Lukas 4:14-30

¹⁴Huu no Manetualain Dula-dale Malalao-malalafu Na kuasan, boe ma Yesus fali leo propinsi Galilea neu. Ta doo bea boeꞌ te, Yesus nade Na tui-bekan rule-feo nusaꞌ ria, de lahenda ra bubuluꞌ.

¹⁵Ana nanori-nafada nai lahenda Yahudi ra uma mamaso nara katemaꞌ. Boe ma ara io Ni rae, “Yesus nana Mana kuasa!”

¹⁶Laiꞌ esa de, Yesus leo koro Nasaret na mai. Laꞌe fai lahenda Yahudi ra fai huhule-haradoin, riꞌ ‘fai Sabat’, Ana leo uma mamasoꞌ daleꞌ neu, sama leoꞌ Ria biasa na. Basa de Ana foa napadeiꞌ fo nau lees neme Manetualain Susura Makamoiꞌ na mai.

¹⁷Boe ma ara fee Ni baꞌi Yesaya dudui na. Ana buka ni, de lees nai lalaneꞌ fo mana duiꞌ nae,

¹⁸Manetualain Dula-dale Na kuasa Na nai Au. Huu ria na Ana tudu na Au, fo tui-beka Manetualain Tutui Malole Na neuꞌ lahenda manatoꞌa-manataꞌ ara. Ana nadenu Au, ela tui-beka ae, neuꞌ ko poꞌi mana hukuꞌ ara; neuꞌ ko pokeꞌ ara rita dae; neuꞌ ko poꞌi mana hapu eese-rurumuꞌ ara.

¹⁹Ma besaꞌ ia losa Ramatuaꞌ ledo-fain, fo soi-tefa lahenda Nara.”

²⁰Yesus lees basa duduiꞌ ria, boe ma lulu faliꞌ ana de loo ni leo mana tao mamasoꞌ a neu, boe ma Ana natuuꞌ. Basa lahenda fo rai uma mamasoꞌ ria daleꞌ mete rahere Ni.

²¹Boe ma Ana nafada si nae, “Hata fo bisinaꞌ a emi mamanene ni neme Susura Makamoiꞌ a mai a, besaꞌ ia dadi so!”

²²Basa lahenda fo rai na, mulai io Yesus rae, “Ae! Hata fo bisinaꞌ a Ana dedea ni a, malole na seli! Tehuu Ria nana, Yusuf anan, hete? Ubeaꞌ taon de bisa leo naꞌ?”

²³Boe ma Yesus nafada si nae, “Tantu emi basa moi taoꞌ Au meniꞌ dedeaꞌ lasiꞌ a nae, ‘Dokter! Puli-mamodo ma ao-ina heheli ma dei! Ubeaꞌ taon de O ta tao tanda heran esa fee ami nai ia boeꞌ, sama leoꞌ O tao nai kota Kapernaum a?’

²⁴Matetu na leo iaꞌ: lahenda ta nau sipoꞌ Manetualain mana nesi matan nai ria koro-tadun fa.

²⁵Hai natutuduꞌ neme Manetualain mana nesi matan, baꞌi Elia. Laiꞌ esa de uda a ta mai fa teuꞌ telu seseriꞌ. Tepoꞌ ria ina-falu dodouꞌ rai Israel. Tehuu Manetualain ta fee Elia neu tulu-fali lahenda Israel ara. Manetualain fee ni leo ina-falu esa neu, nai koro Sarfat naneneaꞌ kota Sidon. Sekonaa te inaꞌ ria, lahenda ta Yahudi fa. Tehuu ana namahere neuꞌ Manetualain kuasa Na.

²⁷Hai natutuduꞌ fekeꞌ neme Manetualain mana nesi matan Elisa mai. Tepoꞌ ria, lahenda Yahudi dodouꞌ ramahedi hedi kusta rai Israel. Tehuu Manetualain ta puli na si fa. Ana nadenu noi Elisa puli na lahenda kamahedi kusta esa, nade Naaman. Sekonaa te, ria nana lahenda Siria, ta Yahudi fa. Tehuu ana namahere neuꞌ Manetualain kuasa Na.”

²⁸Bei ramanene Yesus dedea nae leoꞌ na, boe ma basa si nasa nara lua.

²⁹Boe ma ara foa belaꞌ a, de usi heni Ni neme uma mamasoꞌ daleꞌ mai. Tutiꞌ a hela roo Ni leo koroꞌ a suu-dea neu, fo nau ruan leo pere daleꞌ neu.

³⁰Tehuu Ana kalua laꞌo nesiꞌ lahenda kadodouꞌ sira talada, de foa ela si reuꞌ na.