Luk 4:25-40

²⁵Eno dagebolo mu tama obe dao, Godigo po pusa mabo bidi Elaija bidali sogo, kibu be sela olama, me kibu be tomode togolama, tulubage munu me tulai menio. Tigidali pesagede nasi ela pai dao. Te sogo Israel hani wilawe we hauwa mu bidai dao.

²⁶Tiali goli, Godigo Elaija te Israel hani wilawe we me tau somainu teba pao wai menio. Tiali goli, te Israel hani isąwai bage Saidon tǫde, Sarefat be nani we wilawe deli bidibo madi naga tau sigi pao wai dao, Godigo.

²⁷Me Godigo po pusa mabo bidi Elaisa bidali sogo, Israel bage oiyabe bidi hauwa bidai dao. Tiali goli, augwali me deli ma geselai menio. Me ma, te Israel hani isąwai oiyabe bidi me deli bidai, te Siria tǫde. Agai nogi Naman. Te oiyabe bidi deli digi Elaisago ma geselai dao,” Jisasgo te po wali.

²⁸Te Juda dabego bomo yai po ola mabo bede bidali bagego te po odoyu, moni sębę yali.

²⁹Augwali hodaluama, Jisas nogo tuluama, aga te be nanidu kegasa pelama, buluba sąyani. Te be nani dude sę yai dao. Tama augwaligo te sau mabo dageba Jisas odasa pali, te sauba sąwai hagede.

³⁰Tiali goli, Jisas aga te bidi hauwa tomo agebeledu dią sesa palima, aga polo palio.

³¹Te bidi Jisas Galili bulude be nani me nogi Kaperneamba dulali. Tama te Sabatde we bidi Godigo po ola maduali, te Juda dabego bomo yai po ola mabo be tomode.

³²Tama agai po bomo yai mu wabo odama, te we bidi noma sali.

³³Te be tomode bidi me dwai haubo dagawai bidi bididuali. Agai moni hai olama, te po wali, “Tega Jisas, nage Nasaret bidi da.

³⁴Nage dabolo magi sę yainu asaliwe? Nage da dolainu asaliwe namao. Eno nage koneani. Nage Godigo gasagi yai tedali wiegi yai bidi da,” wali.

³⁵Tama Jisasgo agai po tomode togwa sąyu, te po wali, “Nage sagiasa peyu, te bidi taga soao,” wali. Tama te dwai haubogo te bidi augwali tomode te tǫba sąyani. Tama te dwai mobogo taga pelama, te bidigo tigi me dolobe.

³⁶Tibaso, tigidali we bidi midigi yali. Augwa hasi ugwa tono, eda tono eyu, te po wali, “E ma, magi po wagawe? Dwai haubobolo bomo elalubo bidigo wabo po gagawai wabo yabao. Te po odama, wabo po selama, te dwai haubogo te bidi taga pobao,” te po wali.

³⁷Jisasgo tama tiali po te bulu tigidali bila similali.

³⁸Te Jisasgo te Juda dabego bomo yai po ola mabo be taga pelama, tama Saimongo be tomoba pali. Saimon aga au tigi moni posolo gasigo mu isai sęai pila muani. Te we tau somainu eyu, augwaligo Jisas i wali.

³⁹Te we pageba Jisas aga dolalugi pelama, “Te dwai gasi, nago te we taga pao,” Jisasgo te po wali. Te po obaso, te gasigo te we taga pali. Tama tilama, te we polo tama ma hogoda sanama, be page asali bidi dabe nai ula mabo sę ela bilali.

⁴⁰Te giliga ge aba degasaide, te gasi yali bidi aga abagi dedego augwali Jisas aga pageba odasa aselawali. Tama agai nogo te gasi we bidi dononama, mumuna bilali. Tama augwali tigidali ma gesa pali.