Lukas 13:14-31

¹⁴Di ka igbuyag to sikan no anaranan to mgo og-ampu atag, nabolu su nigbawian ni Hisus ka boi to Allow ran to Oghimoloy. Kagi to igbuyag to anaranan dut mgo otow to, “Duon hon-om no allow no litos no ogpakatalabau ki, no hondini kow to sikan no mgo allow oyow ogkabawian kow. Di kono ogkaayun kuntoon no Allow ta to Oghimoloy.”

¹⁵Nigtabak si Hisus to igbuyag to anaranan to mgo Hudiu. Kagi rin, “Ogpatuutuu ro ka pogtuu now! Hontow pad no otow dii ka kono din oghokaron ka lubid to baka rin woy ko kuddo din no ogtuyukon din dio to woig oyow ogpoinumon din to Allow ta to Oghimoloy?

¹⁶Nò, ka soini no boi no songo Hudiu dod no pinanganak dod ni Abraham, sampulu woy wawalu on no tuid ka pogkabaybayari rin to soin no dalu no nigligkat ki Satanas. Og-insa a ko kono no goinawa now to ogkabawian sikandin to igkabaybayari rin kuntoon, agad to Allow ta to Oghimoloy?” kagi ni Hisus.

¹⁷Pogkagi ni Hisus to sikan, nasipod on ka mgo usig din to nig-atu kandin di ka duma no mgo otow, narago to tibo no mgo hinimuan ni Hisus no maroyow lagboy.

¹⁸Songo allow duon inso ni Hisus to, “Nokoy ka maroyow no igpananglitan ta to Pogsugu to Magboboot woy ko nokoy ka ogpounawaan ta?

¹⁹Ka Pogsugu to Magboboot, ian ogkounawaan ka sika malintok ian no boni to mustasa no dio ipamula to songo otow to kamot din. To nigtulin on, nohimu on no matikang no pinamula no duon on sugpang no nigsasalagan on to mgo manukmanuk.”

²⁰Kagi ni Hisus, “Nokoy pad ka duma no igpananglitan ku no ogpounawaan to Pogsugu to Magboboot?

²¹Ian ogkounawaan ka igpatulin to paan no in-amut to boi to dakol no harina. Pogkaponga rin, ogtulin ka tibo.”

²²Nighipanow on si Hisus no nighondio to mgo lunsud woy mgo hilit duon to ogkabayaan din no oghondio to Hirusalim no nigpanganad din ka mgo otow dio.

²³Duon songo otow no nig-inso ki Hisus to, “Buyag, og-inso a koykow ko manalingboka ro ka ogkapangabangan to salo dan?” No nigkagi si Hisus kandin to,

²⁴“Dio to Pandatuan to Magboboot, duon no ogko-unawa no malig-ot so gumawan. Poomoti now to ogsolod to sikan no malig-ot no gumawan. Nò, ogpoko-uma ka allow no oglokoban to Magboboot ka gumawan. Mohon-ing ka ogsolod porom di kono ogpakatood. Sikaniu no dio kow rod to libuwasan ogbunsud kow to ogtoktok to lokob no ogkagi kow to, ‘Buyag, pulasi koy ro,’ no ogtabak din to, ‘Waro a mogtokod kaniu.’

²⁶Di nasi ogkagi kow pad to, ‘Mokinaan to nig-amut koy man to nigkoonan woy songo nig-inum koy dio to longod nu to nigkoon kid woy nig-anad kad dio to kanami no lunsud.’

²⁷Di ogtabakon kow pad oghutuka to, ‘Ognangonan ku sikaniu to waro a mogtokod kaniu. Kaniu no mgo makasasalo, awo kow on kai to koddi.’

²⁸Nigparagas nigkagi to, ‘Ko ogkatuman on ka allow to Pandatuan to Magboboot, ogkitoon now si Abraham, si Isaak, si Hakub lagkos to tibo to dongan no mgo talagnangon to kagi to Magboboot woy tibo kandan dio ogpokougpo. Di sikaniu atag, dio kow ro ogpokougpo to libuwasan.’ ”

²⁹Nigparagas si Hisus to kagi rin to, “Duon mgo otow uromo no ogpokog-amut ko ogkoon dio to Pandatuan to Magboboot. Kandan, dio ogpuun to mgo mariu no mgo ugpaanan to mgo otow no konon Hudiu no dio to longod to ogsilaan to allow, woy ka dio to balabagan woy ka dio to ogsalopan to allow woy ka dio to habagatan.

³⁰Pamminog kow,” kagi ni Hisus, “Duon mgo otow kuntoon no nahan ta no ogpokohun-a kandan porom ogpasakup to Pogsugu to Magboboot, dokad di kandan ka ogkamohuri no ogpasakup. Duon dod mgo otow no nahan ta no mohuri on ogpasakup to Pogsugu to Magboboot, dokad di mohon-ing sikandan ka oghun-a ogpasakup to Pogsugu to Magboboot.”

³¹Wa do malugoy no duon mgo Parisiu no nokouma dio ki Hisus. Kagi ran kandin to, “Awo kad on to soini no ugpaan su goinawa kun ni Gobirnador Hirodis to oyow oghimatayan ka.”