Lukas 17:2-33

²A mau ong, takai en ir plaua eu en paudoki ong ni tapin wor a, ap lokidokila nan madau, sang a kamakar amen tikitik pukat.

³Kalaka pein komail! Ma ri om ol wia dipi ong uk, en kapung ong i, a ma a pan kalukila, maki ong i.

⁴A ma a wia dipi ong uk pan isepak ni ran eu o pure dong uk pan isepak indada: I kalula, koe en maki ong i!

⁵A wanporon akan potoan ong Kaun o: Re kotin kalaudela at poson!

⁶A Kaun o kotin masani: Ma omail poson laudi ong wan katiring, komail pan kak indai ong tuka pik pot et: Kaisang, kasau ong nan madau, a pan oke komail.

⁷A is re omail, me a ladu men, me kin matimat o kamakamanga man akan, pan indang i ni a puredo sang matuel o: Madang kodo mondi o manga?

⁸A sota pan indang i: Kaonopada me i pan manga nin sautik o, kaiada om likau, papa ia, lao i mangaer o nim, a muri koe pan manga o nim.

⁹De a pan danke ladu pweki a wiada, me a masani ong i? I lamelam so.

¹⁰Pil dueta komail, komail, lao wiadar meakan me kakaliki ong komail er, komail ap pan inda: Kit ladu mal, pwe i eta, me se wiadar, me kakalik ong kit er.

¹¹Kadekadeo ni a kotilang Ierusalem, a kotin weid nan wein Samaria o Kaliläa.

¹²O ni a kotin kotilong ong nan kisin kanim eu, ol tuketuk ek tu ong i, me udi ong kaila wei.

¹³Irail ngil laudeda indada: Maing Iesus, kupurai kit!

¹⁴A lao kotin masanier, ap masani ong irail: Komail koieila kasansale ong pein komail ong samero kan. Kadekadeo ni arail kokola irail kelailada.

¹⁵A amen irail ni a kilanger me a kelailadar, ap puredo ngil laudeda, kapikapinga Kot.

¹⁶O poridi sang aluwilu a, danke i; ari, i men Samaria men.

¹⁷Iesus kotin sapeng masani: Kaidin me ek, me kelailadar, a ia me duemen oko?

¹⁸Sota me pure dong kapinga Kot, ol en liki men et eta?

¹⁹A masani ong i: Uda ko wei, om poson me kakel uk ada!

²⁰Parisär akai lao kalelapok re a: Dokan da me wein Kot pan pwaida? A kotin sapeng masani: Nan wein Kot sota kin sansal kokodo.

²¹Irail sota pan indada: Kilang met, de kilang monen, pwe kilang, wein Kot mi lol omail.

²²A kotin masani ong sapwilim a tounpadak kan: Ran oko pan kodo, me komail pan men kilangada ran eu en Nain aramas, a komail sota pan kak kilang.

²³Irail pan indai ong komail: Kilang monen, de kilang met! A der kola o der idauen ir ala!

²⁴Pwe duen liol kin lingaling sang apali en lang lel pali teio en lang, iduen Nain aramas ni a ran o.

²⁵A mas a pan kalokolok toto o lokidokila ren di wet.

²⁶O duen a wiaui ni muein Noa, iduen a pan wiaui ni ran oko en Nain aramas:

²⁷Irail manga, irail nim, irail papaud, irail kapapaud, lao lel ran en Noa a pedelong ong nan war im o, o nolik pwaida kamom ir ala karos.

²⁸Pil dueta ni muein Lot: Irail manga, irail nim, irail netinet, irail sapasap, irail kauadar im,

²⁹A ni ran o, me Lot koiei sang Sodom, kisiniai o swepel ap moredi sang nanlang, kame ir ala karos.

³⁰Nan iduen a pan wiaui ni ran, me Nain aramas pan sansaledo.

³¹Ni ran o meamen mi pon im, o a kapwa mi nan im, a ender kodi ong ale. O pil dueta me mimi nan sap, i ender puredo.

³²Tamatamanda en Lot a paud!

³³Pwe meamen kanakanai ong maur a, pan pupe sang, a me pan kasela, nan i me pan maureta.