Lukas 4:25-40

²⁵A melel I indai ong komail, li odi toto mi nan Israel ni muein Elias, ni ansau nanlang matata par silu o saunipong wonu, ni lek lapalap kipadi sap karos;

²⁶A sota amen, me Elias pakadar wong, pwe ren li odi men nan Sarepta nan sap Sidon.

²⁷O me tuketuk kan me toto nan Israel ni muein saukop Elias, a sota amen re ’rail, me kelailadar, pwe Naeman eta men Sirien.

²⁸Karos, me mi nan sinakoke ni ar rongadar mepukat, ap makar kida kaualap,

²⁹Re udar sikonlar i sang kanim o, o kalualang i pon kailan dol o, wasa ar kanim kakaudar ia, pwen kasedi sang ia,

³⁰A i kotin weid nan pung ar, kotila sang irail.

³¹I ari kotilang Kapernaum kanim en Kaliläa, o kotin kawewe ong irail ni ran en sapat akan.

³²Irail ari puriamuiki a padak, pwe a masan me manaman.

³³A aramas amen mi nan sinakoke, me ngen en tewil saut amen ti po a, me weriwer laud,

³⁴Inda: Ko sang kit, menda re omui kit Iesus en Nasaret! Kom kotido, en kawe kit ala. I asa, me komui nain Kot saraui.

³⁵Iesus ap kidaue i masani: Nenenla o ko sang re a. Tewil lao kasedi i nan pung arail, ap koiei sang re a, sota me sued kot a wiai ong i.

³⁶Irail karos ap puriamui kila, kasokasoi nan pung arail indada: Dakot masan pot et? Pwe a masan manaman o roson ong ngen saut akan, irail ap kin ko wei sang.

³⁷I ari indand sili nin sap karos wasa o.

³⁸I ap kotida sang nan sinakoke, ap kotilong ong nan im en Simon. A saulap en Simon me somau karakar. Irail ari poekipoeki i re a.

³⁹I ari koti dong i masani ong somau o, ap madang ko sang, i ari madang paurida papa irail.

⁴⁰Katipin lao kirilar, rap wa dong i ar luet akan karos. I ari kotikidang amen amen lim a kan, kakelail ir ada.