13हे़क्क्याङ् खे़न् मनालुम्मोलाम् थिक् मनाःल्ले़ ये़सुःन् मे़त्तु, “सिक्साम्बे, आम्भुॽरे़ याङ्साकुन्धेओबा इङ्गाॽ आलक्किन् पिआर फाॽआङ् मे़त्ताङ् पिराङ्ङे़ॽओ॥”
14ये़सुरे़ खे़न् नोगप् पिरु, “लुङ्ङाए, हाःत्ले़ इङ्गाॽ खिन्छिॽ लुम्मो याङ्साकुन्धे के़हाबा के़बिबा चोगाङ् इग्र खासे़न्लोःम्बा चोगाङ्बे?”
15हे़क्क्याङ् ये़सुरे़ याम्मो खे़ङ्हाॽ मे़त्तुसि, “काक् खिःम्यक् चोःक्मोलाम् सिङ्सिङ् लॽरे़म्मे़ॽओ॥ थेआङ्भे़ल्ले़ मनाःल्ले़ कत्तुबा मुल्लुक् याङ्साकुन्धेओ खुने़ॽ से़क्खाबा कुहिङ्मन्निन् मे़वाॽने़न्लो॥”
16हे़क्क्याङ् ये़सुरे़ खे़ङ्हाॽ खे़दाॽओ मे़त्तुसि, “थिक् याङ्साकुन्धेसाबा मनाःल्ले़ यरिक् पोगुगे़न् कुजाहाॽ सुप्सुॽरो॥
17हे़क्क्याङ् खे़ल्ले़ अक्खेलॽरिक् निङ्वाॽ इःत्तु, ‘आल्ल इङ्गाॽ थे चोगुङ्बे? कन् चाहाॽ युङ्मादे़न्ने होःप्लो॥’
18हे़क्क्याङ् अक्खेलॽरिक् इःत्तु, ‘आल्ल इङ्गाॽ अक्खे चोगुङ्–उन्छोःन्बा चा युङ्दे़न्हाॽ यःसुङ्ङाङ् कुसङ् यम्बा चा युङ्दे़न्हाॽ चोगुङ्सिङ्॥ हे़क्क्याङ् काक् चाहाॽ नु आजिगःक्वाहाॽ खे़प्मो युक्खुङ्सिङ्लो॥
19हे़क्क्याङ् इङ्गाॽ आबाङे अक्खे मे़त्छिङ्ङा, तेःङ्बे, यरिक् तङ्बे थारिक् के़योबा चा नु चिगःक्वाहाॽ सुप्सुङ्सिङ्ङाङ् वाॽआरो॥ आल्ल कुसानुःरिक् युङे़ॽ, चे़ॽ, थुङे़ॽआङ् सःत्ते़ॽओ!’
20कर निङ्वाॽफुमाङ्ङिल्ले़ खे़न् मे़त्तु, ‘कुनिङ्वाॽ के़बाःक्पे, आइन् से़न्दिक्सा खे़ने़ॽ के़हिङ्मन्निन् नुप्पाङ् खे़ने़ॽ के़सिःरो॥ हे़क्केःल्ले़ खे़ने़ॽ के़लुप्सुबा याङ्साकुन्धेहाॽ हाःत्ले़न् पोःङ्बाबे?’”
21हे़क्क्याङ् ये़सुरे़ मे़त्तु, “आबाङे लागिरक् याङ्साकुन्धेहाॽ के़लुम्बाआङ् निङ्वाॽफुमाङ् ले़प्माङ् याङ्साकुन्धेसाबा मे़म्बोःङ्मनाबे़न्नाङ् बा हे़क्केए पोःङ्लो॥”