Ruka 17:2-33

²Kurehxo eya exiry topu konõto tymyhse ahtao ipymyry pokona inerymapotohme zue aka, popyra mã exĩko eya imepỹ iirypyryme tyripose ahtao eya. Jenetupuhnanõ iirypyryme tyripose ahtao eya. Mokyro wãnohnõko Ritonõpo mana ipunaka.

³Tuaro ehtoko! —Ãkorõkõ tyyrypyry poko amaro toehse ahtao zurutoko tuaro aehtohme. Mame tyyrypyry rumekary se tahtao, “Popyra akene amaro,” karyhtao eya, ynara kahtoko eya, “Ỹ, oorypyry a wenikehnõko ase rahkene,” kahtoko eya.

⁴Morarame tyyrypyry poko ropa ehxĩpo aytory ropahtao oya xine 7me, moro ẽmepyryae ro, “Popyra ase iirypyryme amaro,” karyhtao eya ynara kahtoko rokẽ eya, “Ỹ, oty kara, Ritonõpo rokẽ ikorokãko mana. Wenikehnõko ase taroino moro poko,” kahtoko rokẽ eya, tykase Jezu eya xine.

⁵Mame ynara tykase 12mãkõ Jezu a, —Yna akorehmako yronymyrymehxo Ritonõpo enetupuhtohme yna a, tykase toto.

⁶Ynara tykase esẽkõ eya xine, —Ritonõpo omiry enetuputyryhtao oya xine pitiko rokẽ repe, onekaropohpyrykõ ekarõko Ritonõpo mana. Ynara karyhtao oya xine sero oroxi panõ a, “Otouko omity maro tuna konõto kuaka atarykata ropa,” karyhtao oya xine, õmipona xine otoũko mana, tykase Jezu eya xine.

⁷—Otara ãko typoetokã typoetory a erohkehxĩpo tooehse ropa ahtao tapyi taka? Otarãme ipoetory itupi poko toerohse. Otarãme kaneru tõ nahpary poko toerohse. Mame tapyi taka tooehse ahtao otara ãko hna typoetory a? “Otuhkose aporo!” ãko nah eya? Arypyra.

⁸Ynara ãko rokẽ eya, “Joh tyriko aporo. Tahnose ahtao enehko ya wyi maro,” ãko mana. “Eukuru enehko roropa,” ãko mana. “Tõtuhkehse jahtao otuhnõko mase. Eukuru ẽnõko, enara,” ãko mã eya.

⁹“Kure mase,” karahme sã typoetokã typoetory a.

¹⁰Morararo matose. Ritonõpo omipona emero tyrise oya xine ahtao, ynara kahtoko eya, “Opoetoryme rokẽ ase. Mõpãme rokẽ õmipona exiasene,” kahtoko. Epyrypara ehtoko kure oehtopõpyrykõ poko, tykase Jezu eya xine.

¹¹Mame Jerusarẽ pona Jezu ytoryhtao, Samaria ehpikuroko toytose ynororo, Karirea ehpikuroko, enara.

¹²Mame pata pitiko pona toeporehkase ahtao tõseporyse Jezu ipũ imotatyã maro, 10me. Amekeino rokẽ tõsenuhmase toto torukoimorykohxike.

¹³Mame Jezu tykohmase tyya xine. Ynara tykase toto, —Nupunato yna eneko myhene, tykase toto.

¹⁴Ynara tykase Jezu eya xine, —Ỹ, nupunato oenetorỹko ase. Ytotoko Ritonõpo maro oturuketomo a. Osenepotatoko eya xine, okurãkatopõpyrykõ enetupuhtohme eya xine, tykase Jezu ipũ imotatyamo a. Morarame toytorykohtao, kure toehse ropa toto, ipũ imoimotahpyry pyra.

¹⁵Mame toekurãkary ropa eneryke tyya, toirõ toeramase ropa Jezu a. —Kure Ritonõpo mana, tykase ynororo opore.

¹⁶Jezu ẽpataka typorohse ynororo nono pona, —Kure mase, tykase ynororo Jezu a, kure toehse ropa toexiryke. Samariapõ kynexine ynororo.

¹⁷Mame ynara tykase Jezu, —10me orutua kõ tukurãkase ropa. Otokoh mokaro nahe, 9mãkohmo? tykase Jezu eya.

¹⁸—Mose rokẽ, juteukara rokẽ noehno ropa, “Kure mase Ritonõpo,” kase, tykase Jezu.

¹⁹Mame ynara tykase ynororo ipũ imotahpyrỹpyry a, —Owõko. Ytoko ropa. Ritonõpo enetuputyryke oya tukurãkase ropa mase, tykase Jezu eya.

²⁰Ynara tykase parixeu tõ Jezu a, —Otãtahtao Kuesẽkõme toexiry enepõko Ritonõpo nah? tykase toto. Ynara tykase Jezu eya xine, —Kuesẽkõme Ritonõpo ehtoh osenepyra mana.

²¹Morara exiryke ynara kara imehnõ mana, “Enetoko ke moro yro,” kara mã toto. “Yrorohxo rukuh moro,” kara roropa mã toto, tuisame Ritonõpo ehtoh okurohtao xine exiryke, tykase Jezu eya xine.

²²Mame ynara tykase Jezu typoetory tomo a, —Okynã pixo Kapu ae Ayhtohpyry enery se exĩko matose yronymyryme. Yrome onenepyra matose.

²³Morarame ynara ãko imehnõ mã repe ypoko, “Moroto Kapu ae Ayhtohpyry mana,” ãko reh mã toto. “Taro mana,” ãko roropa imehnõ mana. Yrome morara karyhtao oya xine aomipona xine pyra ehtoko.

²⁴Saereh ãko mã nenenehkane, xixi tũtatoh wino xixi porohtoh pona. Moro sã mã Kapu ae Ayhtohpyry oehnõko ropa mana. Emero enẽko exino mana.

²⁵Yrome osemazuhme aporo osanume exĩko ynororo mana. Etuarimãko itamurume mana. Mame tosẽkõme ise pyra roropa exĩko seromatokõ mana.

²⁶Pakatokõ ehtopõpyry sã Noe orihpyra ahtao ro, moro sã exĩko tarõkõ mana, Kapu ae Ayhtohpyry oehsasaka ropa ahtao.

²⁷Tõtukurukõ poko rokẽ toh kynexine, eukuru enyry poko roropa. Typytarykõ poko toh kynexine, tyniotarykõ poko roropa kanawaka Noe tõ otyriry ponãmero. Morarame tuna kumary ke tyneryse toto, emero porehme.

²⁸Moro saaro kynexine Ro ehtopõpyry roropa. Tõtukurukõ poko rokẽ toh kynexine. Eukuru enyry poko roropa toh kynexine. Tõsepekatyrykõ poko, mõkomo ekamory poko roropa toh kynexine. Tupito pomory poko, tapyi amory poko roropa toh kynexine.

²⁹Morara kynexine Ro ehtopõpyry pake. Morotoino Ro toesyryhmase ahtao, apoto toepukase kapu ae sautu panõ maro moropõkõ zahkatohme emero.

³⁰Moro saaro exĩko mã seropõkomo Kapu ae Ayhtohpyry oehtoh ropa toehse ahtao, tykase Jezu.

³¹—Morara ahtao tapyi mypatarãnao awahtao xine tapyi taka omõpyra ehtoko omõkomorykõ poko. Morararo tupito po awahtao xine eramara ropa ehtoko atapyĩkõ taka omõkomorykõ poko.

³²Ro pytỹpyry ehtopõpyry poko wenikehpyra ehtoko. (Toeramary se ropa kynexine ynororo repe tunurumekahpyry pona ropa repe. Mame topume tanyhtase ynororo. Sautume roropa toehse.)

³³Morarame tõsepynanopyry poko exiketõ orihnõko mã toto. Yrome Ritonõpo omipona exiketõ ẽsemãnõko ropa mã toto.