Luka 5:29-36

²⁹Motong la Liwi iyeie mailang mai atu rumu ki pang Yesu. Ngan le di tooltool alunu ke sodaningi pat tiye di tooltool kapala la tilo tiye di tigaua, inbe tikan so nga.

³⁰Bong di Paresi inbe pannoongoo ke ger ke Maro yo tigaua ye budanga kidi Paresi nga, ngan tikamata Yesu iyei nen, le nga katedi malmal, inbe tipasak pang Yesu di galiunu tina. Tiyei ne, “Ai, nga yelei be kaye di tooltool ke sodaningi pat inbe di tooltool ke yeingi noonoo kagaua a kakan le kayin nga?”

³¹Ngan Yesu iraua betanga kidi nen, “Di tooltool yo tinidi dook mata nga, ngan tool ke bar ke be ipa pang ye di tiap, bong di tooltool la matamatenge ikap di nga.

³²Ngan nanga, au i asi nga be si akiu di tooltool yo noonoodi nga tiap, bong di tooltool yo ke yeingi noonoo nga, a be nen ngan tiportak lodi.”

³³Motong la di tooltool tina titoro Yesu nen, “Ai, amkamata Yowan yo irriu di tooltool in di galiunu, inbe di Paresi lapau galiudi nga, ngan tisapa ye kaningi inbe tipatarau. Bong nga yelei be di galium nga tisapa ye kaningi le yinungu tiap nga?”

³⁴Ngan Yesu iraua torungu kidi nen, “Kumata tamoto atu yo be ikere i, in ikiu di sokana le di tooltool ki be man tiye tiyepe ye kerenge ki nga, ngan yelei, ole tisapa ye kaningi, too tiap? Tiap yege!

³⁵Bong pang dama ni ngan ole di tooltool tikaua tool tani yo be ikere in le iyege di tooltool ki nga, ngan la be ye kene tani ngan ole tisapa ye kaningi nga.”

³⁶Motong la Yesu ikatte betanga san mulu pang di nen, “Tool sa ke be ikaua sousoungu paunu a isarraki be ikap timunu pa a idede sousoungu gurunu gumono ye tiap. Kumata le be iyei nen nga, ngan ole igarungu sousoungu paunu i, inbe sousoungu gurunu tani in o dook tiap lapau, yesoo wam timunu paunu tani yo be idede sousoungu gurunu ye i, in gaongo ye gurunu in tiap.