Lukas 9:19-46

¹⁹Ra pölüeni, “Ekoch ra apasa pwe en Johannes Soupapatais, ekoch ra apasa pwe en Elias, nge pwal ekoch ra apasa pwe en eman lein ekewe soufosun lom a manauatä.”

²⁰Iwe, Jesus a aisiniir, “Nge ämi, iö oua üra pwe ngang?” Petrus a pölüeni, “En Kraist nöün Kot.”

²¹Mürin Jesus a fokun allük ngeni nöün kewe chon kaiö, pwe resap fokun üreni eman ei pworaus.

²²A pwal üreniir, “Nöün Aramas epwe fokun tolong lon riaföü watte, epwe küna koput me ren ekewe souakom, ekewe souasor mi lap me ekewe Sensen Allük. Repwe niela, nge mürin ülüngat rän epwe manausefälitä.”

²³Mürin a üreni ekewe aramas meinisin, “Are eman a mochen etiei, epwe pölükü manauan, epwe mwärei an iräpenges rän me rän o tapweto müri.

²⁴Pun iö a mochen amanaua püsin manauan epwe pöüt seni, nge iö a likitala manauan fän itei epwe amanaua manauan.

²⁵Epwe met lomoten än eman aramas epwe feiöchüni feiöchün unusen fanüfan, nge püsin manauan epwe pöüt seni, epwe pwal angei liwinin an tipis.

²⁶Are eman a säwäsiniei me ai kewe kapas, Nöün Aramas epwe pwal säwäsini lupwen epwe war lon an ling me än Saman ling me än ekewe chon läng mi pin ling.

²⁷Üpwe allükülükü ngenikemi, pwe mi wor ekoch aramas mi nom ikkei resap mäla tori repwe küna ewe Mwün Kot.”

²⁸Eu wiik mürin än Jesus apasa ekei mettoch, a emwenala Petrus, Johannes me James o emweniiretä won eu chuk pwe epwe iotek.

²⁹Iwe, lupwen a iotek, wowoon won mesan a wilila, üfan kana ra molupolup o pwechela.

³⁰Lon ewe chök otun ruoman mwän ra nom ren Jesus o kapas ngeni, ir Moses me Elias.

³¹Ätekei ra pwä lon ling seni läng o kapas ngeni Jesus usun an epwe apwönüetä än Kot we akot ren an mäla lon Jerusalem.

³²Petrus me chienan kewe ra fokun möür, nge ra nenela o küna än Jesus ling me ekewe ruoman mwän mi nom ren.

³³Lupwen ekewe ruoman mwän ra feil seni Jesus, Petrus a üreni, “Sounemenem, a fokun öch ach nonom ikei. Aipwe aüetä ülüngat imw mangaku, eu fän itom, eu fän iten Moses nge pwal eu fän iten Elias.” (Petrus esap wesewesen weweiti met i a kapas usun.)

³⁴Lupwen a chüen kakapas, eu kuchu a pwä o nürün a pwölürela. Iwe, ekewe chon kaiö ra niuokus, lupwen ewe kuchu a feitiu wor.

³⁵Iwe, eu möngüngü a möngüngüwu me lon ewe kuchu, “Iei i nei üa filätä, oupwe aüselinga.”

³⁶Iwe, lupwen ewe möngüngü a köüla, ra küna pwe Jesus chök a nom. Nge ekewe chon kaiö ra amwöchü ekei mettoch, nge resap üreni eman met ra küna lon ena rän.

³⁷Iwe, sorotän ewe rän, lupwen Jesus me ekewe ülüman chon kaiö ra feitiu seni won ewe chuk, eu mwichen aramas mi chomong ra souni.

³⁸Iwe, eman mwän me lon ewe mwich a kötä, “Sense, üa tüngor ngonuk, kose mochen kopwe alisi nei we ät, pun ina i chök nei.

³⁹Eman ngün a tötä won, pwe a müttir puchörütä, a achecha tori a puropurowu me lon awan. A chök akafeiengaua, nge esap mochen likitala.

⁴⁰Üa tüngor ngeni noumw kewe chon kaiö pwe repwe asüela, nge resap tongeni.”

⁴¹Iwe, Jesus a pölüeni, “Ämi eu täppin aramas mi lükümang o tipesosor. Ifa langatamen fansoun ai üpwe nonom remi o engila ngenikemi?” Mürin a üreni ewe mwän, “Kopwe uwato noumw we ikei.”

⁴²Lupwen ewe ät a feito, ewe ngününgau a aturätiu lepwül o achecha. Nge Jesus a allük ngeni ewe ngününgau pwe epwe towu seni. Iwe, ewe ät a pöchökületä. Mürin Jesus a aliwini ewe ät ngeni saman.

⁴³Iwe, ekewe aramas meinisin ra mairü ren än Kot manaman mi pöchökül. 9.43b-45 Iwe, lupwen ekewe aramas ra chüen mwar ren ekewe mettoch meinisin Jesus a föri, a üreni nöün kewe chon kaiö,

⁴⁴“Ousap manlükala met ei üpwe le ürenikemi. Nöün Aramas epwe tolong lepöün aramas.”

⁴⁵Nge ekewe chon kaiö resap weweiti ekei kapas. A monomon seniir, pwe resap tongeni weweiti, nge ra niuokus ar repwe kapas ais ngeni usun.

⁴⁶Iwe, a fis eu aninifengen lefilen ekewe chon kaiö won iö epwe lap me leir meinisin.