SAN LUCAS 17:2-33

²Vàchi chicá vàha ni mácùndiacu iin yùù yódò dùcùn‑né, te ndiachi‑né mahì mar sàhà‑ñá màsà dátûcù‑nè ni‑iin ñà‑cuati yohó.

³Ñàyùcàndùá, cuidadu cundoo‑nsia sàhà ñà‑ndùá quidá‑nsiá. ’Nú quidá iin ñanìtnaha‑nsia cuàchi nùù‑nsiá, dandu càhàn‑nsià xì‑né sàhámà. Te nú ni náxícócuîìn ini‑nè sàhà ñà‑ndùá nì quida‑ne, dandu cuicahnú inì‑nsia sàhà‑né.

⁴Mate ùsà xichi iin quìvì ni quidá‑né iin cuàchi nùù‑nsiá, có‑quìdá, vachi nú cada iin iin xichi vàxi‑ne cachí‑nè ñà‑cùú‑né arrepentir, dandu icúmí‑nsiâ cuicahnú inì‑nsia sàhà‑né ―nì cachi Jesús.

⁵Dandu nècuàchì nì nìhì chuun nùù Stoho‑ndà Señor, nì xìcàn tàhvì‑né nùù‑yá, cachí‑nè: ―Chindee‑ní nsiùhù ñà‑nì sáà‑nsì cunindisá víi gá‑nsì.

⁶Dandu nì cachi‑yà xì‑né: ―Cuati lihngu tata yutnù nani nù‑mostaza. Te ñà‑yòhó cachíˋ xì‑nsiá: nú xiníndísâ ndisa‑nsia, mate (iyuhu nduá) nahi tata mà, dandu dècuèndè vàtùni dandacú‑nsiá nùù yutnù nahi yutnù fruta jaàn ñà‑nì ndánchító‑nu yohó, te cùhùn‑nu ndiachi‑nú mahì mar, dandu seguru ducán icúmí coo.

⁷’Ni cachí‑ndà iá iin peón xi‑nda, te quidachuún saín‑te nùù‑ndà. Te vihini xitú‑te, o ndiaá‑te quisì xi‑nda. Doco nú nì nsiaà‑te vehe, ¿a cáchí‑ndà xì‑té ñà‑nì cúhùn‑te cudamá‑te?

⁸Còó, dohó cuàhàn‑ndà cachi‑ndà xì‑té: “Quidayucùn‑ní ñà‑cudamíˋ, dandu nsidaviì‑ní mii‑ní, te taxi‑ní ñà‑cuxi, te cohi. Doco mii‑ní, dècuèndè después icúmí‑nî cuxi‑ní”, cachi‑ndà xì‑té.

⁹Pues, ¿a náquímánì‑ndà peón mà nú sànì quida‑tè nsidaa ñà‑ndùá nì ndacu nuù‑té? Ádi coó.

¹⁰Pues divi ducán stná xì mii‑nsiá, vàchi nú sànì nsihi nì quida‑nsia nsidaa ñà‑ndùá nì ndacu nuù‑nsiá, dandu icúmí‑nsiâ, cachi‑nsià: “Còò ni‑iñàha ni quidá‑nsí, cuisì ñà‑ndùá ndiá ìcà‑nsí nì quida‑nsi”, ―nì cachi Jesús.

¹¹Nchícùn Jesús ichì Jerusalén cuàhàn, te nì yàha‑ya ladu Galilea xì stná ladu Samaria.

¹²Te na ní sàà‑yà iin ñuu tii nì xini‑yà yucán vàxi ùxìn tiàa ndohó cuèhè lepra. Itá xica‑né,

¹³cána ndee‑né, cachí‑nè: ―¡Stoho‑nsì Jesús! ¡Cundehè ndahví‑nî nsiùhù!

¹⁴Daaní, na ní xini Jesús nècuàchìmà, nì cachi‑yà xì‑né: ―Cuahán‑nsià dacuní‑nsià dùtù ìcà‑nsiá. Ñàyùcàndùá nì caquihin‑ne ichì cuàhàn‑nè. Te meru xicá‑né ichì mà, dandu nì nduvàha nsidaa‑né.

¹⁵Te iin‑ne, na ní xini‑nè sànì nduvàha‑ne, nì naxicocuíìn‑nè, nì ndenihi vàha cuahà‑né Dios, ndee cáhàn‑nè.

¹⁶Te nì sàcuììn sìsì‑né nùù‑yá, naquímánì‑néyà. Te nduú‑né iin nècuàchì ñuu Samaria.

¹⁷Dandu nì cachi‑yà xì‑né: ―¿Amádi ùxìn tiàa nì nduvàha? Doco 9 nècuàchì dava ga mà, còò‑né ni náxícócuîìn.

¹⁸Cuisì mindaa nècuàchì tùcù yohó nì naxicocuíìn naquímánì xì Dios.

¹⁹Dandu nì cachi‑yà xì tiàa nì naxicocuíìn mà: ―Ndacuiìn‑ní xuhun‑ní vehe‑ní. Vàtùni nì xinindisa‑ní, te ñàyùcàndùá nì nìhì‑ní nì nduvàha‑ní.

²⁰Daaní, nì ndàcàtnùhù nècuàchì fariseu nùù‑yá índù tiempu sàà quìvì cusahnú Dios ñuhìví yohó. Te nì cachi‑yà xì‑né: ―Màdìá nduchìnúù‑nsiá cuni‑nsià ñuhìví ìì xí Dios.

²¹Mà cúndúámà ñà‑cachitnùhu nèhivì xì‑nsiá, cachi‑nè yohó iá ñuhìví ìì mà, te ò yucán iáˋ. Còó, vàchi yohó mahì mii‑nsiá iá ñuhìví ìì mà.

²²Dandu nì cachi‑yà xì nècuàchì dacuahá‑yá: ―Vàxi iin tiempu na yáha ga cunì‑nsia cundua tiempu ndiaha (naxicocuíìn) yùhù ana nduú Tnaha Nèhivì Ñuhìví, doco tàñáha ga sàà cundua tiempu mà.

²³Te nú cachí nèhivì xì‑nsiá ñà‑yòhó sànì naxicocuíìn, te ò yucán iéˋ, màsà cúhùn‑nsià xì‑né, màsà cúnchícùn‑nsiànè.

²⁴Vàchi na ian tása, te natnúù fuerte inicutu ansivi ndè iin ladu xì ndè inga ladu, ducán icúmí cuu stná xì yùhù na sáà quìvì xí, (te cundehè nsidaa nèhivì yùhù).

²⁵Doco antes, cuàhà iñàha icúmî ndohi; vàchi icúmí nèhivì tiempu vichi cahíchì ini‑nè yùhù.

²⁶Te nacua nì cuu tiempu xi Noé sànaha, ducán icúmí cuu stná na sáà meru quìvì xí yùhù ana nduú Tnaha Nèhivì Ñuhìví.

²⁷Vàchi tiempu xi Noé mà nìsa (ndoo cuéyàà nèhivì ñuhìví), xixí‑né, xihí‑né, te nándàhà‑né. Te ducán nìsa quida‑ne dècuèndè nì sàà quìvì nì quìhvi Noé barcu cahnú, dandu nì quixi dàvì nì sahnì xì nsidaa nèhivì mà.

²⁸Daaní, ducaní stná nèhivì ñuu Sodoma tiempu xi Lot sànaha, xixí‑né, xihí‑né, xiín‑né, te dicó‑né; xitú stná‑nè, te quidávàha stná‑nè vehe;

²⁹doco divi quìvì nì quee Lot ñuu mà, dandu ndè ansivi nì còyo ñuhu xì tàtnà cuaán sahán quini, te nì caxihì nsidaa nèhivì ñuu mà.

³⁰Ducán icúmí cuu stná na quívì naxicocuíìn, te cuni nèhivì yùhù.

³¹’Quìvì mà, nú ndoó nèhivì dìnìvèhé‑né (quetátú‑nè), te ini vehe ñuhú ñà‑ìcúmí‑nê, dandu màsà ndúlócô‑nè sàhámà. Cuisì‑nì nì cùnú dèhé‑nè chicá vàha. Te ò nú ndoó‑né nùù ìtú, dandu màsà náxícócuîìn‑nè vehe‑ne.

³²Màsà nándòdó‑nsiá nansa nì cuu xi ñahàdìhí Lot.

³³Nsidaa ana cuní dacácu xi vida‑xi, cutu‑ñá dandáñúhú‑nêàmà quea; doco nsidaa ana có‑dàcácu xi vida xi, divi cunduu nècuàchì càcu.