Luka 14:19-28

¹⁹O dujto phenđa: 'Samo so činđum deše guruven i džava te dikhav sar ka orinen. Molinava tut, vaćer te gospodarese da adalese našti te avav.'

²⁰O trito phenđa: 'Samo so leljum romnja i adalese našti te avav.'

²¹I o sluga irinđa pe hem phenđa sa adava ple gospodarese. Tegani o gospodari xoljanđa i phenđa ple slugase: 'Siđar, ikljov ko droma e dizjakere hem ko trgija i ana akari e čororen, e sakatimen, e kororen hem e bangen.'

²²Ked o sluga ćerđa adava, phenđa: 'Gospodarona, ćerđum ađahar sar so phenđan, ali pana isi thana.'

²³I o gospodari phenđa lese: 'Ikljov avri tari diz ko droma hem ko staze hem terin e manušen te aven te ovel pherdo mlo čher.

²⁴Vaćerava tumenđe da nijekh okole prvone manušendar kolai vičime na ka xal adava so ćerđum xajbnase.'”

²⁵I but manuša džana ine dromeja palo Isus. Ov irinđa pe nakoro lende hem phenđa lenđe:

²⁶“Te neko mangela te ovel mlo učeniko, valjani te volini man but više nego ple dade hem pla daja, pla romnja hem ple čhaven, ple phraljen hem ple phenjen, više nego plo dživdipe. Te na ćerđa ađahar, našti te ovel mlo učeniko.

²⁷Ko na akhari plo krsto hem na džala pala mande, našti te ovel mlo učeniko.

²⁸Adalese so nijekh tumendar na ka lel ine te vazdel kula, a angleder adalestar te na bešel te računini o troško te dikhel ka šaj li te završini la.