Lucas 12:13-21

¹³Quia joꞌ cwii tsꞌaⁿ quiiꞌntaaⁿ nnꞌaⁿ na jndyendye, tso: —Ta, catsuꞌ nnom tiꞌxio̱o̱ na cato̱o̱ⁿꞌo̱ⁿ ꞌnaⁿ na ꞌndii tsotya̱a̱yâ, nloꞌño̱ⁿya na tseixmaⁿnaꞌ cwentaya.

¹⁴Tꞌo̱ Jesús nnom, matsoom: —ꞌU re, ja nchii cwiluiindyo̱ na cuꞌxa̱ⁿya ñꞌoom ꞌnaⁿꞌyoꞌ oo na cato̱o̱ⁿꞌa ꞌnaⁿꞌyoꞌ.

¹⁵Jnda̱ joꞌ tsoom nda̱a̱ chaꞌtsondye nnꞌaⁿ: —¿Aa jndoꞌyoꞌ? Nmeiiⁿꞌ quichꞌeenaꞌ. Queⁿndyoꞌ cwenta na tilaqueeⁿ nꞌomꞌyoꞌ ꞌnaⁿ. Ee na wandoꞌ tsꞌaⁿ nchii manaⁿnaꞌ cweꞌ na jndye ꞌnaaⁿꞌaⁿ niom.

¹⁶Quia joꞌ mati seineiiⁿ cwii ñꞌoom na cweꞌ tjañoomꞌ, tsoom: —Tyomꞌaaⁿ cwii tsaⁿtya na ya tyuaaⁿꞌaⁿ ndoꞌ jeeⁿ ya tyoweꞌ ntjoomꞌm.

¹⁷Tyotseitioom naquiiꞌ tsꞌoom, matsoom: “Chiuu chiuu nntsꞌaayo̱ ee tjaaꞌnaⁿ yuu ya nntseiwa̱ya ꞌnaⁿ na tueꞌ.”

¹⁸Seineiⁿ cheⁿnqueⁿ, tsoom: “Ntyjii chiuu nntsꞌaa, nntseityuiiꞌa nda̱ꞌ yuu na cwicañjom na cwiweꞌ ndoꞌ nntsꞌaa ntꞌomcheⁿ na ntꞌmaⁿti. Joꞌ joꞌ nntseiwa̱ chaꞌtso na tueꞌ ñequio ntꞌomcheⁿ ꞌnaⁿya.

¹⁹Ndoꞌ nntsjo̱o̱cheⁿnco̱ no̱o̱ⁿ: Jeꞌ jeꞌ yuuꞌa, jndye ꞌnaⁿya jnda̱ seiwa̱ na nleijndeiinaꞌ jndye ndyu. Jeꞌ nncwajndya̱, nlcwaaꞌa ndoꞌ nncꞌua. Nncꞌo̱o̱ⁿ na neiⁿnco tsꞌo̱o̱ⁿ.”

²⁰Sa̱a̱ tso Tyꞌo̱o̱tsꞌom nnoom: “Ntjeiⁿndyuꞌ ꞌu. Tsjom jeꞌ nncꞌioꞌ ndoꞌ chaꞌtso ꞌnaⁿꞌ na jnda̱ seiweꞌ, ¿ꞌñeeⁿ nljonaꞌ lꞌo̱?”

²¹Maluaaꞌ nntjom tsꞌaⁿ na tomti ñjom tsꞌom na matseitꞌue ꞌnaaⁿꞌ. Sa̱a̱ jo nnom Tyꞌo̱o̱tsꞌom tseixmaⁿ na jñeeⁿꞌñe.