Luka 12:1-32

¹Kana čidije pe but milja manuša, gači kaj lije te uštaven jekh avere, o Isus angleder golestar lija te vačarol pe sikadenđe: “Aračhen tumen taro kvasaco o farisejsko, so si dujemujengo.

²Golese kaj naj khanči garado so ni ka pučardol, thaj sa so si garado ka šundol angle savorende.

³Golese so si vačardo ki tomina ka šundol ko svetlo, thaj sa so vačarden čorale ane phangle sobe, ke krovura ka šundol!

⁴Al vačarav tumenđe amalalen, ma daran tare kola so šaj mudaren samo o telo, golestar aver khanči našti čeren tumenđe!

⁵Ka vačarav tumenđe kastar te daran. Daran taro Dol savo šaj mudarol thaj čhudol ani jag savi ni ačhol. Va, phenav tumenđe, Lestar daran!

⁶Ni li bičhindon panđ čiriklja paše duj pare? Thaj nijekha ni zabistrol o Dol.

⁷A tumenđe i tumare bala ko šoro si đinde. Golese ma daran. Tumen sen po vredna tare pherdo čiriklja.

⁸Gija vačarav tumenđe: “Savo kate ki phuv priznail kaj preperol manđe, le me, o Čhavo e Manušeso angle melekura ka priznajiv kaj vov pripadil manđe.

⁹A savo man čhudol ke kaja phuv me lestar ka odreknima angle Devlese melekura.

¹⁰Thaj savo vačarol protiv mande, protiv o Čhavo e Manušeso ka oprostilpe lese, a savo vačarol bilačhe taro Sveti Dux ni ka oprostilpe lese.

¹¹Thaj kana ka anen tumen anglo sudo ke sinagoge thaj angle šorutne, thaj anglo vlast ma daran sar thaj so ka vačaren il so ka phenen.

¹²Golese kaj ka sikavol tumen o Dux Sveti ane gova časo so trubul te vačaren.”

¹³Vačarda e Isuse neko tare manuša: “Učitelju, vačar me phralese te ulavol mancar okova so ačhada amenđe amaro dad.”

¹⁴Thaj o Isus vačarda lese: “Manuša, ko man čuta sudija il delioc pe tumende?”

¹⁵Thaj vačarda savorenđe o Isus: “Dičhen thaj aračhen tumen tari pohlepa. I sa gači barvalipe te avol manuše, leso đuvdipe ni avol golestar so isi le.”

¹⁶Thaj o Isus vačarda lenđe jekh paramič: “Nesave barvale manušesi phuv bijanda but bijandipe.

¹⁷'Thaj dija gođi ane peste vačarindoj: 'So ka čerav? Naj ane soste te čidav e milajeso čidipe.

¹⁸Thaj vačarda: 'Đanav! Ak kava ka čerav! Ka rumiv me thana taro điv thaj ka čerav pobare, thaj gothe ka čidav mo điv thaj sa mo šukaripe.

¹⁹Thaj ka vačarav korkoro manđe kaj isi man baro barvalipe bute beršenđe. Ka šaj odmoriv, ka hav, ka pijav, ka veseli man!'

²⁰A o Dol lese vačarda: 'Bigođaleja! Kaja rat ka lav ćo ođi tutar. Thaj kase ka ačhol sa gova so čerdan buči?'

²¹Gija si kolesa savo čidol pese barvalipe ki phuv, a ni čidol barvalipe savo si šukar e Devlese ane jakha.”

²²A o Isus pe sikadenđe phenda: “Golese vačarav tumenđe: Ma daran za sa e đivesa tumare dal ka avol tumen so te xan, ni tumare telose so ka uraven!

²³Golese kaj si o đuvdipe po but taro hape thaj tumaro telo po but taro urajipe.

²⁴Dičhen e gavranen! Sar ni sejin, ni ti čhiden, save naj len niti podrumo ni kaj čhuven o điv, thaj o Dol parvarol len, a kozom sen tumen po vredna lendar?

²⁵A šaj li neko tumendar golesa so brinilpe barol leso đuvdipe za jekh đive?

²⁶Kana našti ni gova zala te čeren, sose brinin tumen zako sa aver?

²⁷Dičhen e luluđa ki livada sar baron! Ni čeren buči, niti suven pese šeja, a me phenav tumenđe kaj ni o caro o Solomon ani pire barvale šeja naj sasa urado sar jekh lendar.

²⁸A ako o Dol dol e čaraće gija lače šeja ko polje, savi si avđive, a theara čhudolpe ani jag, dal ni ka brinilpe tumenđe vađi pobut? Sose gači zala pačan?

²⁹A tumen ma brinin tumen isi tumen li so te xan il so te pijen. Ma daran golese!

³⁰Gija čeren e manuša save ni đanen e Devlese ke kava sveto. Tumaro Dad ano nebo đanol kaj sa gova trubul tumenđe.

³¹Nego roden o carstvo e Devleso, thaj aver ka dodol pe tumenđe.

³²Ma daran, me cikne bakre! Tumaro Dad gova manglja te dol tumen te aven ano carstvo.