hakigongo, kawalongela wanahina zake, “Tambikeni, giladi sambimwingile muna ivitega.”

⁴¹Abaho, kachola hamwande mwanza wa kwasa dibwe, kafugama mavindi, katambika,

⁴²kalonga, “Tata, kamba vihakunogela, nisegezele kikasi kino cha mgayo. Ila siyo kamba vinilonda nie, ila kamba vuulonda gweye.”

⁴³Msenga wa Mulungu wa kuulanga kamulawilila na kumgangamaza.

⁴⁴Muusungu mkulu kaiyoha kutambika, mhome yake ikala kamba madwendwe ga mulopa godwendweka hasi.

⁴⁵Viyamambukize kutambika, kema, kabweleganya ha wanahina zake, kawavika wawasile kwavija wakala na giogio.

⁴⁶Kawalongela, “Habali mweye muwasa? Lamukeni mtambike, giladi sambimwingile muna ivitega.”

⁴⁷Yesu viyakalile yang'hali yolonga, dale da wanhu divika dilongozwa na Yuda yakalile mmwanza wa wanahina zake longo dimwe na wabili. Kamkwenhukila Yesu na kumnonela.

⁴⁸Ila Yesu kamulongela, “Yuda, konihonza nie, Mwana wa Munhu, mkuninonela?”

⁴⁹Wanahina wakalile na Yesu viwagawene gaja galondile kulawila, wamuuza, “Mndewa, tuwakanhe na mizele yetu?”

⁵⁰Mwanahina imwe kadikanha gwiti da ukulume da nyakadala wa Mkulu wa Wakulu wose wa Nhambiko.

⁵¹Ila Yesu kalonga, “Lekeni.” Kadikwasa gwiti da ija imunhu na kumuhonya.

⁵²Abaho, Yesu kawalongela wakulu wa wakulu wa nhambiko na waja wemilizi wa Ing'anda ya Mulungu na wakulu wa ikitala wezile haja kumgoga, “Munizila na mizele na mimbwego kamba vija nie na m'bavi?

⁵³Nikala na mweye Kung'anda ya Mulungu mazua gose, hamunigogile. Ila kino kicho kipigiti chenu cha kutenda gano, kipigiti cha mhiko za ziza zotawala.”

⁵⁴Wamgoga Yesu, wamsola wamgala kung'anda ya Mkulu wa Wakulu wose wa Nhambiko, na Petulo kakala yowakoleleza kutalitali.

⁵⁵Ubwinhigwa moto hagatigati ya idikonhi da ing'anda, wakala hamoja wokota moto, na Petulo kakala hamoja nawo.

⁵⁶Nyakadala imwe wa kitwanzi viyamonile yakalile haja hamoto, kamulola ng'hani, kalonga, “Munhu ino vivija kakala na Yesu!”

⁵⁷Petulo kabela, kalonga, “Gweye mtwanzi, simtangile munhu hiyo!”

⁵⁸Mkipigiti kiguhi, munhu imwe kamona, kalonga, “Vivija na gweye kwa mmwanza wao!” Petulo kalonga, “Gweye munhu, siyo nie!”

⁵⁹Na kipigiti cha kamba saa dimwe, munhu iyagwe kagong'ondeza, yolonga, “Kabisa! Munhu ino kakala na Yesu kwavija heyo nayo kolawa Galilaya!”

⁶⁰Petulo kalonga, “Gweye munhu, sikitanga chuulonga.” Bahaja viyakalile hanamambukiza kulonga, nzogolo keka.

⁶¹Mndewa kahinduka kamulola Petulo, na Petulo kakumbukila kamba Mndewa kakala yamulongele kamba, “Kipigiti nzogolo hanakwika kilo ya lelo, kom'bela mianza midatu.”

⁶²Abaho, Petulo kalawa hanze, kalila ng'hani.

⁶³Wanhu wakalile womwimiliza Yesu wasonga kumtendela mzihaka na kumtoa.

⁶⁴Wamfunga na kitambala mmeso, abaho, wamuuza, “Zuza! Yalihi yakutoile?”

⁶⁵Na wamulongela vinhu viyagwe bwando va maligo.

⁶⁶Vuuchile, wavyele na wakulu wa wakulu wa nhambiko na wafundiza Malagizo ga Musa waiting'hanila hamoja, na Yesu kagaligwa haulongozi wa Ikitala Kikulu cha Isi ya Wayahudi.

⁶⁷Walonga, “Tulongele, gweye iyo Kilisto Mkombola?” Kawalongela, “Kamba nihawalongela, hamunitogola,

⁶⁸na kamba nihawauza mbuli, hamwidika.

⁶⁹Ila songela kipigiti kino, nie, Mwana wa Munhu, nokala kumkono wa ukulume wa Mulungu Mkulu.”

⁷⁰Wose walonga, “Avo gweye iyo Mwana wa Mulungu?” Kawalongela, “Mweye iwo mulonga nie iyo nene.”