LUKU 17:2-33

²Eégↄ̃ sã̀ↄ adeenɛ wà wísilↄgbɛ gbɛ̃̀ntɛ̃ dↄ a waalɛ wà à zu sɛ̀bɛ guu dɛ à tó nɛ́ kɛ̀kiinↄ doke fula.

³Àgↄ̃ kú kↄ̃n làakario. Tó n gbɛ̃ndoo durun kɛ̀, ǹ gá ǹ à le. Tó à a nↄ̀sɛ lìɛ, ǹ kɛ̃nɛ.

⁴Tó à durun kɛ̀nnɛ gurↄ do gɛ̃̀n swɛɛplaa, ben à ɛ̀ara à bènnɛ gɛ̃̀n swɛɛplaa a nↄ̀sɛ lìɛ, ǹ kɛ̃nɛ.

⁵Dii zĩ̀rinↄ bènɛ: Ǹ wa ludanaanɛkɛna kaarawe.

⁶Dii bè: Tó á Luda náanɛ vĩ féte lán ɛfↄ wɛ́ɛ bà, é o síi lí kɛ̀kiinɛ à a zĩnda wo à gá pɛ́ sɛ̀bɛ guu, eé a yã ma.

⁷Tó a gbɛ̃kee zↄ̀ vĩ èe sɛ̃̀ waa ke èe sãanↄ dãa, tó à sù buraao, à dii é benɛ à mↄ́ à pↄ́ ble gↄ̃ↄn yↄ́?

⁸Auo, eé benɛ à pↄ́blee kɛare, à a uta liɛ à mↄ́are pↄ́bleeo kↄ̃n íminao, àpi é gbasa à pↄ́ ble à í mi.

⁹Wè zↄ̀ sáabu kpá kɛ̀ à yã kɛ̀ wà dànɛ kɛ̀ yãnzin yↄ́?

¹⁰Lɛmɛ apinↄ sↄ̃, tó a yã kɛ̀ Ludaa dàaree kɛ̀ píngi, à be: Zↄ̀nↄn wa ũ, wa zĩin wá kɛ̀.

¹¹Kɛ̀ Yesu e gaa Yerusalɛmu, èe ligaa Samaria bùsu lɛ́zɛkiizi kↄ̃n Galilio.

¹²Kɛ̀ èe gɛ̃ɛ lakutu ken, ben gↄ̃gbɛ̃ kusu gↄ̃ↄn kurinↄ dààlɛ. Aↄ̃ↄ zɛ kãaa,

¹³aↄ̃ lɛ́ zùzi wà bè: Dii Yesu, ǹ wa wɛ̃nda gwa.

¹⁴Kɛ̀ à ń é, ben à bèńnɛ: À gá à a zĩnda ↄdↄa sa'orinↄnɛ. Kɛ̀ aↄ̃ↄe gaa, ben aↄ̃ kɛ̃̀kↄ̃a.

¹⁵Kɛ̀ aↄ̃ gbɛ̃ doo è a kɛ̃kↄ̃a, ben à lìara à sù, èe Luda sáabu kpaa kↄ̃n kòto gbãaao.

¹⁶À dàɛ a puua Yesu aɛ à ì kpàa. Gbɛ̃ pì nɛ́ Samaria gbɛ̃mɛ.

¹⁷Ben Yesu bè: Gↄ̃ↄn kurinↄ bé wà kɛ̃̀kↄ̃aroo? Gↄ̃ↄn kɛ̃ndoonↄↄ kú mámɛ?

¹⁸Aↄ̃ gbɛ̃kee e liara à mↄ̀ Luda sáabu kpáro, sé gbɛ̃ zĩ̀tↄ kɛ̀ↄ́?

¹⁹Ben Yesu bènɛ: Ǹ fɛɛ ǹ tá, ma náanɛ kɛ̀ ń kɛ̀ bé à n kɛ̃kↄ̃a.

²⁰Farisinↄ Yesu là kpata kɛ̀ bↄ̀ Luda kiia bↄna gupuraaazi, ben à wèńla à bè: Kpata kɛ̀ bↄ̀ Luda kiia è bↄ gupuraaa wà e kↄ̃n wɛ́ɛoro.

²¹Weé be à kú kɛ̀ ke à kú kãaro. Kpata kɛ̀ bↄ̀ Luda kiia pì kú a tɛ́ kɛ̀mɛ.

²²Ben à bè a ìbanↄnɛ: À gurↄↄ e mↄↄ kɛ̀ é Gbɛ̃ntee Nɛ́ sugurↄↄ pìnↄ doke ena ni dɛ, é ero.

²³Weé beare à kú kãa ke à kú kɛ̀, mↄde àton gáro, àton tɛ́ńziro.

²⁴Lán loupina è guu pu ludambɛ lɛ́ gura kɛ̀ kↄ̃n à lɛ́ kãao nà, lɛn eégↄ̃ dɛ lɛ Gbɛ̃ntee Nɛ́ sugurↄↄa.

²⁵Séto à wɛ́ɛtãmma è maamaa gĩa, tↄ̃ↄrigbɛ̃nↄ é gízi.

²⁶Lán à dɛ nà Nuu gurↄ, lɛn eégↄ̃ dɛ lɛ se Gbɛ̃ntee Nɛ́ sugurↄ.

²⁷Gbɛ̃nↄↄ e pↄ́ blee wèe í mii, wèe nↄↄ sɛɛ wèe zã kɛɛ ai Nuu gàa à gɛ̃̀ góro'itɛ guu, ben í dà andunala, wà gàga píngi.

²⁸Lɛmɛ dↄ Lutu gurↄ, wèe pↄ́ blee wèe í mii, wèe pↄ́ luu wèe pↄ́ yaa, wèe pↄ́ tↄ̃ↄ wèe kpɛ́ boboo.

²⁹Gurↄↄ kɛ̀ Lutu bↄ̀ Sↄdↄmu, tɛ́ kↄ̃n ↄfãntɛ̃gbↄ̃o kwɛ̀ bↄna ludambɛ, ben wà gàga píngi.

³⁰Lɛn eégↄ̃ dɛ lɛ gurↄↄ kɛ̀ Gbɛ̃ntee Nɛ́ é bↄ gupuraaa.

³¹Gurↄ beeea gbɛ̃ kɛ̀ kú a kpɛ́ musu tón pita à gɛ̃ kpɛ́ guu à pↄ́nↄ sɛ́ɛ à bↄoro. Lɛmɛ dↄ gbɛ̃ kɛ̀ kpɛ́ buraa tón liara à pↄ́ sɛ́ bɛro.

³²À tó Lutu naↄ̃ yã dↄagu.

³³Gbɛ̃ kɛ̀ yezi àgↄ̃ a wɛ̃̀ndi kũna é korazi. Gbɛ̃ kɛ̀ gì a wɛ̃̀ndizi sↄ̃, adee égↄ̃ wɛ̃̀ndi vĩ.