Lukaj 22:33-70

³³A a potoan on i: Main, i pan idauen ir lel nan imaten o matala.

³⁴A kotin majani: Petruj, I indai on uk, nan malek jota pan kakorot ran wet, koe lao kamamki pan jilepak, me koe aja ia.

³⁵A kotin majani on irail: Ni ai kadar komail wei jo ed en moni, o jo ed en jailok, o jo jut, meakot komail lekekilar? Re ap potoan on: Jota.

³⁶I ari kotin majani on irail: A met, me a ed en moni mia, en ale o pil ed en jailok, o me jo a, i en netekila a likau, ap id netiada kodlaj pot.

³⁷Pwe I indai on komail, me intinidier, pil pan pwai on ia: A wadawad on me dipan akan, pwe me intinidier duen nai, pan kaimwijokala.

³⁸Irail indada: Main, kotin majani, iet kodlaj riapot. A kotin majani on irail. Ari, i eta.

³⁹I ari kotilan dol Oliwe, duen a kin wia; tounpadak kan idauenla i.

⁴⁰I lao lel on waja o, ap kotin majani on irail: Komail kapakap pwe komail de ko on nan jonejon.

⁴¹I ari tororela jan irail doo weita kapir won takai eu, ap kelepuki laolao.

⁴²Majani: Jam (ai), ma komui mauki, koti ki wei jan ia dal wet, ari jo, kaidin injen ai, pwe kupur omui ta en wiaui.

⁴³Nan tounlan amen pwarado jan nanlan katinada i.

⁴⁴A ni a kotin pador on mela, ap nianian a laolao, lao pudo a likamata nta, me dinedinedi on nan pwel.

⁴⁵A kotida jan a laolao o kotin pur on tounpadak kan, ir mamair aki ar mamauk.

⁴⁶Majani on irail: Da me komail mamairki? Paurida o kapakap, pwe komail de ko on nan jonejon!

⁴⁷A ni a kotin majani mepukat, kilan, pokon o, o me adaneki Iudaj, amen ir ekriamen, tion mo ’rail, kaikai don Iejuj, pwen metik i.

⁴⁸A Iejuj kotin majani on i: Iudaj, koe pan pan kila metik eu Nain aramaj?

⁴⁹Irail me ian i lao kilaner me pan wiaui, rap indai on i: Main, je jo pan wokieki ir kodlaj?

⁵⁰Amen ir pala ladun jamero lapalap amen o jara jan jalon a pali maun.

⁵¹Iejuj ap kotin japen majani: Arier! I ap kotin jair jalon a, kakelada i.

⁵²Iejuj ap kotin majani on jamero lapalap akan, o kaun pan im en kaudok, o jaumaj akan, me ko don i: Dueta lolap amen, me komail koko don, wa kodlaj o katiu kai?

⁵³Ni ran karoj nai ian komail nan im en kaudok, a komail jota man jair ia, pwe anjau wet omail anjau o manaman en rotorot.

⁵⁴Re ap jaikidi i o kalualon on nan im en jamero lapalap o, a Petruj idauenla doowei jan.

⁵⁵Irail ap jaunda kijiniai eu nan waron en kel o mod pena, a Petruj mondi nan pun arail.

⁵⁶A lidu men kilan i a momod impan kijiniai o kankakil i indada:

⁵⁷Iet et pil ian i. I ari kamam kin i indada: Li, i jaja i.

⁵⁸A mur kij amen kilan i indada: Koe pil amen irail. A Petruj indada: O kaidin nai!

⁵⁹Kadekadeo murin auer eu amen katitiki indada: Melel i men et ian i, pwe i kijan men Kaliläa.

⁶⁰A Petruj indada: O i poneponeki om kajokajoi! A pitipit ni a lokelokaia malek ap kakoroteda.

⁶¹Kaun ap kotin jaupeido majani Petruj. Petruj ap tamanda majan en Kaun, duen a kotin majani on i: Mon malek kakorot, koe pan kamam kin ia pan jilepak.

⁶²Petruj ari koieila janejan kaualap.

⁶³A ol oko, me kolekol i, lalaue o woki i.

⁶⁴Irail lao perala jilan i, ap idedok re a indada: Kopada, ij i, me pikir uk ada?

⁶⁵O jon en lalaue toto, me re ki on i.

⁶⁶A lao ran pajan jaumaj akan o jamero lapalap o jaunkawewe kan ap pokon pena o kalua i don nan arail kapun.

⁶⁷Indada: Ma koe Krijtuj, ap katiti on kit! A kotin majani on irail: Ma I pan indai on komail, komail jota pan kamelele;

⁶⁸A ma I pan idok, komail jota pan japen, o pil jota lapwa ia da.

⁶⁹Ari, jan met Nain aramaj pan mondi ni pali maun en rojon en Kot.

⁷⁰Ir karoj ap idok: Ari, japwilim en Kot koe? A a kotin majani on irail: Komail me indada, pwe nai i.