LUKAS 17:2-33

²Gakže chawe' che bennen' žone' ki cha' wgaḻa' yene' to yej da' žot, na' chejžó'n kwine' ḻo nisdo', nich bi gone' ga baga' no benne' chia' doḻa'.

³Le wia binlo da' žonle. Cha' lježo' gone' le' ẕia, bzejni'ile', na' cha' yeyát ḻaže'e, benít ḻaw chie'.

⁴Ḻa'kze gaže chi'i to ža gone' le' ẕia, na' cha' gaže chi'i yide' gan zo', na' yi'e le': “Žeyát ḻaža'a” žaḻa' yenít ḻawo' chie'.

⁵Naž benne' wbás ka' che X̱anžon' góžgake' Ḻe', na' wnnágake': —Ben ga chejḻé'žeto' che Dios.

⁶X̱anžon' gože' ḻégake', na' wnné': —Chela' nak láte'ze kan žejḻe'le che Dios, na' nakzen ka to bínnedo' mostasa, gak ye'le yag ẕen ni: “Kwas ga ni, na' bejsóa ḻo nisdo'” na' gonen kan že'len.

⁷Ḻezka' wnná Jesusen': —Cha' zoa no benne' ládjwle ḻe'e, na' zoa to benne' ndo'w chie', benne' ẕga'ne' beže o ẕḻape', na' kate' yeyóž gone' x̱chin x̱ane', ¿žéklele ye' x̱ane' ḻe', na' nne': “Da, wžé' ye'j gawo'”?

⁸O'o. Ki yi'e ḻe': “Bsí'ni'a da' gawa' neda'. Wzóa kwezo' wžío' da' ye'j gawa'. Teže na' gak ye'j gawo' le'.”

⁹¿Yi'e benne' ndo'w chie' na': “Žóx̱keno'” dan' bene' kan gože' ḻe'? Žekla' neda', bi gone' ki.

¹⁰Ḻezka' gaken chele ḻe'e. Kate' ba benle yógo'te da' bchi'le Dios ḻe'e gonle, žaḻa' nnale: “Nakto' wen žin bi be záka'to', dan' bénzeto' da' žon byenen gonto'.”

¹¹Kate' ne yo'o Jesusen' nez zeje' ḻo yež Jerusalén, wdíe' gan že'gak yeždo' ka' zej nbaben gan nbab Samaria, na' gan nbab Galilea.

¹²Kate' bžine' to yeždo', bžojgak chi benne' zej de'e yižwé' leže zedjchággake' Ḻe', na' bgá'ngake' zí'to'le.

¹³Zižje bḻížgake' Ḻe', na' wnnágake': —Jesús, benne' wsedle, beyache' ḻaže'l neto'.

¹⁴Kate' bḻe'el Jesusen' ḻégake', gože' ḻégake': —Le chej, chejḻoé'el kwinle ḻawgak bx̱oz ka'. Kate' ne zjake', beyákgake' chawe'.

¹⁵Naž to benne' ládjwgake', katen' gókbe'ele' ba beyake' chawe', beyeje' gan zoa Jesusen'. Wnníe' zižje, na' bka'n ẕene' Dios.

¹⁶Byechwe', na' bzechw ḻawe' ḻo yo ḻaw Jesusen', na' gože' Ḻe': “Žóx̱keno'.” Bennen' nbabe' Samaria.

¹⁷Naž Jesusen' gože' ḻe': —¿Bi nnita' chi benne' beyákgake' chawe'? ¿Gaẕe zej nnita' yezika' benne' ka'?

¹⁸¿Bi zoa no benne' yedjká'n ẕene' Dios, san toze benne' zi'to' ni?

¹⁹Naž Jesusen' gože' bennen', na' wnné': —Beyase, na' beyéj ližo'. Ba beyako' chawe' dan' žejḻi'o chia'.

²⁰Kate' benne' yodo' fariseo ka' wnnábgekle' Jesusen' batẕe ḻa' dan' ẕnna bia' Dios, Ḻe' bechebe', na' gože' ḻégake': —Kan ḻa' dan' ẕnna bia' Dios, bi naken to da' ḻé'elelen.

²¹Bi gak no benne' nne': “Bḻan' nga” o nne': “Bžinen ga na'.” Le wia nga. Ẕnna bia' Dios ḻo yichj ḻáẕdo'gak benách ka'.

²²Naž Jesusen' gože' benne' wsedle chie' ka', na' wnné': —Žin ža kate' yénelele ḻé'elele ža yeḻá'a neda', Benne' Golje' Benách, san bi ḻé'elelen.

²³Ḻa'gak benne' yé'gake' ḻe'e: “Zoe' ga ni” o nnágake': “Zoe' ga na'.” Bi chejle ga na', na' bi gónḻenle ḻégake' tẕen.

²⁴Kan žak kate' žep yes, na' ẕza'nín' dot ya'abá, ḻezka' gaken kate' žin ža yeḻá'a neda', Benne' Golje' Benách.

²⁵Zga'ale kate' gak da' ni, žon byenen saka'a neda', na' benne' ka' nníta'gake' ža ni zoažo na'a wzóagake' neda' cheḻa'ale.

²⁶Kan gok ža na' katen' wzóa Noé, ḻezka' gaken kate' žin ža yeḻá'a neda', Benne' Golje' Benách.

²⁷Ža ni'te na' we'j bdáwgake'. Bchag ná'gake', na' bdégake' ẕí'ngake' ka' ḻo yeḻa' ẕchag na', na' zejte wyó'o Noé na' ḻo barkw ẕen na' da' nzin' arka, na' ḻa' gokte yejw da' bchinnjen yežlyó nga, na' bžia yin' yógo'tegake'.

²⁸Ḻezka' goken ža na' katen' wzóa Lot. We'j bdáwgake'. Gó'wgake', na' béte'gake'. Gózgake' yežlyó che chégake', na' béngake' yo'o che chégake'.

²⁹Kate' bžin ža na' katen' bežój Lot na' ḻo yež Sodoma, ka to nis yejw bex̱jw da' ẕzalj yi', na' bžia yin' yógo'tegake'.

³⁰Ḻezka' gaken kate' žin ža ḻa' ḻawa' neda', Benne' Golje' Benách.

³¹’Kate' žin ža na', cha' zoa to benne' yichjo'o, na' da' de chie' yo'on ḻo yo'on', bi žaḻa' yetje' nich chejx̱i'e dan' den chie'. Ḻezka' no benne' zoe' yix̱e' bi žaḻa' yeyeje' liže'.

³²Le yesá' ḻaže' kan gok che ẕo'le Lot na', bwie' x̱kóže'le', na' beyake' yej zede'.

³³No benne' že' ḻáže'ze' yeḻa' nban chie', wniten', san bennen' wsane' yeḻa' nban chie' ni'a chia' neda', gape chi'en'.