Lucas 17:2-33

²Ma no kwian daba gbanga age me no ene alin joge mliaba ble jereske ke kweri lugaba mo siroge, ene kwian e be jogekeda mi chege dare daba nu cha gerua gaba ulia me sbali gbe ta blite age me no joge siere cha geruage.

³Ba ulita mo ta gbale chage ta giti me daba na gbe age me no. ’Cha gerule ba ole, daba Chubenu age gweale me no ba dollale ba ka boadale ama ole ta no giti ama kle age giti, ama ba keruchuge mo ta blite ama gerule ba ole: “Cha me age dare me no ba dollale”, gire ama agedu me no ba talla mliadalenga.

⁴Chui gbaite ama age me no bitaguke ba dollale gire bitaguke ama mo ta blite chke gerule ba ole: “Cha me age dare me no ba dollale”, bitaguke ama agedu me no ba dollale ba talla mlienga.

⁵Jesu gerudu ene gire kwian geru jwannga Jesuge ulita gerudu Jesu ole: —Cha Chugagwalla, cha takalin ba cha ta gbe ma ngle no Chube gerua gai ulia.

⁶Jesu gerudu: —Ba mo ta gbe sidri alin Chube gerua gai ulia gire bedre bedre Chube be ba ta gbe ama gerua gai ma ngle, e salengwli mostaza chudea soli tkakle, kle tige kle joge kweri kare. Ba mo ta gbe Chube gerua gai ulia ene, gire ba ñage gerule gli kweri ole: “Chieda keda, joga toi bleske”, ba gerule ene gli ole gire gli age ba gerudu kare.

⁷Jesu gerudu dare kwian geru jwannga ole: —Ale gerule ba gweale kwian lle boanga molen, ba ama kage lle boi deage ama kle nga bate kle bda manade, bigwa chieni gudegu chke gwa gire ¿ba be gerule ama ole: “Bai toi dba aini blire cha ole”?

⁸Ba mi age ene dale, ba be gerule ama ole: “Ba bligda dodadale cha alin cha gute, ba cha ulle ngeru gire bigwa ba ñage blire.”

⁹Kaire ba mi gerule ama ole ama bligda dodadu giti: “Noare ba agedu cha alin no, ba bli jinadu no cha alin.” Ba mi gerule ene dale lle boanga ole, ba ama kagu lle boi, ama me lle bo mo ta giti ba alin.

¹⁰Ene kaire ba ulita lle boanga Chube alin, Chube ba kagu kare lle boi gire ba gerudale ai kare mau giti: “Mo ta giti cha me lle boanga Chube alin, Chube kle cha kage gire cha lle e alin boi allabi, ni mo ta giti agali cha kle mo ta gbe lle boi Chube alin.” Ba ulita tachkedale ene —Jesu gerudubi ene ulita kwian geru jwannga gdataboko giti gdaboke ole.

¹¹Jesu kle chage dare una Jerusalén ngnagu Jesu jo tangle nga kada Samariage kaire nga kada Galileage.

¹²Jesu jo chke una solige gire kwian gdataboko oga kwara tuge jingmea kada lepra ole tendu Jesu ngwange, ama ulita chegu ngaute bate Jesuge,

¹³ama ulita mo keru gbu kweri ngaute Jesuge, ama gerudu: —Jesu kwian tkanga tangle geruge, ba tai dage cha ulitage.

¹⁴Jesu gwagedu ama ulitadige gire Jesu gerudu: —Joga kwian gerunga Chube ole daba alin ngwadi, ba ulita mo oga kaite amage. Kwian oga kwara tuge jingmea ole ulita jo chage jonkare gire blike ama ulita chegu trate, jingme ulita jongwa.

¹⁵Sugedu ama ulitage ama ulita jo chkeni noni, ama ulita sugedu moge ama jegwale kle no, gire gdaitre alin allabi mo ta gbu jogeni Jesu nate gerule no Jesu ole jo chkeni giti, jonke kwian gdaite e mo keru gbu kweri gerule no Chube giti, ama gerudu: —Chube noare, Chube mo kiralla giti cha dodadu, nga suga noare chadi Chube agedu giti kweri cha alin.

¹⁶Kwian gdaite e kwian nga Samariamu, ama chiuni Jesu gitigu, ama jo chke dba jongnagwa giti Jesudi ñedu kaboge dbidi Jesu gwangeru dba gire gerudu Jesu ole: —Noare ba agedu no cha alin, ba cha dodadu, nga suga no chadi e giti.

¹⁷Jesu gerudu kwian gdaite e ole: —¿Kwian gdataboko chegu trate siere jingmege gdaitre alin chkuni aini? ¿Gdainka kle baini?

¹⁸Ba kwian nga Samariamu alin allabi chiuni naskuni gerule no no Chube ba dodadu giti,

¹⁹cha gerule ba ole, chkede gdate, jogani, ba mo ta gbu Chube gai ulia malen Chube ba dodadu ba jo chkeni noni.

²⁰Chui gbaite kwian fariseo tanre geru kadu Jesuge: —¿Ngaminegire chui be chke gire Chube be mo gbe kwian ulita Chugagwalla kweri nga dba ai giti? Jesu jaindunga: —Chube chuia be chke ni be uñale kwiange, edi che me ten che ten lledi kare.

²¹Kwian me ñage gwage aini gire gerule: “Ama kle aini”, kwian me ñage gwage eni gire gerule: “Ama kle eni.” Cha gerule ba ole, chui e chkubi, Chube kle nege ba ulitaske.

²²Jesu gerudu ene kwian fariseo ole gire Jesu gerudu kwian geru jwannga amage gdataboko giti gdaboke ole: —Cha chiu nga dba ai giti kwian kare, nege ba ulita kle chage cha ole, agwa cha mi kle ule ba ole diali nga dba ai giti. Chui be chie gire ba be takalin gwageni chadi nga dba ai giti kwian ulita Chugagwallale, agwa ba mi ñage gwage chadi chui ege, cha mi kle aini, ba cha chuia manadale dare.

²³Kwian na tanre be gerule ba ole cha giti: “Ama chkuni, ama kle aini”, na be gerule: “Ama chkuni, ama kle eni.” Kwian gerule ene ba ole ama kle sole, ba me kwian ene kerua gbe gdadi, ba me chage ama nate cha jinade nate.

²⁴Cha chieni chuiage me kwian bedre alin be gwage chadi chieni, agwa kwian ulita nga ulitage be gwage trate chadi cha be chieni chuiage salengwli kwian ulita kle gwage nga ko chrachiengadi nga ngaña giti kare.

²⁵Ngeru nga dba ai giti cha be boi tanre daga ngwale, kwian tanre kle toi chui aige me cha gai ulia, ama be mo tke cha dollale, be cha gweda.

²⁶Gire cha be chieni chuiage, e suiale kwian tanre be kle toi age salengwli kwian unsuialin kledu toi age Noé suiale kare.

²⁷Kwian ulita toidu Noé suiale me kledu Noé kerua gbe gdadi me kledu tañachuge chui be boi tirare giti. Kwian e kledu blire, kwian kledu mo jwen, kaire kwian kledu mo jian gbe ule, kwian ulita kledu tañachuge toi age diali me no alin allabi, kaire kwian ulita kledu toi nga suga no ole age me no ulita giti diali, me kledu tañachuge chui be boi tirare giti. Agwa chui boi tirare chuia chku gire Noé jo chiga du kweri tadi ule mo bitalla ulita batre ole Chube gerudu Noé ole kare, gire noi kweri chiu, noi boidu tanre, kwian kle toi ulita nga dba ai giti e suiale jokeda chi kote, agwa Noé alin allabi tiun gitiru mo bitalla mneite ole.

²⁸Kaire boidu unsuialin Lot toidu suiale una Sodomage. Chui ege kwian kledu blire, kwian kledu lle chbade, kwian kledu lle gige, kwian kledu chude skie, kwian kledu u dodade.

²⁹Kwian ulita kledu toi kledu lle e kare alin boi allabi, kaire kwian ulita kledu toi nga suga no ole ama kledu age me no giti diali, me kledu tañachuge chui be boi giti gire chui chku boidale tirare. Lot jo siere una Sodomage gire Chube jita kagu nga ngaña giti una Sodomage alin, jita chiu ule lle jribabita gwade kare ole, chku nga dba giti kwianske ulita, kwian ulita una Sodomage kugedu ulita, Lot alin tiun gitiru.

³⁰Ene kaire cha be chieni chuiage kwian tanre be kle toi age kwian unsuialin suia toi age Noé chuiage tangle kare, kwian tanre be kle toi age kwian unsuialin suia toi age Lot chuiage tangle kare, kwian ene ulita mi kle tañachuge be boi giti, be kle toi age me no tanre, gire chui ege sugeti ngwale cha be chieni, kwian ene ulita be chege boi daga ngwale tanre diali, mi ñage tien gitiru boi tirarege.

³¹Cha be chieni chuiage kwian bai kaire skate goga tangle ama me jogedaleni chiga u amanuge lle gweale amanu gwa tangle lite ole dbadale, ama lle ulita amanu chugadale ngwadi gwa ama jogedale kige blike kole. Kaire agwe kwian bai kaire skate lle boi deage me jogedaleni gudegu, ama jogedale kige blike gwangerugu me joge naskuni.

³²Tachkede Lot muirallage ama boidu mine unsuialin, ama tadu jogekalinni naskuni una Sodomage.

³³Kwian bai tañachuge mau giti alin allabi toi no nga dba ai giti mo manade no me tañachuge age Chube takalin kare, bdagli kwian ene be jogengwa sugekare Chubege be chege boi tanre daga ngwale diali chui tangle. Agwa kwian bai mo ta gbe chage cha ole mo chuge ngwadi boi daga ngwale nga dba ai giti cha gerua gdale, ama me mo tallade, ama tañachuge ma no age Chube takalin kare, bdagli kwian ene be toi no diali chui tangle nga ngaña giti cha ole cha Ñenua Chube ole.