Luku 9:19-46

¹⁹Dokopa dokaitame pii yanu pyao, “Endakali yangimi emba kandao Jone Kaimbu Pingi dokona lengema. Yangimi Ilainjana lengema. Dee yangimi potopesa wamba kateamino dupanya mende dee malunya sakatapyana lengemana,” leami-pyaa.

²⁰Dokopa baame dokaita lamaiyoo, “Doko nyakamame namba kandao apina lengemape?” lea-pyaa. Dopa leamopa Pitame pii yanu pyao, “Emba Gotenya Kataisa dokona,” lea-pyaa.

²¹Pitame dopa leamopa Jisasame pii kyoto joo dokaita lamaiyoo, “Nyakamame Pitame pii lelyamo doko endakali mendaipi mende lamaiya nayalapape!” lea-pyaa.

²²Dopa latala baame pii mende lao pituu, “Endakalinya Ikiningi dokome tanda longo lao napenge. Isingi akalipi, pitisa mupapi, mana setapae masingi akalipi dupame baa daa latala pyao kumasetami. Dopa petataminopa koto teponya Goteme baa dee sakatasetana,” lea-pyaa.

²³Dokopa baame endakali dupa pitaka lamaiyoo, “Endakali mendeme namba watao payatoo lao masetamo kandao doko, baame baa tange kame setala yuu yongata dii lao baanya ita poko doko nyoo soo namba watao paena.

²⁴Endakali mendeme baa tange isoo auu pyoo katapu laka lao masetamo kandao doko, baa alu pita. Dopaka doko, endakali mendeme namba lao masetala baa tange kame setamo kandao doko, baa auu pyoo katata.

²⁵Doko, endakali mendeme yuunya oapi dupa pitaka nyoo setao katapala baa koyatamo kandao doko, oapi dupa pitakame aipa petala baa nisetape?

²⁶Endakali mendeme nambapi nambanya piipi dupanya elya kayatamo kandao doko, Endakalinya Ikiningi tii pipae doko baanya Takangepi enjele epe etete dupa-pipa awapa tii pyoo ipao pituu baame endakali doko kandao elya kayata.

²⁷Nambame nyakama kiningi langilyona, endakali ae kalyamino datupanya mendapua kumala nayataminopa Gotenya isingi doko kandatamina,” Jisasame lea-pyaa.

²⁸Jisasame pii dutupa latala maitakao koto tukulapopi mende pateamopa, baame Pitapi, Jonepi, Jemesapi utupa laminao yuu manda mendenya loma sala pea-pyaa.

²⁹Pupala baame loma soo kateamopa baanya lengelyaapi doko waka jia-pyaa. Baanya yonge pee doko etete kyoo lao lenge lipilipi pia-pyaa.

³⁰Dopa piamopa akali lapoma Mosesepa Ilainjapa lee mendai ipao baa kateasa kalyu petala pii lao kateami-pyaa.

³¹Akali dolapo kaitinya tii pipae doko-pipa katao ipupala Jisasame maitakao Jetusaleme pupala kalai etasalanya pitamo dupapi kumatamo dupapi dupanya lao pii leami-pyaa.

³²Pitapi, Jonepi, Jemesapi dutupa lenge luu kayaminoaka doko, luu palya nayami-pyaa. Dokaitame Jisasa baa tii pipae jiamo doko kandao pituu akali lapoma baa-pipa kateambino dolapo kandeamiaka-pyaa.

³³Akali lapoma dolapome Jisasa yakinatala paanya piambinopa, Pitame Jisasa lamaiyoo, “Akali Andake, naima dakenya katapumanopa auu pilyamona, aiyaa anda tepoma pimana! Mende embanya, mende Mosesenya, mende Ilainjanyana,” lea-pyaa. Pitame pii leamo dutupanya tenge mende masala nayao mee ambe lea-pyaa.

³⁴Baame pii dutupa lao kateamopa kopa mendeme ipupala nyakama sanga piamopa akali dutupame paka kayami-pyaa.

³⁵Dokopa kopa dokonya pii mende tambetambe ipupala lao pituu, “Doo kalyamo doko nambanya Ikiningi, baa nambanya yapao nyepae dokona, nyakame baanya pii doko sakamaiyepape!” lea-pyaa.

³⁶Pii doko lalu peteamopa dokaitame Jisasa iki kateamo kandeami-pyaa. Gii dokopa dokaitame nengekaita lyokatala kandeamino dupanya mendaipi mende endakali mende lamaiya nayami-pyaa.

³⁷Taita dopa pyoo dokaitame yuu manda doko yakinatala peaminopa endakali kambu longo mendeme Jisasa kaitinisa kandanyiami-pyaa.

³⁸Dokopa akali dupanya mendeme endakali kaina dokonya katao kyoto joo ee lao, “Mana Lenge Akali! Embame nambanya wane dake nisakape! Nambanya wane mendai dake iki-kaita embame nisakatale lao ee lelyo.

³⁹Enjele koo mendeme wane dake minatae soo walu lasilyamopa baa ae lao kambu apupuaka mandyuu singi. Dopa pyoo silyamopa enjele koo dokome yonge dupa koyasoaka katao yapa yakinala naenge.

⁴⁰Dopa pingi dokonya nambame embanya disaipele dupame enjele koo doko watao pyakamaina laloaka doko, dokaitame kapa pao watao pyakamaiya nayalaminona,” lea-pyaa.

⁴¹Dopa leamopa Jisasame lao pituu, “Kanau! Masoo minala naengema uanga pyoo paengema endakali nyakama! Oo koto koto ongo namba nyakama-pipaka tole katatama laape? Nyakamame nambaka nenge nyoo katatami laape?” lea-pyaa. Dopa latala baame akali doko lamaiyoo, “Embanya wane doko laminao asa ipu!” lea-pyaa.

⁴²Laminao epeamopa enjele koo dokome wane doko lombanya setapala minao walu lasia-pyaa. Dokopa Jisasame enjele koo doko pyalanya leamosa wane doko mee jia-pyaa. Dokopa Jisasame wane doko takange doko tange maiyakamaiya-pyaa.

⁴³Dokopa endakali dupa pitakame Gotenya kalai andake piamo dupa kandatala mona andeami-pyaa. Koteaka lao baame piamo dupa pitaka kandatala endakali dupame baa lalyoo kateaminopa Jisasame baanya disaipele dupa dapa lamaiya-pyaa:

⁴⁴“Nyakamame pii datupa sepala kame nasalapape. Akali mendeme Endakalinya Ikiningi doko endakali dupa laitaka pyaanya enge nyalanya pilyamona,” lea-pyaa.

⁴⁵Dopa leamoaka doko, pii dokonya tenge doko masala naena lao yalo petae siamosa disaipele dupame masala nayami-pyaa. Dee dokaitame pii dokonya tenge doko baa-kisa pisalanya paka kayami-pyaa.

⁴⁶Dokopa disaipele dupame, “Naimanya mende api alyasale joo kalyamape?” lao pii yanda pyoloo piami-pyaa.