San Lucas 22:33-70

³³Räjp Simón lojni: ―Dad, narä sirinalälu; mase gusäureni luj latzguiib, näjza narä siäunää́lu; mase ju'treni luj, näjza narä setnää́lu.

³⁴Dxejcti räjp Jesús loj Simón: ―Pedr, rniä lojlu, nicla gajd guidgaii cuedxa' nadxej niluxh luj alaräjplu choṉli huält, dipaclu gumbee narä.

³⁵Dxejc gunabdiidx Jesús lojreni räjpni: ―Che ganaxtu baxhaḻä la'tu, xhet bolsdi sanätu, nicla carteerdi, niclaza stee gura'chdi, ¿la yu' xhi biquiintu, xhi biäädx lojtu, ä? Dxejc räjpreni: ―Xheti.

³⁶Dxejc räjpni lojreni: ―Luxh ṉaj rniä lojtu, ni rajp bols, suchanänini; sigajcza carteer. Luxh ni di ga'p espaad, guto'ni xchamarni te siini tejni.

³⁷Sa'csi rniä lojtu, sisiojb rediidx ni caj lo requijtz Dios xcuentä, cadro caj: “Bigabnäjni rebeṉ latsiaj.” Guiraa ni caj lo reguijtz xten Dios xcuentä nanab soobpacni.

³⁸Dxejc räjpreni lojni: ―Dad, aree tio'p espaad. Dxejc räjpni lojreni: ―Sajl reni'c.

³⁹Dxejcti birii Jesús, si'cni rujnpacni, sääni nez dajn ni laa Oliib. Dxejc sanajl rexpejṉpacni.

⁴⁰Che bidzujṉreni ro'c, räjpni lojreni: ―Coḻcuejdx, coḻnab lo Dios te na'c jiajbtu lo dojḻ.

⁴¹Dxejc gubicaj Jesús lojreni, huijni te lajt zite' cadro suga'reni, si'cti cadro rdzujṉ te guij che rucuaanini. Ro'c bazuxhijbni, gurejdx-gunabni lo Dios,

⁴²räjpni: ―Xtadä, palga rlajzlu, basḻaa narä loj trabajwduxhre. Niluxh na'c gacni si'c ni rlazä narä. Bejn si'cni rlajzlu gunlu.

⁴³Dxejc biricaj te xangl Dios lojni te badeedni yäḻrutiplajzni.

⁴⁴Laḻni cadejdni trabajwduxh, cayac-huinduxh lajzni, cabedx-canabruni lo Dios. Guzunislini gusloj catejb lo yuj biniduxh si'c rejn lojni.

⁴⁵Cheni huisuni, gulujx gurejdx-gunabni lo Dios, huijni cadro suga' rexpejṉpacni. Ro'c bidxälnireni nagayejs guiraareni sa'csi cayac-huin lajzreni.

⁴⁶Dxejc räjpni lojreni: ―¿Xhicuent nagayejstu? ¡Coḻchastie! ¡Coḻnab lo Dios te na'c jiajbtu lo dojḻ!

⁴⁷Laḻ ni canii Jesús lojreni, bidzujṉ xhidajl bejṉ. Tej rexpejṉpacni ni laa Judas, nijdni nez loj rebejṉga. Dxejcti gubigni loj Jesús, te bachagro'ni loj Jesús.

⁴⁸Dxejc räjp Jesús lojni: ―Judas, ¿la con te yäḻruchagro' ruteedlu Xi'n Dios ni gujc Niguii ladzṉaa rebejṉre, ä?

⁴⁹Che bahuii reni suganäj Jesús xhini'c cayajc ro'c, gunabdiidxreni loj Jesús, räjpreni: ―Dad, ¿la sixa'tnu yejcreni con spaad, ä?

⁵⁰Sas tej rexpejṉ Jesús gudiḻnäj te mos xten ni rnibee loj rebixhojz, batiu'ni diajgni ladbee.

⁵¹Dxejc räjp Jesús lojreni: ―¡Agujc! ¡Coḻgusaanreni! Dxejc gudajn Jesús diajg mosga, basiajcnini.

⁵²Gunigajc Jesús loj reni rnibee loj rebixhojz näjza reni najc guixhajg xten guidoo näjza rebeṉgool, guiraa reni siädxiinini, räjpni: ―¿La siädnätu spaad näjza garo't, astoocanu siädxiitu te gubaan, ä?

⁵³Cheni suga'a lojtu guixe-guixee neṉ guidoo, ditu nuhuaḻ narä. Per dee najc xoṟtu, luxh arnibee yäḻnacäjy la'tu.

⁵⁴Dxejcti gunaazreni Jesús huinärenini rolijz bixhojz ni rnibee lo guiraa rebixhojz. Siädnäjl Pedrni zit-zijt.

⁵⁵Che bidzujṉreni gule'creni guiboo galäii lole' xten bixhojzga, gurejreni guideb gabi, te bidxa' lajzreni. Näj Pedr nadxaag lojreni gurej ro'c.

⁵⁶Dxejc te gunaa ni rujn dzuun ro'c, che bahuiini sobga' Pedr ro'c, rdxelojtisni lojni, räjpni: ―Näj niguiire guyunäj Jesús.

⁵⁷Dxejc basuni' Pedr räjpni: ―Nan, dina gumbeäni.

⁵⁸Che gojl stera't, che bahuii stee bejṉ lojni, räjpni lojni: ―Näj luj najclu te rexpejṉni. Per Pedr räjp lojni: ―Gurniälojlu, Dad, dina gacä xpejṉni.

⁵⁹Che gudejd si'cti teb oṟ, räjp stee bejṉ lojni: ―Guliipacni, näj bejṉre guyunäjni, sa'csi laani najczani te beṉ Galilee.

⁶⁰Dxejc räjp Pedr lojni: ―Gurniälojlu Dad, dipacna ganä xhini'c caniilu loä. Laḻni canii Pedr rediidxre, guredxa' te guidgaii,

⁶¹luxh gubiréza Jesús, bahuidzu'tzni lo Pedr, dxejc banalajz Pedr nani gunii Jesús lojni, räjpni: “Che gajd guidgaii cuedxa', abazuni'lu choṉ huält, räjplu dilu gumbee najrä.”

⁶²Dxejcti guc-huin lajz Pedr, biriini ro'c, ronduxhni.

⁶³Rebejṉ ni canäj Jesús, gusloj caguxhisnäjrenini, caguijnzarenini.

⁶⁴Dxejc basäureni lojni, gudajpreni lojni, räjpreni lojni: ―¡Gunii chuni'c gudijnlu!

⁶⁵Luxh guiraloj cayäjbreni lojni, caniyaduxhrenini.

⁶⁶Che bara yääl, bidojp rebeṉgool ni rnibee, näjza reni rnibee loj rebixhojz, näjza rebejṉ ni ruluii leii, huinäreni Jesús te suuni nez lojreni neṉ yu' cadro rujnreni yäḻguxhtis. Dxejcti räjpreni lojni:

⁶⁷―Palga luj najclu Crist, bicäjpni loonu. Dxejc badzu' Jesús diidxre lojreni, räjpni: ―Palga guicäpäni, ditu chalilajz.

⁶⁸Luxh palga gunä te yäḻgunabdiidx lojtu xcuent Crist, ditu gudzu' diidxga loä.

⁶⁹Per ṉajli sibej Xi'n Dios ni gujc Niguii xladbee Gueb Dios ni yu' xhaguibaa.

⁷⁰Dxejc gunabdiidx guiraareni lojni, räjpreni: ―Mbaj pues, ¿la luj najclu Xi'n Dios, ä? Dxejc badzu' Jesús diidxre lojreni räjpni: ―Nacäni, si'cni najtu la'tu.