Luke 12:13-21

¹³Akngerr ingwer-rnem anenh-antey, Jesus-ew awelherrenh. Artwa anyentan angkew ikwer, “Atyetyartay! Awayaty atyenhel-then ayla akngey aylewenh iylpelerlewew. Awayaty atyenhel akngew akngey-wenh ilek-ilek ingkerrenh. Ntwa renh ilemer, ampwal-rnem arlperrtyeleyew atyengarl ingwerentyan.”

¹⁴Jesus-el tyernew, “Ayengan arla, mpwel-wenharl yanhan! Nthakenh atha iley-angenh. Mpwelarrp arlperrtyelenh-atherr!”

¹⁵Rap ingkerrew-anem angkew, “Arternp anemel awelhenherr-arey. Anketyerrerl-aney-angenh! Nthakenh arrantherr ampwal akngerrew inkwerelhey-angenh. Nthakenh ilek-ilekel arrenhantherrenh akngey-angenh Akngey-warl, arrangkw.”

¹⁶Jesus-el angkanem ilenh ikwer-rnem. “Artwa anyent anenh ampwal akngerr-akert. Ra apmer akngerrew-artey anem, rap amern akngerr lyapelhelenhan.

¹⁷Warlan amern akwerneyew-arelh ingkerrenh arrngelew. Rap nthakenh amern lyerteny-rneman akwerney-angenh, ingwer-ingwer arlkwaynteyewan. Rap ywarn-anem iterrew.

¹⁸Rarl ament iterrenh-penh, ra angkew, ‘Alakenh atha mpwarey. Atha warl akely-rnem atakey, ilkwernem-anem arteyneyew. Alakenhan mwerrarl, atha amern ingkerrenh akwerneyew ampwal-rnem-then.

¹⁹Kel ilek-ilek atha atnyeneyel-anem, ayeng ltyerreyew-anem, warrkerrey-angenh-anem. Atha inkwerelhemel amern-then arlkwaynteyew, ngkwarl-then antywaynteyew.’

²⁰Akngeyel ranap renh arew, angkew-anem ikwer, ‘Ngan apmwel-ayeth iterreyel! Rlengkan ingwel nga ilwem! Amern yanh-rnem-alew, ngkwengarl ntwa amentew akarrelenh? Rernemap ingwer-rnemewant-anem aynteman.’”

²¹Jesus-el angka ilenh-penh, rap angkew ikwer-rnem, “Alakenh-anyem irrem artwa anketyewan, ampwal mwerr-angker-rnemarl akarreleyel amentew, ingwer-rnem anthey-angenh. Ran Akngeyew iterrey-angenh. Ra iterreyel, rant ilek-ilek atnyenerl-anenty-arrpantey, Akngey-angkwarran arrangkwarl.”