Luka 4:25-40

²⁵Ma jasôm teŋ tobiŋŋanôgeŋ êwiŋ gebe Gêdêŋ têm Elia gêmoa naŋ, undambê ŋajaŋa gêc e jala têlêac ma ajôŋ 6 ma tôbôm kapôêŋ gêjam gamêŋ samucgeŋ auc naŋ, awêtuc taêsam sêmoa Israel.

²⁶Mago Anôtô kêsakiŋ Elia gêdêŋ êsêacnêŋ teŋ gêja atom, kêsakiŋ eŋ gêdêŋ awêtuc, taŋ gêŋgôŋ Sarepta Sidonŋa naŋ, taugeŋ gêja.

²⁷Ma gêdêŋ taŋ propete Elisa gêmoa naŋ, kamocbôm gwalêkiŋ sêmoa Israel. Mago êsêacnêŋ teŋ kêtu selec atom, ŋac Suriaŋa Naeman taugeŋ.”

²⁸Lau samob, taŋ sêŋgôŋ lôm ma sêŋô biŋ tau naŋ, têntac kêbôli auc ŋanô.

²⁹Tec dêdi ma têtiŋ eŋ kêsa malacmagê gêja. Malac tau sêkwê gêc lôc. Tec sêwê eŋ jasêô lasê sêlic tau gebe têtiŋ eŋ piŋpaŋ êsêp êna.

³⁰Mago eŋ gêsiŋ êsêac popoc kêsa ŋaluŋgeŋ gêc gêja.

³¹Jesu kêsêp malac Galilaiaŋa Kapanaum gêja ma kêdôŋ êsêac gêdêŋ sabat

³²e êsêac têtakê kêtu ênê mêtêŋa, gebe kêsôm biŋ toŋaclaigeŋ.

³³Ma ŋamalac teŋ toŋalau ŋatêmui gêŋgôŋ lôm, naŋ gêmôêc awa kapôêŋ gebe

³⁴“Op, Jesu Nasaretŋa, aêacnêŋ asageŋ ŋagêdô gêdêŋ tauŋ. Aôm gômôêŋ gebe onseŋ aêac su me. Aê kajala aômgac. Anôtônê ŋac dabuŋ aômgoc.”

³⁵Tec Jesu gec biŋ eŋ gebe “Awammê êsa ma ôsa aŋga ênê ôna.” Ma ŋalau sec kêmônaŋ ŋac tau gêmoa e gêu tau kêsêp êsêac ŋaluŋgeŋ jagêc, go kêsa aŋga ŋamalacnê gêja, mago gêgôm eŋ ôli kêtu sec atom.

³⁶Tec êsêac samob têtakê e sêsôm gêdêŋ tauŋ gebe “Biŋ tonec amboac ondoc. Eŋ kêjatu ŋalau ŋatêmui toŋaclaigeŋ amboac ŋatau ma sêc sêsa sêja.”

³⁷Ma ênê wae kêsa kêtôm gamêŋ tonaŋ ŋa-malac samobgeŋ gêja.

³⁸Jesu gêdi aŋga lôm kêsa jakêsô Simonnê andu. Ma Simon tau lawao gêmac ôli ŋawajaô kapôêŋ tec gêc, naŋ êsêac teteŋ eŋ kêtu awê tauŋa.

³⁹Tec Jesu kêtu gasuc gêja e gêôc gadê eŋ, go gec biŋ ŋawajaô ma gêwi eŋ siŋ e gacgeŋ gêdi sa mêŋgêjam sakiŋ êsêac.

⁴⁰Oc jakêsêp acgom, go lau samob, taŋ nêŋ lau gêmac ŋagêdô tokaiŋ-tokaiŋ sêc naŋ, sejoŋ êsêac dêdêŋ Jesu sêja. Ma gêu lêma gêsac êsêac gêdêŋ-gêdêŋgeŋ ma gêgôm êsêac ôliŋ ŋajam kêsa.