Luka 9:19-46

¹⁹Ngan di galiunu tiyei ne, “Di tooltool kapala tiwete be ong in Yowan yo irriu di tooltool i, inbe kapala tiwete be ong in Ilia. Inbe di tooltool kapala tiwete be ong in Maro koonoo atu yo ke mukot nga, ngan atu la o imadit mulu i.”

²⁰Motong la Yesu itor di mulu nen, “Ngan ang tapmim nga, kawete be au i sei?” Ngan Pita iraua betanga ki nen, “Ong in Kirisi, tool tani yo Maro ipootoo be si ipamulu di tooltool ki ye so dook tiap tani yo be igarung di i.”

²¹Motong la Yesu iwete betanga medana pang di galiunu tina a iso lodi be kin tigasagasa pang di tooltool kapala be.

²²Motong la Yesu iwete pang di galiunu mulu nen, “Tool Moolmool ke Maro ole isolo moonoo le masngana alunu kaiye. Inbe di tooltool maimai kidi Yuda tiye di tooltool maimai ke paroranga so pang Maro, inbe di pannoongoo ke ger ke Maro, ngan ole tiwala muridi panga, inbe tiraumate le imata. Bong ole iken ye ke ru, lo ngan be ye ke tol ki ngan ole imadit mulu ye ni ke matenge.”

²³Motong la iwete pang di galiunu tina le imot nen, “Kumata tool atu lono be man itoo au nga, ngan ya taunu irautoo le du iyepe lopo, inbe kanakana ngan ikooroo kai palasingi ki a itoo au.

²⁴Yesoo, sei tool yo lono mai san ye yepongo ki ke tana i mai mata a iparama i, in ole ilene. Bong sei tool yo lono mai san ye yepongo ki ke tana i tiap, inbe iraia tinini le imot be iyei urata kiau i, in ole ikaua yepongo dook mata yo taukan motingi i.

²⁵Le kakamata, tool be iyau balingi matana matana le imot ke tana i panga, lo ngan be imata a ila nga, ngan ole balingi tina ngan iloni belei?

²⁶Inbe kumata sei tool be moomoonoo yau, inbe moomoonoo ye betanga kiau le ipataukala ye di tooltool tina ngan matadi nga, ngan ye kene yo be Tool Moolmool ke Maro imulu a isi ye i, in ole moomoonoo ye tool tani lapau. Ya in ole ipa ye nunngana, inbe ye Tamana iye di bangabangana ke Maro yo ipootoo di panga ya taunu ngan nunngadi lapau a isi nga, bong ye kene tani ole moomoonoo ye di tooltool yo muku ngan moomoodi ye nga.

²⁷Awete pang moolmool nen, di tooltool kapala yo nookoot taye di takododo ni nga, ngan ole timmata tiao, inbe tikamata dada yo Maro be matan kala di tooltool ki ye i, in ole pombe mallangana.”

²⁸Tiyepe le lo so ben ke limi be tol iman a ila, motong la ikaua Pita iye Yowan inbe Yemis a iye di tilo pang kawal be lo di leu tiyepe nango, a nen ngan ipatarau.

²⁹Le nga ye kene yo Yesu ipatarau ye in nga, ngan matan palele, inbe sousoungu le wam ki nga ikoko le ikoko welewele dawa ben kili itai nga.

³⁰Inbe mooloo tiap be di Maro koonoo ru yo Mose iye Ilia nga, ngan pombe pang ye Yesu a tiye tiwetewete.

³¹Di ngan tipa ye Maro nunngana la tisi be si tiye Yesu tiwetewete ye betanga yo Maro ikarata be Yesu ole imata Yerusalem, lo ngan iyege tana i a be ilo nga.

³²Ngan Pita iye di diene ru nga, ngan matadi gei dook tiap le nga titure. Bong yeisa be kene yo di tol titakrai a timadit ye in nga, ngan tikamata Yesu nunngana, inbe suru tina yo tiye tikododo nga.

³³Le nga ye kene yo Mose ye Ilia tina ngan be tiyege Yesu a tilo, motong la Pita iwete panga nen, “Tool Mai, nga dook mata ke be idi nga tayepe nanga. Le kumalum pam, a be nen ngan amre badabada tol; atu pong, san pang Mose, inbe san pang Ilia.” (Ngan Pita isere betanga yo be iweta i, ngan la le iwete sokorai nen nga.)

³⁴Pita iwetewete pang Yesu go, inbe eng tene isi le si rur ki iloko la podi, le di galiunu tina ngan titattadai ye yo eng tene isi le si iloko la podi nga.

³⁵Inbe tool atu kalngana pombe eng tene tani lono in iwete nen, “Tool in au natuk yo apootoo be iyei urata kiau i. Le kalongo betanga yo be iwete pang nga!”

³⁶Ngan tool tani in kalngana iwete nen a imot, motong la di galiunu tina be matadi sarai ngan tikamata Yesu ataleu la ikododo i. Le nga ye kene yo be timulu ke kawal a tidu ye in nga, ngan di galiunu di tapdi tipataukala betanga le tigasagasa pang tool sa ye so tina yo tikamata, ngan tiap.

³⁷Yesu iye di galiunu tol tina tiyepe le bongbongini ki, motong la tipa ke kawal a tisi, ngan le di tooltool malala mai tipa a timan titauarai di dada.

³⁸Ngan tool atu yo ipa kataunu ye di tooltool malala mai tina i, in koonoo pang Yesu nen, “Atoo, Pannoongoo, atorong be kulonau a kumata natuk tamoto ni ngan, yesoo bong ni natuk ataleu tani nani.

³⁹Ngan kanakana nga be so sadi idiwidiwoo nga, ngan ole palbe leu be isulukat a ikatte du tana, inbe isodangadanga a ngoon sian du. Ngan nen le so sadi tani in igarungu tinini le ke be ikoo ye pitiap yege.

⁴⁰Ngan la aman be man ator di galium nga be tinganga so sadi ye, bong ngan ke be tiloni tiap.”

⁴¹Motong la Yesu iyei ne, “Ona tiap! Ang di tooltool yo nookoot kayepe nga, ngan katara lomim le imede ye Maro tiap, bong lomim kap dada dook tiap alunu san. Nga ole ke pi mulu be nen ngan ayang tayepe inbe awete a kayei dada yo nen ngan mulu ye nga?” Motong la iwete pang tool tani nen, “Oo, kouo natum in a iman yau me e ni.”

⁴²Motong la be ikaua kase tani a iman pang ye Yesu, ngan so sadi tani in idiwidiwoo a ikatte du tana le isodangadanga, inbe ngoon sian du. Bong ngan Yesu ipasak pang so sadi tani a inganga, inbe ikarata kase tani in le tinini dook mata mulu. Motong la ipamule pang ye tamana mulu.

⁴³Ngan nen le di tooltool malala mai tina yo tiyepe nga, ngan titakrai, yesoo bong tikamata ben gurana ke Maro in mai san ye yo ikarata kase tamoto tani in nga. Ye kene tani yo di malala mai tina ngan tikamata so le imot yo Yesu iyei nga le nga titakrai a lodi kaua urata ye go nga, ngan Yesu iwete pang di galiunu nen,

⁴⁴“Katar talngamim dook ye betanga kiau a kalongo. Ole titara Tool Moolmool ke Maro la di koi ki baedi.”

⁴⁵Bong betanga ke Yesu yo iwete nga, ngan di galiunu lodi galanga ye tiap. Inbe betanga tina ngan punu iken mallangana pang di ke be lodi galanga ye tiap lapau. Bong ngan di galiunu tina ngan titattadai be titoru ye soo so yo iwetewete ye nga.

⁴⁶Motong ye kene atu in Yesu di galiunu tina ngan di tapdi tiwetewete a tiparsu ye sei tool be iyei kuto mai a imuku pang di i.