Luke 14:19-28

¹⁹Ma bagayad e ga’ar, ‘Kug chuw’iy lal wu’ i garbaw, ni ere nggu wan gu maruwel ngorad ngug guy; ere wenig ngom, ya dabiyag ni gu ra yib.’

²⁰Ma bagayad e ga’ar, ‘Ka fini gu mabgol, ni ireray fan ndabiyag ni gu ra yib.’

²¹Me sul fare tapigpig nge yan i weliy e pin’ey ni gubin ngak e masta rok. Me ri damumuw fa’anem ni ir e masta ko fare naun me ga’ar ngak fare tapigpig rok, ‘Mu gurnigem ko yu pa’ i kanawo’ ni ba ga’ nge yu pa’ ni ba’achig u lan binaw, ngam non ngak e pi’in gafgow, nge pi’in marwoth, nge pi’in malmit, nge pi’in mugutgut.’

²²De n’uw nap’an me ga’ar fare tapigpig ngak fare masta, ‘Urngin e tin mog e kug rin’, machane ka ba ga’ yang e kabay ni ku ra par boch e girdi’ ngay.’

²³Me ga’ar fare masta ngak fare tapigpig, ‘Mman ko yu pa’ i kanawo’ ni ba’ nga wuru’ e binaw nge noch pa’ i kanawo’ nruw raba’ ma yoror, ngam non ngak e girdi’ riy ngarbad nga naun, nge yag ni sug e naun rog.

²⁴Nggog ngomed ni gimed gubin, ndariy bagayad fa pi’in nni piningrad ko som’on nra ri’ e ggan rog!’”

²⁵Bo’or ni bo’or e girdi’ ni be un ngak Jesus. Me pigicheal nge ga’ar ngorad,

²⁶“En nra yib ngog e dabiyag ni nge mang reb i gachalpeg ni fa’anra dabi m’onegeg rok e chitamngin nge chitiningin, nge leengin nge pifak, nge pi walagen ni pumo’on nge pi walagen ni ppin, ma ku errogon ir.

²⁷En ni dabi yin’ e kuruth rok nga pon nge lekeg e dabiyag ni nge mang gachalpeg.

²⁸Fa’anra ba’ bigimed ni be finey ni nge ngongliy ba wulyang ntafen e damit, ma som’on e ra par nga but’ nge tafinaynag rogon puluwon, nge guy ko ba gaman e salpiy rok nra mu’nag fare maruwel ngay fa danga’.