Lukaj 4:25-40

²⁵A melel I indai on komail, li odi toto mi nan Ijrael ni muein Eliaj, ni anjau nanlan matata par jilu o jaunipon wonu, ni lek lapalap kipadi jap karoj;

²⁶A jota amen, me Eliaj pakadar won, pwe ren li odi men nan Jarepta nan jap Jidon.

²⁷O me tuketuk kan me toto nan Ijrael ni muein jaukop Eliaj, a jota amen re ’rail, me kelailadar, pwe Naeman eta men Jirien.

²⁸Karoj, me mi nan jinakoke ni ar ronadar mepukat, ap makar kida kaualap,

²⁹Re udar jikonlar i jan kanim o, o kalualan i pon kailan dol o, waja ar kanim kakaudar ia, pwen kajedi jan ia,

³⁰A i kotin weid nan pun ar, kotila jan irail.

³¹I ari kotilan Kapernaum kanim en Kaliläa, o kotin kawewe on irail ni ran en japat akan.

³²Irail ari puriamuiki a padak, pwe a majan me manaman.

³³A aramaj amen mi nan jinakoke, me nen en tewil jaut amen ti po a, me weriwer laud,

³⁴Inda: Ko jan kit, menda re omui kit Iejuj en Najaret! Kom kotido, en kawe kit ala. I aja, me komui nain Kot jaraui.

³⁵Iejuj ap kidaue i majani: Nenenla o ko jan re a. Tewil lao kajedi i nan pun arail, ap koiei jan re a, jota me jued kot a wiai on i.

³⁶Irail karoj ap puriamui kila, kajokajoi nan pun arail indada: Dakot majan pot et? Pwe a majan manaman o rojon on nen jaut akan, irail ap kin ko wei jan.

³⁷I ari indand jili nin jap karoj waja o.

³⁸I ap kotida jan nan jinakoke, ap kotilon on nan im en Jimon. A jaulap en Jimon me jomau karakar. Irail ari poekipoeki i re a.

³⁹I ari koti don i majani on jomau o, ap madan ko jan, i ari madan paurida papa irail.

⁴⁰Katipin lao kirilar, rap wa don i ar luet akan karoj. I ari kotikidan amen amen lim a kan, kakelail ir ada.