ሉቃሴ 17:2-33

²ዖናታቴያ ሃንሢ ዻኮ'' ናኣቶ''ንሢዳፓ ፔቴ'' ዻቢሲ ጎሜ ማዺሳያይዳፓ ዎንሢ ሹቺ ባቃና'' ቱኪ'' ዋኣፆ ባዞ''ይዳ ጌሌቴ ኮሺኬ።

³ዬያሮ ዒንሢ ዒንሢና ዔሩዋቴ። ኔ ዒሻሢ ኔኤም ፑርቲሲ ዻቤቶ ዞሪ ጎሬ፤ ዒዚ ፔ ዻቢንቶ ዔሪ ‹ታ ዻቤኔ› ጌዔቶ ዓቶም ጌዔ፤

⁴ሃና''ኣ ዓቢዳ ሌሊ ላንካይ ማይንቲ ኔኤም ፑርቲሲ፥ ዻቢ፤ ሃሣ ላንካይ ማይንቲ ሙኪ ሙኪ ‹ታ ዻቢንቶ ታ ዔሬኔ› ጌዔቶ ዓቶንጎ ዒዛም ጌዔ» ጌዔኔ።

⁵ዳኪንቴዞንሢያ ዬሱሴ ኮራ፦ «ሃዳራ ኑም ጉሙርቂሢ ቃሴ''» ጌዔኔ።

⁶ጎዳ ዬሱሴ ማሃዖ፦ «ሴናፒጬ ጎዖ ባኬሎኮ ዓኣፖ ዻኮ''ማ ጉዴያ ማዓ፥ ጉሙርቂሢ ዒንሢኮ ዓኣቶ ሃያ ሻኣቦ'' ‹ሃይካፓ ቱጊንቲ ባዛ'' ኬዴ''› ዒንሢ ጌዔቶ ዒንሢም ዓይሢንታንዳኔ» ጌዔኔ።

⁷ዬካፓ ሃሣ ዬሱሴ፦ «ዒንሢኮ ፔቴ'' ጎሺ ጎሽካይ ሃሣ ጊንሣ ማራይ ሄንቃ ዓሲ ዓኣቶ ዬይ ማዻ ዓሢ ማዻ''ፓ ማዔ ዎዶ''ና ቤዞና ‹ሃኒ ሙኪ ካዎ ሙዔ› ዒዛም ጋዓ?

⁸ዬያፓ ‹ዓካሪ ታኣም ካዎ ጊኢጊሼ፥ ታ ሙዒ ዑሽካንዳኣና ታና ሙኡዛያ ማዔ፤ ዬካፓ ኔኤኒ ሙዓንዳኔ› ጋዓያቱዋዓዳ?

⁹ያዺ ማዔቶዋ ዬይ ማዻሢ ዬያ ዓሢ ባኮ ኩንሤሢሮ ዒዛኮ ጎዳሢ ዒዛ ጋላታያ ዒንሢም ማላ?

¹⁰ዒንሢያ ዬያጉዲ ዒንሢ ዓይሦና ባኮ ቢያ ኩንሤሢኮ ጊንፃ ‹ኑኡኒ ፓሡዋ ማዻ ዓሶንሢኬ፤ ኑ ኩንሤሢያ ኑኡኒ ማዻንዳጉዲ ኑም ኮይሳ ባኮንሢ ሌሊኬ› ጎዑዋቴ» ጌዔኔ።

¹¹ዬሱሴ ዬሩሳላሜ ባንሢ ዴንዳዖ ሳማሪያና ጌሊላ ዓጮ''ናኮ ሳዞ''ና ዓኣዼኔ፤

¹²ፔቴ'' ጉርዳስኬኖ ዒ ጌላዛ ዑፃ ኬስካ ዶርዓሢና ዓዺንቴ ታጶ ዓሲ ዒዛ ኮይላ'' ሙኪ ሃኬ ዔቃዖ፥

¹³ዑኡዞ ፔኤሲ'' ዼ'ጊዲ፦ «ዬሱሴ! ዔርዛሢዮ! ሃዳራ ኑም ማሌቴራ» ጌዒ ጌዒ ዒላቴኔ።

¹⁴ዬሱሴ ዔያቶ ዛጋዖ፦ «ዴንዱዋቴ! ዒንሢኮ ዑፆዋ ቄኤሶም ዻውዋቴ» ዔያቶም ጋዓዛ፥ ዔያታ ዓኣዻ ጎይሣ ዓኣንቴ ዔያቶኮ ዑፃ ኬስካ ዶርዓሢ ባይቄም ዔያታ ጌኤሽኬኔ።

¹⁵ዔያቶይዳፓ ፔቴ''ሢ ዬያ ዶርዓሢዳፓ ጌኤሽኬሢ ዛጌ ዎዶ''ና ዼ'ጊ ጌዔ ዑኡሲና ፆኦሲ ጋላቲ ጋላቲ ጊንሣ ማዔኔ።

¹⁶ዬይ ዓሢ ዬሱሴያ ጋላቲ ጋላቲ ዒዛኮ ቶኮ'' ዴማ'' ባሊቲና ሎኦሜኔ፤ ዒዚ ዬይ ዓሢ ሳማራ ዓጪ ዓሲኬ።

¹⁷ዬሱሴ፦ «ዑፃ ኬስኬ ዶርዓሢዳፓ ዻቂ፥ ጌኤሽኬ ዓሳ ታጶቱዋዓዳ? ሂዳዖ ታዞጶንሢ ዓንኮ ጌሌይ?

¹⁸ፆኦዛሢ ጋላታኒ ማዒ ሙኬሢ ሃያ ሜሌ'' ዜርፃሢዳፓ ዓታዛ ሜሌ'' ባኣዓዳ?» ጌዔኔ።

¹⁹ዬካፓ ዬሱሴ ዬያ ዓሢ ኮራ፦ «ዔቂ፥ ዴንዴ፤ ኔ ጉሙርቂፃ ኔና ዻቂሼኔ» ጌዔኔ።

²⁰ፔርሴ ዓሳ ዬሱሴ ኮራ፦ «ፆኦሲ ካኣቱማ ዓይዴ ሙካንዳይ?» ጌዒ ዖኦጫዛ፥ ዒዚ ዔያቶም፦ «ፆኦሲ ካኣቱማ ሙካንዳሢ ዓሳ ዛጊ ካፓ ጎይፆናቱዋሴ፤

²¹ዬያጉዲ ሃሣ ‹ሃይሾ ሃካኬ ሃሣ ሴኬያኬ› ጌይንታያቱዋሴ፤ ዓይጎሮ ጌዔቶ ፆኦሲ ካኣቱማ ሃሢ ዒንሢኮ ባኣካ'' ማዔሢሮኬ» ጌዒ ማሄኔ።

²²ሄሊ''ሳዖ ዬሱሴ ፔኤኮ ጊንፆ ሃንታ ናኣቶ''ም፦ «ዓሲ ናዓሢኮ ኬሎ''ይዳፓ ፔቴ''ማታዖ ‹ኑና ዓይጌ ዛጊሳንዳይ?› ዒንሢ ጋዓንዳ ኬሊ'' ሙካንዳኔ፤ ጋዓንቴ ዒንሢ ዛጋዓኬ።

²³ዓሳ ‹ሃይሾ ኪሪስቶሴ ሃካኬ! ሃሣ ሴኬያኬ!› ዒንሢም ጋዓንዳኣኬ፤ ጋዓንቴ ዔያታ ዒንሢም ጋዓ ባኮ ጉሙርቂ ዔያቶ ጊንፆ ዓኣዺፖቴ።

²⁴ዜኤሊንሢ ጫሪንቺዳ ዜኤሊንሣዖ፥ ካራ''ፓ ካሮ'' ሄላ''ንዳኣና ፖዓሢጉዲ ዓሲ ናዓሢ ሙካ ኬሎ''ናኣ ያዺ ማዓንዳኔ፤

²⁵ጋዓንቴ ዓሲ ናዓሢ ቤርታዺ ሚርጌ ሜቶ ዔካንዳሢና ሃኖ' ዎዶ'' ዓሶና ቦሂንታንዳሢ ዓቱዋያኬ።

²⁶ኖሄ ዎዶ''ና ማዔሢጉዲ፥ ዓሲ ናዓሢ ሙኮ ዎዶ''ናኣ ያዺ ማዓንዳኔ።

²⁷ኖሄ ዋኣፆ ካኣሚሎይዳ ጌላንዳያ ሄላ''ንዳኣና ዓሳ ሙዒያ ሙዒ ዑሽኪያ ዑሽኪ ዔፒያ ዔካንቴ፥ ዬኖ ዎዶ''ና ባይሲንቶ ዋኣፃ ሙኪ ቢያሢ ዔኤዺ ባይዜኔ።

²⁸ዬያጉዲ ሎኦፄ ዎዶ''ና ማዔሢጉዲያ ማዓንዳኔ፤ ዬኖ ዎዶ''ና ዓሳ ሙዒ ዑሽካንቴ፥ ሻንቺያ ሻንቺ ሓሣ ሻንቂያ ሻንቃንቴ፥ ሙዖ ሚሢያ ቱኪ'' ቱኪ'' ማኣሪያ ማዣንቴኬ።

²⁹ጋዓንቴ ሎኦፄ ሶዶሜይዳፓ ኬስኬ ኬሎ''ና ታሚና ታሚኮ ፂኢሊ''ና ጫሪንጮይዳፓ ዋርቂ ቢያሢ ሙዒ ባይዜኔ።

³⁰ዓሲኮ ናዓሢ ሙካ ዎዶ''ናኣ ያዺ ማዓንዳኔ።

³¹«ዬኖ ኬሎ''ና ማኣሮ ቶኦኮ''ይዳ ዓኣ ዓሢ፥ ማኣሮይዳ ዓኣ ሜሆ'' ዔካኒ ኬዶ''ፓ፤ ጎዦይዳ ዓኣ ዓሢ ሃንጋ ማኣሮ ባንሢ ማዖፓ።

³²ሎኦፄ ማቾ ጶቂሢ ማሉዋቴ!

³³ፔ ሼምፓሢ ዻቂሻኒ ኮዓሢ ቢያ ባይዛንዳኔ፤ ሼምፓሢ ፔኤኮ ዓኣሢ ዒንጋሢ ቢያ ዻቂሻንዳኔ።