Ruki 14:19-28

¹⁹Ro e be fu uri kuae, Naeje na mave-kau none bino fuaevedo na ije kena imega bu mare ro bu iserevoga na ije giake vake. Ijadufuo ni va e ireobo one ije vua ijiege kuarano kuae.

²⁰Areme e be fudua fune kuke urina e ije irobie vaema ije kuae, Naeje na iviama bara abei ijadufuo na vierafe nabe vuakono kuae.

²¹Bu ijiege kuaravoga e ije e ireobo ijadufuo imeno ije fune una va gafia kekena vua buone ijene e fuone ireobo ije kuarae. Areme e ireobo are ije samuamo ije fu vua ije fiemo fuka defarui. Ijadufuo fu urina e fuone imeno ije kuae, E ije na kiaeva bu naebe ruovo ijadufuo ni migegire una va sidove vame ijia oenoekinu e ire baki ijiakina e ae kirariaeva ijiakiro e ni kuzeki ro kuke umui ro dia ufeva ije kiaga bu iro none ige sareke rono kuae.

²²Areme e fuone imeno ije fune una kekena kuae, E ireobo na e ije a kiaema na va kuariae. Na kuariavoga e gue bune ruae rove are kafare fuka uriano kuae.

²³Fu ijiege kuaramoga e ireobo ije fu urina kuae, Ijadufuo ni una va vame ijia oenoekinu e binodua soesoena kiaga bu ruaekina are none fu e uruke zaraene.

²⁴Rove igia fie, e ije na irobie kiavoga bu naebe iro ige sareva ije bube ire none maege ikono kuae.

²⁵Areme ve be e uruvana bu Jesuna vakoga fu uri kiae,

²⁶E be erare fu na nuvediekiro vierafekuma e ije fuka orafa fuone ijiakiro agebara ro uviarafa ro makirafa fuone ije sibaneke oetuake. Fu ijiege re ro uri vajae fuone ije sibaneke oetuagaro na fuka ireobo oetuakuma e ijare fu manido fu na nuvedieke.

²⁷Ro erare fu naebe noefuo isejavaekinu vajae fiane binobino bu fuone ruovo ijia faememarena na nuvediemo e ije fu naebe manido fu na nuvedieke.

²⁸Ro kuke igia fie, E be fu are sakiro vierafekuma e ije fuka ude fina moni fu are sadufuo ije mukoe vierafekinu kanafuidufuo. Areme fu gaga fune manikuma fu vierafero are ije fune sa furikiro fu ijiege vierafeke.