Luk 9:19-46

¹⁹K’acɛpsɛ ɔn darəŋ ŋaloku kɔ: «Ntɛ alɔma ŋaloku mɔ, a Saŋ wəgbət afum dəromun məyɔnɛ, k’alɔma ŋaloku a Eliya məyɔnɛ; alɔma a wədəŋk wəka Kanu wəcɔkɔ-cɔkɔ wəlɔma ɔ məyɔnɛ nwɛ ɛyɛfɛ afi dacɔ mɔ.»

²⁰Kɔ Yesu eyif ŋa sɔ: «Kɔ cəke cɔ nəna nəŋcɛm-cɛmnɛn’em kəyɔnɛ-ɛ?» Kɔ Piyɛr oloku Yesu: «Wəyɛk-yɛk wəka Kanu məyɔnɛ.»

²¹Kɔ Yesu entiŋ-tiŋ ŋa kəcaŋkɛ ti, ta ŋaloku ti fum o fum.

²²K’ɔnɔcər a pənamar dis dɔlɔl Wan ka fum bel-bel; abeki, aloŋnɛ apɔŋ kɔ atəksɛ sariyɛ ŋabɛləs kɔ; padif kɔ; pəyɛfɛ defi tataka tɔn ta maas.

²³K’oloku afum fəp ntɛ: «Kɔ fum ɛfaŋ kəcɛps’em-ɛ, wəkayi pəsak kəcɛm-cɛmnɛ tetɔn ta sərka, wəkayi pəwosɛ kəsak mɛfaŋ mɔn pəwosɛ kətɔrɔ haŋ pəfi dɔsɔk o dɔsɔk, pəcəm’em darəŋ.

²⁴Bawo, nwɛ o nwɛ ɛfaŋ kəyac kəyi doru kɔn mɔ, kəŋsalpər kɔ; mba nwɛ o nwɛ ɔ kiyi kɔn doru kəsalpər kɔ tetem mɔ, ɛyac ki.

²⁵Ake tɔyɔ fum kəsɔtɔ kɔn doru dandɛ fəp-ɛ, kɔ pəyɔnɛ fɔ wəkayi eyi kəgbalənɛ kɔ pəyɔnɛ fɛ ti wəkayi pəc-ləsərnɛ-ɛ?

²⁶Nwɛ o nwɛ ɛlapərn’em kɔ moloku mem, Wan ka fum endekɔ-sɔdəmnɛ-wosɛ kəyac məna wəkayi k’endeder pəmot pa pəlel pa dɛbɛ da Papa-ɛ, kɔ mɛlɛkɛe mecempi.

²⁷Ic-loku nu kaŋce: Afum akin akin ŋayi nnɔ kəfo kaŋkɛ aŋɛ ŋantɔdewak defi ta ŋantanəŋk dɛbɛ da Kanu mɔ.»

²⁸Ntɛ Yesu oloku moloku mamɔkɔ mɔ, kɔ mata camət-maas meŋcepər, k’ɛlɛk Piyɛr, Saŋ kɔ Sak, kɔ ŋampɛ tɔrɔ kəroŋ kəkɔ-lok-lokər Kanu.

²⁹Yesu eyi kəsali, kɔ kəro kɔn kɛsəkpər, kɔ yamos yɔn yɛnaŋkanɛ kəferɛ yoc-motər-motər.

³⁰Pəwon fɛ kɔ afum mɛrəŋ ŋayɛfɛ kəlok-loku kɔ nkɔn: Musa kɔ Eliya ŋanayi,

³¹aŋɛ aŋc-nəŋk pəmot pa pəlel pa debeki da Kanu disrɛ mɔ. Ŋac-loku Yesu kəkɔ kɔn nkɛ kəŋkɔyi Yerusalɛm mɔ.

³²Tɛtəŋnɛ Piyɛr k’asol ɔn ŋac-dirɛ pəpɔŋ; ntɛ ŋantimɛ mɔ, kɔ ŋanəŋk Yesu pəmot pa debeki da Kanu disrɛ, kɔ afum mɛrəŋ akɔ ŋanacəmɛ kɔ nkɔn mɔ.

³³Tɛm ntɛ afum akakɔ mɛrəŋ ŋaŋc-gbɛyɛnɛ kɔ Yesu mɔ, kɔ Piyɛr oloku kɔ: «Wətəksɛ pəntesɛ su kiyi ka nnɔ. Səcəmbər cəbal cəcɛpɛ-cɛpɛ maas, ŋin ŋam, ŋin ŋa Musa, kɔ ŋin ŋa Eliya.» Piyɛr ɛnacərɛ fɛ ntɛ oŋc-loku mɔ.

³⁴Ntɛ oŋc-loku tatɔkɔ mɔ, kɔ kəp kənder kəgbəpərnɛ ŋa kɔ kənesɛ kəsumpər acɛpsɛ a Yesu darəŋ ntɛ ŋananəŋk kəp kaŋkɔ kəc-der kəgbəpərnɛ ŋa mɔ.

³⁵Kɔ dim dowur kəp kaŋkɔ disrɛ, doc-loku: «Wəkawɛ ɔyɔnɛ wan kem, nkɔn iyɛk-yɛk: Nəcəŋkəl kɔ!»

³⁶Ntɛ ane dim dadɔkɔ mɔ, k’anəŋk Yesu pəcəmɛ sona. K’acɛpsɛ a Yesu darəŋ ŋaŋcaŋk ali fum ɛnaloku fɛ sɔ wəkos tɔlɔma ntɛ ɛnəŋk mɔ mata mamɔkɔ.

³⁷Dɔckɔsɔk ntɛ ŋantor kəyɛfɛ dətɔrɔ mɔ, kɔ afum alarəm ŋander kədefaynɛ Yesu.

³⁸Kɔ fum wəlɔma oŋkulərnɛ kənay kaŋkɔ dacɔ: «Wətəksɛ ilɛtsɛn’am məmɔmən wan kem, bawo wəkin wəkawɛ gboŋ iyɔ.

³⁹Ŋɔŋk ŋɛlɛc ŋɔlɔma ŋɛmbɛrɛ kɔ, kɔ ŋɔsɔŋɛ kɔ kəkulɛ-kulɛ gbəŋcana babɔkɔ, kɔ ŋeyikəc kɔ pəpɔŋ, kɔ ŋɔsɔŋɛ kɔ kəfoc kəwur kɔ dəkusu; kɔ ŋɔlɔləs kɔ dis, a kɔ ŋendesak kɔ.

⁴⁰Ilɛtsɛnɛ acɛpsɛ-am darəŋ kəbɛləs ka ŋi, mba ŋantam fɛ ti.»

⁴¹Kɔ Yesu oŋkulərnɛ: «Nəna afum alɛc a tɛm tantɛ, atɔlaŋ Kanu, tɛm cəke tɔ pəmar sɔ iyi kɔ nəna-ɛ? Tɛm cəke tɔ pəmar sɔ itɔmpər te tonu-ɛ? Məkɛrɛ wan kam nnɔ.»

⁴²Ntɛ wan wəkakɔ ɔŋc-lɔtərnɛ Yesu mɔ, kɔ ŋɔŋk ŋɛŋgbal kɔ dəntɔf kɔ ŋeyikəc kɔ pəpɔŋ. Mba kɔ Yesu ɛŋgbəŋ-gbəŋər ŋɔŋk ŋɛlɛc ŋaŋɔkɔ, k’ɛntaməs wan wəkakɔ, k’ɔsɔŋ kɔ kas.

⁴³Kɔ cusu cəwos afum fəp kənəŋk ka fənɔntər fəpɔŋ fa Kanu. Ntɛ mes mamɔkɔ Yesu ɔŋc-yɔ mɔ mec-ciyɛnɛ afum mɔ, k’oloku acɛpsɛ ɔn darəŋ:

⁴⁴«Nəna nəsu ləŋəs, nəcəŋkəl bel-bel moloku mamɛ: Kəbɛr k’ander Wan ka fum afum dəwaca.

⁴⁵Mba acɛpsɛ ɔn darəŋ ŋanacərɛ fɛ tedisrɛ ta toloku tatɔkɔ oŋc-loku mɔ; tɛnagbɔpnɛ ŋa, ntɛ tɔŋsɔŋɛ ta ŋaŋcərɛ ti mɔ. Kɔ ŋanesɛ kəyifət kɔ tedisrɛ ta toloku tatɔkɔ.

⁴⁶K’acɛpsɛ ɔn darəŋ ŋayɛfɛ kəyifətɛnɛ ntɛ tɔŋsɔŋɛ ŋacərɛ nwɛ eŋcepər ŋa dəkəcəmɛ mɔ.