Luka 9:14-45

¹⁴Eꞌea vaze niduꞌa boꞌaḡano ohoze daꞌoꞌe niduꞌa 5,000 radiunu. Iesuꞌa ane tahiꞌatahiꞌa ziro, raenaꞌa, “Ze ꞌahige zoꞌi, '50 rovonerovone ehoroꞌi'”

¹⁵ꞌOugadu Iesu reiroteꞌe idunaḡano vaze niduꞌa ehoriro.

¹⁶Eꞌe ḡarugano Iesuꞌa beredi fuꞌo zu ḡozone ꞌaheu madu adure ḡianeꞌenaꞌa, Badiꞌa mazao manoḡa tauḡi reiro. Ebu beredi zu ḡozone tahi tahe vaheḡe ane tahiꞌatahiꞌa zinadu ze ḡahuḡe ḡemiro.

¹⁷Zeḡe niduꞌa au ubararo ebu Iesu tahiꞌatahiꞌa ogomu ḡahaꞌa ḡahaꞌaꞌe tunahu niduꞌa 12 irivaꞌoniro.

¹⁸Mada ꞌahogano Iesuꞌe ane daꞌo kurau radiro, ebu ane tahiꞌatahiꞌa daꞌo ane teite radiro. Ebu Iesuꞌa ze ḡadiziro, “Vazeꞌa eꞌe iniu rae raꞌohe?”

¹⁹Zeḡeꞌa naenaeninaꞌa, “Nuꞌe 'Ioane Babatiso', nuꞌe 'Elia,' raꞌohe. Nuꞌe raenaꞌa, 'Amahi rudaroteꞌe peroveta vazeḡa ꞌahoganiꞌa ḡabode iḡuniro.'”

²⁰Ebu Iesuꞌa ḡadiziro, raenaꞌa, “U zaꞌa raꞌetene eꞌe iniu?” Peteroꞌa ninaꞌa, “Ḡaꞌe Badiꞌaꞌa tuḡuꞌiroteꞌe vazeḡa, Keriso!”

²¹Iesuꞌa ḡoere riḡa ziro, raenaꞌa, “ꞌAdi ḡoeꞌa vaze ꞌahoga ago zoꞌi!”

²²Ebu ani raenaꞌa, “Eḡe, Vaze Ubuganiꞌa aduga ḡehaḡa hidiꞌuma. Vaze boroboro, Badiꞌa dibuꞌo hauꞌeteꞌe ḡihiꞌaḡaḡihiꞌaḡa zu Mose goro ḡoeꞌa ihozeꞌeteꞌe azaḡaniꞌa heꞌeheꞌehiꞌuma zu uḡuhiꞌuma. Rehano mada uḡidu zamaḡano bare ḡabode iḡuniꞌuma.”

²³Ebu Iesuꞌa zeḡe niduꞌa zinaꞌa, “Iniuꞌa eḡe ḡaruna hegotiꞌuma roꞌidene, ane ura haḡaiḡa niduꞌa modadu, mada niduꞌa ane satauro odoheꞌenaꞌa, eḡe hegotoꞌi!

²⁴Mazaḡa iniu vaze ane ḡabone obone giganine, ani ḡabone tuḡutuḡu mene hidiꞌuma. Rehano iniu vaze ane ḡabone eḡe ꞌuano ahetine, ḡabone tuḡutuḡu hidiꞌuma.

²⁵Vaze ꞌahoganiꞌa haba niduꞌa madu ḡaboneḡa mae vaḡinine, nagini manoḡa hidiꞌuma?

²⁶Vazeꞌa eḡe zu eḡe ḡoere oꞌonine, eḡeꞌa eḡe agaḡano, mamahe aḡaḡano ebu tuḡure viga zaḡoḡa aḡaḡano bare ovaine, eḡe, Vaze Ubuga zu ani oꞌoniꞌuma.

²⁷E hube hune ziꞌohe, faifaine egoꞌi! Izidi zae boꞌaḡano vaze nunuꞌa, izema rudanogano, Badiꞌaꞌa ibitohauꞌeteꞌe habaꞌa horoniꞌuma.

²⁸Mada fuꞌo uḡidu fare ḡarugano Iesuꞌa Petero, Iakobo ebu Ioane zamaze maḡa rana kuranoḡa radu itiro.

²⁹Ani kurauꞌeteꞌe zamaḡano, iraḡaniꞌa nufiro zu dabuaḡaniꞌa uranadu vazavazahiro.

³⁰Eꞌe madaḡano vaze ꞌaheu, Mose zu Eliaꞌa fureradu ze Iesu teite ḡoaniro.

³²Petero zu Iesu tahiꞌa ꞌaheuꞌe baze rudaro. Zeꞌa evatirotene Iesu agaḡa zu ani uhiḡano vaze ꞌaheu edanoga horoziro.

³³Mose ebu Eliaꞌa Iesu muhinoga madaḡa meirotene, Peteroꞌa Iesu niro, raenaꞌa, “Zuhiꞌa Boro, eme ꞌadama radiuꞌeteꞌe manoḡa tauḡi! Emeḡe uḡiduꞌa nugo taruha uḡidu ogoratihi, tibaꞌe ḡae veize, tibaꞌe Mose veize ebu tibaꞌe Elia veize.” Petero aniꞌa nagini raꞌetaꞌe aḡuꞌa.

³⁴Ani ꞌouge reirotene ḡozeꞌa ovadu ogoziro, eꞌanoꞌo ze rihau rudaro.

³⁵Ebu ḡoze zamaḡanonoꞌo Badiꞌa ago ꞌahoga igiro, raenaꞌa, “ꞌAhiꞌe eḡe Ubude, eḡeꞌa ohotiroteꞌe vazeḡa. Ani ḡoere egohanoi!”

³⁶Agoꞌa hauḡirotene Iesu ane daꞌo horoniro. Zeḡe uḡiduꞌa nagini horoniroteꞌe vaze ꞌahoganiꞌa mene rae fureniro.

³⁷Mada eꞌe ḡarugano Iesu zu ane tahiꞌatahiꞌa teite maḡanonoꞌo ovairo, ebu vaze ḡuḡuvaḡa hidiro.

³⁸Vaze ḡuḡuva zamaḡanonoꞌo vaze ꞌahoganiꞌa Iesu huniro, raenaꞌa, “Ihore vazeḡa, e ḡa umiꞌeꞌohe. Eḡe ubude tibuhuga ꞌadi ḡabonoꞌi!

³⁹Vine sauꞌaniꞌa ani agatohauꞌetene, tabara huau ḡaniḡanaꞌenaꞌa, beroꞌude ḡemeꞌohe zu hena hebeꞌanonoꞌo busureꞌohe. Vine sauꞌaꞌa mada niduꞌa ani zamao radiuꞌenaꞌa, ahiꞌa sausauneꞌohe.

⁴⁰Eḡeꞌa ḡae tahiꞌatahiꞌa mazao vine sauꞌa eꞌe hegone bunoga radu umizeha, rehano ze mene idaraneha.”

⁴¹Iesuꞌa vaze ḡuḡuvaḡa eꞌe naenaeziro, raenaꞌa, “Zaꞌe Badiꞌa mazao mene fiꞌeꞌeteꞌe zu veꞌoreꞌeteꞌe azaḡa! E mada faḡa zae teite zamahe gigane mene obone tiꞌuma!” Ebu tahiꞌa eꞌe moga ninaꞌa, “Ubugo odohe ꞌadi aroꞌi!”

⁴²Moganiꞌa tahiꞌa eꞌe tutune onaꞌeteꞌe zamaḡano, vine sauꞌaniꞌa ahiꞌa rana radu higau bauriro zu beroꞌude ḡemiro. Ebu Iesuꞌa vine sauꞌa roniro, raenaꞌa, “Tahiꞌa ahiꞌaꞌonoꞌo buanoꞌi!” ꞌOugadu vine sauꞌaꞌe zogone buanadu tahiꞌa eꞌe manoriro. Iesuꞌa ani moga bare haro.

⁴³Ebu vaze niduꞌa Badiꞌa gigiꞌaḡa boro horonadu zaguzagaro. Vaze niduꞌa Iesuꞌa haḡairoteꞌe haḡaiḡa horonadu zaguzagarotene, Iesuꞌa ane tahiꞌatahiꞌa ziro, raenaꞌa,

⁴⁴“Ḡoere ꞌadi faifaine zamaroꞌi! Eḡe, Vaze Ubuḡa, agirehe ꞌevorao riꞌihiꞌuma.”

⁴⁵Rehano ane tahiꞌatahiꞌaꞌe aniꞌa nagi raꞌetaꞌaꞌe mene zamariro, mazaḡa zeꞌa mene ederoga veize huga eꞌe uꞌuruḡa. Ebu zeꞌe aniꞌa raꞌetaꞌe moneo bare ḡadimanogaꞌe riharo.