Ruka 9:14-45

¹⁴Mame ynara tykase, Jezu a tozuhse, —Arypyra, iporohkapoko toto. Oseosetyoro tyripotoko toto, 50me rokẽ tuhke toto exiry tyripotoko, tykase Jezu eya xine. Moroto 5.000me orutua kõ kynexine tuhke exiry.

¹⁵Morarame ahno tõ typorohkapose eya xine emero.

¹⁶Mame wyi tapoise Jezu a 5me. Kana roropa tapoise eya asakoro. Morarame kakoxi tõsenuhmase, —Kure mase Papa kapuaono, tykase ynororo. Moromeĩpo wyi tytohtohkase eya kana maro. Morotoino tokarose typoetory tomo a, imoihmãkomo a ekarotohme ropa eya xine.

¹⁷Mame tõtuhse toh rahkene. Tuesapare roropa toh toehse. Mame akoĩpyry tanỹse roropa eya xine. 12me ruto typehkase akoĩpyry ke. Enara pitikono emãkaposemy tyamene xine autuhtohkõme. Imeĩpo taropose ropa toto esaka xine.

¹⁸Morarame toiroro Jezu kynexine oturũko Tumy maro. Mame ipoetory tõ 12mãkõ kỹtone eya. Mame tõturupose eya xine, —Onokyme imoihmãkõ jekarõko nae? tykase ynororo typoetory tomo a.

¹⁹Mame ynara tykase toto eya, —Otarãme Joãome oekarõko toh mana, ahno ẽpurihkahpõme. Imehnõ roropa otarãme Eriame oekarõko toto. Imehnõ roropa otarãme pake Ritonõpo poe urutonõpo ẽsemãkasẽme ropa oekarõko toh mã otarãme, tykase toto Jezu a.

²⁰Morarame eya xine Jezu tõturupozomose ropa. Ynara tykase ynororo eya xine, —Amarokõ ke? Onokyme roropa jekarõko matohu? tykase eya xine. Mame Peturu a tozuhse, —Ritonõpo nymenekahpyry mase yna pynanohneme, tykase Peturu eya.

²¹Mame Jezu a tymynyhpãkapose toto. Ynara tykase ynororo eya xine, —Imehnomo a moro onekaropyra ropa ehtoko, tykase eya xine.

²²Mame ynara tykase ropa ynororo typoetory tomo a, —Kapu ae Ayhtohpyry htomãko mã Izyraeu tõ tamuxiry tomo. Tutuisarykõme yse pyra exĩko mã toto. Jetapary se exĩko mã toto, Ritonõpo maro oturuketõ tuisary tõ maro, Moeze nymerohpyry poko amorepatõkõ maro roropa. Mame jexixihmapõko toh mana jorihmapõko. Yrome moromeĩpo oseruao tõmehse jahtao ẽsemãnõko ropa ase, tykase eya xine.

²³Moromeĩpo ynara tykase ropa Jezu imoihmãkomo a, —Ymarõme oexirykõ se awahtao xine, ypoe oehtohkõ rokẽ poko ehtoko. Opoe xine oehtohkõ irumekatoko. Kokoro rokẽ oorikyrykõ enetupuhtoko oorypyrykõ poko, ymarõme oehtohkõme, tykase.

²⁴—Mãpyra opoe xine oehtohkõ poko rokẽ awahtao xine, orihnõko matose. Ymarõme pyra exĩko matose. Yrome ypokoino oorikyrykohtao ymaro exĩko matose jũme.

²⁵Otyme kure oerokurukõ mõkomo apoiry poko rokene? Otyme kure imõkomoryje oexirykomo oorikyrykohtao? Arypyra. Oorikyrykohtao ãkorehmara xine moro mana omõkomohpyrykomo. Ritonõpo pũtome pyra exĩko matose jũme. Moro poko rokẽ kuh osenetupuhnõko matohse. Yrome Ritonõpo omiry apoiry poko osenetupuhpyra amarokomo.

²⁶Etatoko pahne, ihxipỹke awahtao xine ypoko, jomiry poko roropa ihxipỹke awahtao xine, Kapu ae Ayhtohpyry roropa ihxipỹke exĩko opoko xine mana, tuisamehxo tooepyry ropahtao Tumy kurã esae, Ritonõpo nenyohtyã kurãkõ maro tooepyry ropahtao, tykase Jezu eya xine.

²⁷—Sero poko wenikehpyra ehtoko. Ynara ãko ase oya xine, kymaro xine exiketõ toitoine orihpyra ro tahtao xine, Ritonõpo tuisame ehtoh enẽko toto, tykase Jezu eya xine.

²⁸Morarame 8me tynyhse ahtao Peturu tõ tarose Jezu a ypy pona, João maro, Tiaku maro. Tarose toto eya oturuse Ritonõpo maro.

²⁹Morarame autururuhtao ro ẽmyty tytyorõtase. Zupõ roropa karimutume toehse, saereh tykase.

³⁰Morara toehse ahtao asakoro orutua kõ tõsenepose eya xine. Mame Jezu maro tõturupitose toto. Ynara toh kynexine, Moeze, Eria, enara, pakatokomo.

³¹Morararo toh kynexine saereh ãko roropa. Morarame tõturuse toto Jezu maro aorikyry poko, aetuarimary poko, enara, Jerusarẽ po. Aorikyry se Ritonõpo exiry poko tõturuse toto.

³²Yrome Peturu tõ tynyhse kynexine tyrõnaka xine. Mame typakase ropa toto ahtao, Jezu saereme exiry tonese eya xine. Asakorõkõ roropa tonese eya xine, Jezu maro.

³³Mame mokaro asakorõkõ onuhpitoryhtao ropa, ynara tykase Peturu Jezu a, —Pãna, kure taro kuexirykomo. Tapyi ynanamoxi, oseruao, axĩtao rokene, toiro atapyĩme, toiro Moeze tapyĩme, toiro Eria tapyĩme, enara ynanamoxi, tykase Peturu. Morara tykase ynororo onenetupuhpyra toexiryke moro poko.

³⁴Mame Peturu otururuhtao ro akurũ tooehse toto poro. Mame akurũ eneryke tyya xine enaromỹke toehse Peturu tomo.

³⁵Morarame omi totase akuru htae. Ynara tykase, —Umũkuru nymyry mose ynymenekahpyry. Morara exiryke aomiry etatoko, tykase Ritonõpo.

³⁶Morarame omi tymynyhpãse ahtao, Jezu rokẽ tonese eya xine. Mynyhme rokẽ toh toehse. Tynenehpyrykõ poko oturupyra toh toehse roropa imehnomo a.

³⁷Morarame tõmehse ahtao ypy poe tyhtose ropa toto. Morarame tuhkãkomo a Jezu toporyse ropa.

³⁸Toto rãtao toehse ahno. Jamihme Jezu tykohmase mokyro a. Ynara tykase, —Tamuxi, umũkuru eneko ajohpãme samo. Ipyno ase toirõ myhe exiryke.

³⁹Joroko mose apoĩko mana. Mõtoino rokẽ kui ãko mose nase. Mame akyakyhnõko roropa nase. Akuakurotãko roropa nase ĩtary ae. Iryhmãko joroko mana. Onurumekara roropa mana.

⁴⁰Opoetory tomo a oturu repe itũtanohpotohme ropa repe. Yrome onutũtanohpopyra toh nekurehno, tykase Jezu a ynororo.

⁴¹Mame Jezu a tozuhse. Ynara tykase ynororo, —Tõ! Otara ahtaohxo keh jenetupuhnõko matou? Jenetupuhpyra ro rukuh matou, popyra oexirykõke. Amaro xine ywy repe. Yrome jenetupuhpyra ro amarokomo. Typenekehse ywy opoko xine, tykase. Mame ynara tykase ynororo jumy a, —Omũkuru enehko ya, tykase.

⁴²Mame jumy a tonehse ahtao, joroko a tomapose ropa nono pona. Takurotanohpose roropa eya. Mame ynara tykase Jezu joroko a, —Otũtako ropa joroko, tykase Jezu. Mame tutũtase ropa rahkene. Tukurãkase ropa poeto eya. Morotoino jumy a tokarose ropa eya.

⁴³Morarame tõsenuruhkase morotõkõ emero Ritonõpo jamitunuru eneryke tyya xine. Mame mokaro osenuruhkaryhtao ro tõturuse ropa Jezu typoetory tomo a,

⁴⁴—Wenikehpyra mehtatose sero jomihpyry poko, Kapu ae Ayhtohpyry ekarõko mã toto jehno exiketomo a, tykase Jezu eya xine typoko.

⁴⁵Morarame aomiry onenetupuhpyra toh kynexine tonẽse sã exiryke eya xine. —Oty kary se mose nae? tykase toto oseya rokene. Yrome eya, “Oty kary se hko hmano?” kara toh kynexine, ihxipỹke toexirykõke.