Lucas 12:1-32

¹Pues nacpat era cay umorojse ubꞌobꞌ meyra sian gente tut e Jesús este que machix utajwiobꞌ tiaꞌ tuaꞌ awawanobꞌ. Entonces bꞌajxan e Jesús cay ojron taca uyajcanuarobꞌ y che: —Iwiric tuaꞌ machi ixmajresna umen e ucanseyajobꞌ e fariseobꞌ, porque jaxirobꞌ war uyareobꞌ e gente que ucꞌani tuaꞌ uchiobꞌ lo que machi war uchiobꞌ jaxirobꞌ.

²Porque tunor lo que achempa mucur ucꞌani tuaꞌ achecsuna tut e gente, y tunor lo que unata inteꞌ xeꞌ mucur ucꞌani tuaꞌ achectesna.

³Y tamar era tunor lo que war iware tama e incsibꞌaner xeꞌ mabꞌambꞌan ucꞌani tuaꞌ oꞌbꞌna tama e janchꞌaquenar tama e día, y lo que iware tzꞌustaca macuir iyotot, ucꞌani tuaꞌ aꞌrobꞌna taca inteꞌ nuxi nuc patir este que uyubꞌiobꞌ tunor ipiarobꞌ, che e Jesús.

⁴Pues entonces sutpa ojron e Jesús taca e sian gente era y che: —Nen cꞌani inwareox nox xeꞌ intzay inwirox que ira ibꞌacre tin e ajrer icuerpo erer uchamse, pero de allí matucꞌa más tuaꞌ uche.

⁵Pero cꞌani inwareox era chi xeꞌ ucꞌani tuaꞌ ibꞌacre xeꞌ jax e Dios. Porque jaxir erer uchamse inteꞌ y de allí ayan ucꞌotorer tuaꞌ uyari uyalma inteꞌ tama e cꞌajc ubꞌan. Jaxir ayan ucꞌotorer cocha era y jax ixto tuaꞌ ibꞌacre yaꞌ.

⁶Tama e mercado achojna cinco ut mut tama chateꞌ centavo, pero cꞌani inwareox era que nien incojt mut cocha era machi anajpesna umen e Dios.

⁷Y nox este tunor utzutzer ijor tzicbꞌir umen e Dios tuaꞌ unata jayteꞌ ayan. Ira ixbꞌacta, porque más nojta icꞌampibꞌir nox tut e Dios que e sian mut era, che e Jesús.

⁸Entonces ojron e Jesús y che: —Cꞌani inwareox era que tunorox xeꞌ ixixin ichecsu tut e gente y che: “Nen inchꞌamix ucꞌabꞌa Niwinquirar”, que nen ubꞌan xeꞌ Uyunenen e winic cꞌani inxin inware tunor e angelobꞌ tuaꞌ e Dios tichan que nox ichꞌamix nicꞌabꞌa.

⁹Y tunorox xeꞌ ixixin imuqui nicꞌabꞌa tut e gente tara tor e rum, nen ubꞌan cꞌani inxin inmuqui icꞌabꞌa tut e angelobꞌ tuaꞌ e Dios tichan que machi innata chiox nox.

¹⁰’Y jay ayan tin e axin oꞌjron upater Uyunen e winic ererto acꞌumpa e Dios taca inteꞌ cocha era, pero jay inteꞌ axin uqꞌuijnes Unawalir e Dios ma cocha erer tuaꞌ acꞌumpa e Dios tacar.

¹¹’Y jay acꞌotoy e día conda ixqꞌuejcha ixixin tut inteꞌ sacerdote tama inteꞌ sinagoga tuaꞌ utuchꞌiox o jay ixqꞌuejcha ixixin tut inteꞌ juez o tut otronteꞌ ajcꞌampar tuaꞌ utuchꞌiox, ira ibꞌijnu cocha tuaꞌ icorpes ibꞌa o tucꞌa tuaꞌ iware

¹²porque conda acꞌotoy e hora tuaꞌ ixojron, wacchetaca watar Unawalir e Dios tuaꞌ ucansiox tucꞌa tuaꞌ iware tuaꞌ icorpes ibꞌa, che e Jesús.

¹³Pues ayan inteꞌ winic tujam e gente xeꞌ cay ojron taca e Jesús y che: —Niwinquiraret, aren nisacun tuaꞌ uyajqꞌuen lo que aquetpa tuaꞌ inchꞌami tamar lo que uyacta nitata, che e winic era.

¹⁴Y che e Jesús: —¿Chi war uyajqꞌuen nen e patnar tuaꞌ inquetpa tijor nox tuaꞌ inxere inwajqꞌuet lo que uyacta itata? che e Jesús.

¹⁵Y e Jesús uyare tunor e gente y che: —Iwiric tuaꞌ machi iwacta ajni ijor tama e tumin tuaꞌ machi iche e mabꞌambꞌanir tut e Dios, porque majax tamar taca lo que ayan ticabꞌach tara tor e rum que bꞌixiron, che e Jesús.

¹⁶Entonces e Jesús cay uchecsu inteꞌ ojroner tut e gente y che: —Tama inyajr ayan inteꞌ winic xeꞌ ayan meyra utumin y meyra urum xeꞌ locꞌoy meyra ucosecha tamar.

¹⁷Y cay ubꞌijnu jax taca y che: “¿Tucꞌa tuaꞌ inche taca tunor e sian cosecha lo que cay inlocse porque machi atzꞌacta nigranero tuaꞌ imbꞌutꞌi tunor nicosecha era?” che e winic era jax taca.

¹⁸Y che jaxir: “Pero nen innata ixto yaꞌ tucꞌa ucꞌani tuaꞌ inche era: Cꞌani incucru e otot era tiaꞌ war incojco nicosecha tuaꞌ insutpa inche inteꞌ xeꞌ más nojta tuaꞌ uwajpi tunor nicosecha y tunor lo que ayan tanibꞌa”, che e winic era jax taca.

¹⁹Y de allí sutpa ojron otronyajr jax taca y che: “Nen ayan nitumin, ayan ninar, ayan nibꞌur, y ayan e sian wacax tanibꞌa.” Entonces upejca ubꞌa jax taca y che: “Jirien, wen, uchꞌen, tzayen”, che e winic jax taca.

²⁰Pero tama e momento era e Dios upejca e winic era y che: “Net matucꞌa anata. Net tuaꞌ ichamay tama e acbꞌar era. Y lo que tꞌabꞌesbꞌir amener ¿chi tacar tuaꞌ aquetpa coner?” che e Dios.

²¹Y bꞌan ixto cocha era e winicobꞌ xeꞌ war ubꞌorojsiobꞌ e sian tumin tuaꞌ taca usatiobꞌ tamar lo que ucꞌaniobꞌ, pero tut e Dios tzajtaca utobꞌ e winicobꞌ cocha era, che e Jesús.

²²Pues entonces cay ojron e Jesús taca uyajcanuarobꞌ y che: —Cꞌani inwareox era que ira ibꞌijnu y che: ‘¿Tucꞌa tuaꞌ cacꞌuxi era?’ Y ira ibꞌijnu y che: “¿Tucꞌa tuaꞌ calapi non?”

²³Porque más atujri icuxtar tara tor e rum que lo que war ixweꞌ, y más atujri icuerpo que lo que war ilapi.

²⁴Bꞌijnunic tama e mut porque machi war apatna, y matucꞌa war umorojse tuaꞌ ucꞌuxi, y matucꞌa ugranero tiaꞌ macar ucosecha tamar, pero machi war aytzꞌa porque war awesena umen e Dios. ¿Y machi ca más ixtujri nox tut e Dios que cora mut?

²⁵¿Y chi tijam nox, umen taca que war ubꞌijnu meyra tama ujor erer abꞌitzꞌa uyoc más nojta nien imbꞌijc tuaꞌ aquetpa más nojta?

²⁶Y jay machi uyubꞌiox iche lo que chuchu cocha era, ¿tucꞌa tuaꞌ war ibꞌijnu tamar lo que más nojta cocha era que: “Matucꞌa tuaꞌ incꞌuxi”, y que: “Matucꞌa tuaꞌ inlapi?”

²⁷’Bꞌijnunic tama unichir e cꞌopot que machi apatna y nien machi aꞌrma, pero cꞌani inwareox era que nien e rey Salomón xeꞌ turuan tama e onian tiempo, motor que meyra usati utumin tama ubꞌujc xeꞌ galan uwirnar, pero nien jaxir majax bꞌan cocha inteꞌ unichir cꞌopot xeꞌ más galan uwirnar porque bꞌujcsebꞌir umen e Dios.

²⁸Entonces jay e Dios war ubꞌujcse unichir e cꞌopot cocha era xeꞌ coner chꞌur y xeꞌ ejcꞌar tama e cꞌajc chꞌar, y ¿machi ca tuaꞌ ubꞌujcsiox nox ubꞌan e Dios motor que imbꞌijc taca war ixcꞌupseyan tamar?

²⁹Y tamar era ira ibꞌijnu tama ijor que: “¿Tucꞌa tuaꞌ incꞌuxi?” y “¿tucꞌa tuaꞌ unchꞌi?”

³⁰Porque bꞌan war ubꞌijnuobꞌ tunor e gente tara tor e rum, pero nox ayan inteꞌ xeꞌ war unata tucꞌa icꞌani xeꞌ jax Catata Dios xeꞌ turu tichan.

³¹Pero nox turbꞌanic ibꞌa tuaꞌ ixochoy tama uchinam e Dios, y cꞌani ixajcꞌuna tunor era ubꞌan, che e Jesús.

³²Entonces ojron e Jesús y che: —Ira ixbꞌacta, porque motor que majax meyrox xeꞌ turox tara pero Catata Dios cꞌani atzay uyajcꞌox inteꞌ nuxi lugar tiaꞌ tuaꞌ ixcꞌotori tacar jaxir.