Luku 9:14-45

¹⁴Anampina 5 tauseni'a venene mni'naze. (Anampina a'nene mofavreramina ohamprine) Anante Jisasi'a amage'ma nentaza disaipol nagaku huzmanteno, zmasaminke'za 50ti'a refko hu'za mago mago kevufina manitere hiho.

¹⁵Anama Jisasi'ma zmasamiaza hu'za amagema nentaza disaipol nagamo'za, ana maka vahera zmazeri atru hutere hige'za mani'naze.

¹⁶Jisasi'a 5fu'a bretine tare noza'ene erino, monafi kesga huno negeno, Anumzamofo susu hunteteno, ana bretiramina eritamanasi zamizmi nehige'za, ana amagema nentaza disaipol nagamo'za eri'zami'naze.

¹⁷Ana mikomo'za nazageno zamuma hutege'za, meama'a eritru hu'za 12fu'a eka eka kupi eriri'naze.

¹⁸Mago zupa agraku Jisasi'a nunamu nehigeno, amagema nentaza disaipol nagamo'za, tva'onte mani'nazageno anage huno zmantahige'ne, Nagrikura veamo'za iza'e hu'za neheze?

¹⁹Zamagra kenona'a anage hu'za hu'naze, Ti frente Joni'e hu'za mago'amo'za nehazageno, mago'amo'za Ilaija'e nehazageno, mago'amo'a korapa kasnampa ne' frinefinti oti'negahie hu'za nehaze.

²⁰Jisasi'a amanage huno zmantahige'ne. Hianagi tamagra iza'e hutma Nagrikura nehaze? Pita'a ana kenona huno, Kagra Anumzamo hugantegenka (tahoke henka tagu'vazine e'nana) Kraisige.

²¹Hianagi Jisasi'a amana kea mago vahere hutma ozmasmitfa hiho huno hunezmante'no,

²²anage hu'ne, Vahe'mofo mofavremo'a ruzahu ruzahu knazampi unefresigeno, mono kva vahe'mozane, ugagota prisi vahe'mo'zane, kasegere ugota hu'naza vahe'moza, zmefi humiza ahesageno friteno, tagufa knare otigahie.

²³Anante Jisasi'a ana maka'mokizmigu anage huno zmasami'ne, iza'o namage'ma antenaku'ma hanimo'a, agra'agura age'neknino maka knafina keka zafa'a erino navaririgahie.

²⁴Na'ankure iza'o asimu'a eriso'e hu'naku hanimo'a, asimu'a atregahie. Hagi iza'o Nagriku huno asimu'a atresimo'a, asimu'a erigahie.

²⁵Mago vahe'moma ama mopafi zankuke nehuno, agra'a agu'amema atresiana, nankna so'eza erigahie.

²⁶Iza'o nagriku'ene keniagu'ene agazema hunante'simofona, Vahe'mofo Mofavremo'ma Agra'a masa'afine, Nefa masa'afine ruotge ankero vahe zgamofo masafinema esuno'a agrira eme agaze huntegahie.

²⁷Hianagi Nagra tamage hu'na neramasamue, amama otinazafintira, mago'amotma ofrinetma Anumzamofo kumara kegahaze.

²⁸Anagema Jisasima huteno, 8ti'a kna evutegeno, Pitama, Jonima, Jemisima, huno nezamavreno, agonarega nunamu hunaku vu'naze.

²⁹Nunamuma ome nehigeno, avugosamo'a ruzahu higeno, kukena amo'a tusi efe'nentake hu'ne.

³⁰Anantera ame huke tare netre Mose'ene Ilaijakea oti'nene, Jisasi'enena nanekea hu'naze.

³¹Mosese'ma Ilaijama Jisasima hu'za tusi'a masafi mani'ne'za, Jerusale Jisasima friteno otino vaniazamofo nenekea hu'naze.

³²Pita enema mani'naza nagamo'za zmavutoko hige'za mase'naze. Hianagi zamagrama oti'za nege'za, Jisasi'a tusi'a masa'afi tare netrene oti'za mani'nageno zmage'naze.

³³Anante tare netremoke atrene nevakeno, Pita'a anage Jisasinku hu'ne. Kva'nimoka, amare'ma manunana knare hie. Tatregeta tagufa tona nona kimneno, magora Kagriki, magora Mosesenki, magora Ilaijane. Anama hu'nea kemofo agafa'a antahini' osu'neno hu'ne.

³⁴Pitama anagema nehigeno, hampomo tamino refite nezmentegeno, ana hampompi mani'ne'za koro hu'naze.

³⁵Anante mago agerumo hampopinti eno anage hu'ne. Ama'i Nagri Mofavre, Nagra huhampri ante'nomo'e. Hanki ke'amofona antahimiho.

³⁶Ana agerumo'ma kea huvgama retegeno, Jisasi'a Agrake mani'nege'za amagema nentaza disaipol nagamo'za ke'naze. Ana hiazanku zamagra kea eri tagane'za mani'ne'za, ana knafina mago vahere hu'za ke'naza'zana ozmasamitfa hu'naze.

³⁷Nanterana agonaregati eneramizageno, hakare veamo'za eri hantage'za kantega tutagiha hunte'naze.

³⁸Anante ana vahe amu'nompinti mago nemo ranke huno, Rempi hurami ne'moka, keke hugantoanki, magoke ne'mofavre'niagi ko. Na'ankure agra mago mofavre'ni'e!

³⁹Havi avamumo azeri haviza higeno krafa nehigeno, azeri traka hunetregeno, kentu kentu nehigeno, agremo zuzu nehigeno, azeri haviza hutere mago'agnafina hu'ne.

⁴⁰Nagra kamagema nentaza disaipol nagaku keke huzmante'na, havi avamura humegi atreho huanagi, zamagra humegi atregara osu'naze.

⁴¹Jisasi'a kenona huno, tamentinti osutma fatgo osu vahe ama knafina mani'naze. Nama'a knafi tamagranena mani'nena tmagri knazana erigahue? Avrenka negamofona amare eno.

⁴²Ana mofavrema avreno ne-egeno'a havi avamumo azeri traka hutregeno, mopafi maseno kentu kentu hu'ne. Hianagi Jisasi'a ana havi avamu ke nesuno, azeri so'e huno nefa ami'ne.

⁴³Anama hige'za Anumzamofo tusi'a hihamuma nege'za, antri hu'za zmagogogu hu'naze. Anama hu'za mika'mo'za antrima nehu'za zmagogogu nehazageno, Jisasi'a amage'ma nentaza naga'a zmasamine.

⁴⁴Ama tmasamisua nanekea eritma tamaguafi anteho. Vahe'mofo Mofavrea komoru hu'za ha' vahe'mofo zmazampi avre'za antegahaze.

⁴⁵Hianagi ana nanekea zamagritera frakino me'nege'za ana kea antahi amara osazageno, zamagra ana nanekemofo agu'agesa'a antahi ama osu'za, azeri akona osu'naze. Ana nehu'za ana kegura koro hu'za antahi onke'naze.