Luk 9:14-45

¹⁴Iri lau badeh, i buku lamawa (5,000). Arile, Jises tiye i toro lau tan, “Ado badeh, katukumwi iri lau kase, lomonoh (50) kase, lomonoh (50) kase, ki le buku doh.”

¹⁵Eme oro lau tan mesekei i le buku bohon, ya eme oro tiye iri lau badeh, kamanyah ka-en andri.

¹⁶Ano iy andrei jabi ramen ma limeh, hawe ni ma la-uh nane dah eme, ano iy anyolom iu i loken bolo kandrah, ma iy edeu wurah i ta Kindrei. Ano iy boso-ei jabi ramen dah. Ya eme iy edeu ili mine oro lau tan. Eme oro ala adeu ili winiya iri lau mari.

¹⁷Eme iri aimon ma ndrine iri idih. Ya tikibwah tiri erah, eme oro lau tan anyuhiy i bwak badeh, asahan ronoh la-uh.

¹⁸Ano na len ari ja badeh, Jises hawe oro lau tan le ala rasi ja asolom. Eme iy ndremenya oro lau tan, “Iri lau anya jo are lau handru?”

¹⁹Eme oro anya, “Iri rayah anya ou Jon ta alomwa, ya iri rayah anya ja, ou Alaija; ma iri rayah anya ja, ou badeh, oro ari propet mene ndramak ndrame loke ja.”

²⁰Eme Jises ndremenya oro, “Ya ado amwenen anya jo are lau?” Eme Pita asumon iy i buku doh, “Ou badeh, Krais, Kindrei suni ou ame dah.”

²¹Ma eme Jises batanau oro boto-on ta oro badeh, sasehek ta ari lau ndri-iy.

²²Ano iy tiye, “Nadu Ndramak Awas kameh akohok sisi-in solo-an labai, ma iri lau tinan areu bwena, hawe iri lau tinan tiri pris, ma hawe iri lau ta leheya kandriyen tiri Juwis kameh baseken iy bwe. Ma idah kameh, iri adai iy imek, ya len taloh ano iy kameh amak ja.”

²³Ano iy tiye i toro mari: “Buku none ari ndramak anya ki-in hamon tek, mwasin, iy kamani so-ok tan mari, ya iy kabwese-ei kei tondreh tan na len mari. Ya iy ki-in hamon tek.

²⁴Tasah, buku none ari ndramak anya katawi kohan kudu, kohan kameh ano. Arile, buku none ari ndramak abudon jo ya kohan ano, iy kameh winiyan andrei kohan ja.

²⁵Ya, buku none ari ndramak kuhi lakou mari badu kon munyak, ya iy kimek, iri lakou doh kameh sebenei iy i buku sah handru?

²⁶Ou are lau bwilim ama jo ma ta sahou tek, Nadu Ndramak Awas kameh bwilin ama tan ale, i buku none len hamon kameh, iy eme ma lomadan tan, hawe lomadan ta taman, ma hawe lomadan tiri angelo, lau ndrabun badu loken.

²⁷Jo asehek sahou handru ewek tado. Lau ra-on ales ereu bolo to dah kameh winiyan bamak bwe, ya iri kameh anyolom tondrok ta Kindrei.”

²⁸Jises asehek sahou tan ano badeh, udu, ben ndru la-uh ano, iy kuhi Pita, Jon ma hawe Jemis a hawen, ma oro ala bwele-e mandrei ala asolom.

²⁹Eme iy asolom le badeh, badan asahan i randrah labai, bwilin anya ma awin tan badeh, nyikadin tinan labai, anya i buku kalik.

³⁰Eme oro atou Moses uru Alaija asahan ma lomadan badu loken ame, asehek sahou hawen ta nyala imek kameh iy bwese udu Jerusalem.

³²Ya Pita hawe Jon uru Jemis badeh, ndramadin tuk, eme oro amak badeh, oro anyolom lomada Jises hawe lomada uru lau nane ales are hawen dah.

³³Eme ya uru lau nane are hawe Jises anya ka-au le badeh, Pita tiye i ta Jises i buku doh, “Laban, mwasin handru ta aso are ndra kada-ah, ya aso katahi taloh mandron kudu dah, ra-em tam, ra-em ta Moses, ma ra-em ta Alaija.” Arile, Pita bala tanan sasah iy asehek doh, bwe.

³⁴Ya sahou ta Pita udu ndra bohon kahis le badeh, asi kandrah seselek eme anya katubuluhi oro, ma oro anoh.

³⁵Eme ya sahou ari asahan bolo asi kandrah nane asehek i buku doh, “Idah naduk handru, jo suni iy ewek; ya ado kanuhun sahou tan.”

³⁶Eme sahou doh ano le badeh, oro atou Jises le ari udu ndrahun. Ya eme oro badeh, tawi le udu budon toro, oro basehek nyala lakou nane udu bolo len doh mene oro atou, bwe.

³⁷Ben ari oro are bwele-e mandrei, ano oro are mandrei ame andri, ano len ari ja badeh, lau solo-an labai ame hawe Jises.

³⁸Eme ndramak ari udu bolo iri aloh, “Ndramak ta leheya, jo naduk ari le dah, jo aseken ou ame anyolom iy se.

³⁹Iy nah doh, malawin ndra-in udu la-un, ya i le mani tur malawin ndra-in kameh amekes iy arah. Ano, iy totoreh hawe bubusi bohon kameh atau; ma amekes badan kameh isi udu gwek, luluwen labai.

⁴⁰Eme jo badeh, tiye oro lau tam rayah ta katikahei malawin ndra-in udu la-un doh ki-iu, arile oro winiyan bwe.”

⁴¹Eme Jises asehek sahou i buku doh, “Ado lau mwan ma badih batehei budon handru bwe, budon ma kandriyen tado bamwenen bwe. Len sabe kameh jo kereu hawe ado, ano ado barala tanan boto-on ta Kindrei? Ou tiyani nadum keme dah.”

⁴²Ano nah dah, edek eme hawe Jises le badeh, malawin ndra-in mudi iy i andri bwidi iy totoreh, ma bubusi bohon atau. Eme Jises ibolosen i ta malawin ndra-in udu la-un iu, ma iy amwenen ja. Eme iy atehei nah dah, i hawe taman.

⁴³Eme mani iri lau mari atur labai, ta boto-on ta Kindrei. Ya eme iri lau boho iri asak kahis le ta lakou nane Jises amekes, eme ma Jises tiye i toro lau tan,

⁴⁴“Ado badeh, katehei ndranye ado kamwenen ki-in ta sahou jo anya kasehek tado: Iri kameh atehei Nadu Ndramak Awas ili mine iri lau ta atondrok.”

⁴⁵Arile, budon toro baleu ta sahou tan nane bwe. Tasah, sahou dah badeh, ndraton ma oro bandrei bwe, ma oro ale badeh, anoh ta ndremenya Jises ta aliy.