Luka 4:25-40

²⁵A dovot go iau tatike ta vavat ba: Mangoro na ua na vavina dia ga ki Israel ta ra kilala i Elias, ba di babat ra lavur bakut a utul a kilala ma ra laptikai na gai, ma ra ngala na mulmulum i tup ra gunagunan parika;

²⁶ma pa di ga tulue Elias tadav diat, tadav uka ra ua na vavina ta ra pia na pal Sarepta ta ra gunan Sidon.

²⁷Ma mangoro na vukavuka dia ga ki Israel ta ra kilala kai Elisa ra propet, ma pa di vagomgom ta na ta diat, ia kaka Naaman a te Siria.

²⁸Ma diat par dia ki ra pal na lotu, dia kankan ba dia valongore go ra lavur tinata;

²⁹ma dia tut, ma dia okole vue kan kadia pia na pal, ma dia ben ia ta ra papar a tavarat ta nam ra luana di ga pait kadia pia na pal tana, upi diat a vue valilie vaba ia.

³⁰Ma i vana ka livuan kan diat.

³¹Ma i vana Kapernaum, a pia na pal Galilaia. Ma i tovo diat ta ra Bung Sabat

³²ma dia kaian ta kana vartovo, tago kana tinata i dekdek.

³³Tika na tutana ta ra pal na lotu, a dur na tabaran i ovai tana, ma i oraoro mat dari:

³⁴Dor dave ma u, u Iesu a te Nasaret? U tar vut laka upi una ubu vue avet? Iau nunure u, u a Tena Gomgom kai God.

³⁵Iesu i bor bat ia, i biti: Una ki mut, ma una irop kan ia. Ba ra tabaran i tar pul vabura vue uro ra pia livuan ta diat, i irop kan ia, ma pa i ga vakaina.

³⁶Ma i tup diat par ra bunurut, ma dia titir vargiliane diat dari: A tinata ava go? Tago i kure vadekdek ra umana dur na tabaran, ma i tulue diat ma dia irop uka.

³⁷Ma ra varvai ure i vana vurvurbit ta ra lavur gunagunan.

³⁸Ma i tut, i vana kan ra pal na lotu, i ruk ta ra kuba i Simon. Ma nimu i Simon i tup ia muka ra malamalapang, ma dia lul ia ure.

³⁹I tur pa pirana, ma i tigal ra malamalapang, ma i oton muka; ma i tut, ma i kudakudar ta diat.

⁴⁰Ba ra keake i vana ba, diat par ba ra umana niuru i diat dia mait ma ra. lavur mangamangana minait, dia kap diat pirana, ma i vung ra ura limana ta diat par, ma i valagar diat parika.