LUKA 11:27-52

²⁷Unai hereva ia gwauraia neganai, hahine ta taunimanima momo edia huanai Iesu dekenai ia hereva, ia hereva badabada, ia gwau, “Oi ia havaraia, bona oi dekenai rata ia henia hahine be mai moale bada.”

²⁸To Iesu ia gwau, “Gau badana momokani be inai, Dirava ena hereva idia kamonaia bona idia badinaia taudia be idia moale bada.”

²⁹Taunimanima momo ma Iesu dekenai idia haboua, vadaeni idia dekenai ia hereva, ia gwau, “Inai nega taunimanima be dikadia, toa idia tahua, to toa ta idia dekenai do ia hedinaraia lasi, Iona, peroveta tauna, ena toana sibona vadaeni.

³⁰Iona be toa ta Nineva taudia edia vairana dekenai, vadaeni unai bamona dala hegeregerena, Taunimanima ena Natuna be toa dekenai do ia lao, inai nega taudia edia vairana dekenai.

³¹Dirava ena Kota Badana neganai, diho kahana dekena amo kwini ese inai nega taudia danu do idia gini hebou, do ia samania idia dekenai. Badina ia be tanobada ena dokona dekena amo Solomona ena aonega hereva dekenai kamonaia totona ia mai. To iniseni tau ta ese Solomona ia hereaia.

³²Dirava ena Kota Badana dinana dekenai danu Nineva taudia be inai nega taudia danu do idia gini hebou, do idia samania idia dekenai. Badina be Iona ena haroro dainai, idia edia lalona idia giroa, to iniseni tau ta ese Iona ia hereaia momokani!”

³³“Tau ta ese lamepa ia gabua neganai, ruma henunai do ia atoa lasi, o disi dekena amo do ia koua lasi, to lamepa ena pata dekenai do ia atoa, vadaeni do idia raka vareai taudia ese ena diari do idia itaia.

³⁴Tauanina ena lamepa be matana. Unai dainai bema emu matana do ia namo, emu tauanina ibounai do ia diari. To emu matana bema ia dika, emu tauanina ibounai do ia dibura.

³⁵Unai dainai, do oi naria namonamo, diari oiemu lalona dekenai ia noho be do ia dibura garina.

³⁶Bema oiemu tauanina ibounai ia diari, bona dibura sisina be kahana ta dekenai ia noho lasi neganai, oiemu tauanina bona lalona ibounai be do ia diari momokani, lamepa ena diaridiari ese oi ia hadiaria hegeregerena.”

³⁷Iesu ena hereva ia ore, vadaeni Farisea tauna ta ese ia boiboi ia dekenai, ia danu do idia aniani hebou. Vadaeni ena ruma dekenai ia daekau, aniani gabuna dekenai ia helai diho.

³⁸To Farisea tauna ese Iesu ia itaia, bona ia hoa, badina ia be iena imana ia huria guna lasi.

³⁹Vadaeni Lohiabada ese ia hereva henia, ia gwau, “Umui Farisea taudia be kapusi bona disi edia murina kahana sibona umui huria namonamo, to emui lalona dekenai be dadia kara bona kerere havaraia kara ia honu momokani.

⁴⁰Kavakava taudia e, Dirava ese murina kahana ia karaia be ia ese lalona kahana ia karaia lasi, a?

⁴¹To emui kapusi bona mereki lalonai gaudia be ogogami taudia dekenai do umui harihari henia, vadaeni gau ibounai umui dekenai be do idia goeva.

⁴²“To Farisea taudia e, madi umui be dika. Badina be aniani ava maragimaragi ibounai dekena amo karoa be 10 umui karaia, karoa ta be harihari gauna dekenai umui halaoa, to kara namo bona Dirava dekenai ura henia be umui badinaia lasi. Unai karoa ta, karoa 10 dekena amo, ena taravatu umui badinaia be namo, to namo lasi maoro karadia bona lalokau karadia umui rakatania.

⁴³“Farisea taudia e, madi umui be dika. Badina be umui ura dubu dekenai helai gaudia namo herea dekenai umui helai, umui ura danu taunimanima haboua gabudia dekenai taunimanima ese do idia hanamoa umui.

⁴⁴Madi umui be dika. Umui be mase guria gabu gunadia, hunia gaudia bamona, taunimanima ese edia latanai idia raka, bona miro idia abia, idia diba lasi inai be guria gabudia dainai.”

⁴⁵Taravatu hadibaia tauna ta ese ia haere ia dekenai, ia gwau, “Hadibaia tauna e, oi ese unai bamona oi hereva, be ai dekenai danu oi hadikaia inai.”

⁴⁶Iesu ia gwau, “Umui danu, taravatu taudia, madi umui be dika. Badina umui ese gau metauna taunimanima edia latanai umui atoa, to emui imana kwakikwakina ta dekena amo unai gau metauna dekenai durua umui henia lasi.

⁴⁷Madi umui be dika. Badina be emui sene taudia ese peroveta taudia idia alaia mase, to umui ese edia guria gabuna umui haginia.

⁴⁸Unai umui karaia dainai, umui ese emui sene taudia edia kara dika umui gwauraia hedinarai, bona inai kara umui abia dae danu. Badina be idia ese peroveta taudia idia alaia, bona umui ese edia guria gabudia umui haginia.

⁴⁹“Unai dainai Dirava ese iena aonega dekenai ia hereva vadaeni, ia gwau, ‘Lau ese peroveta taudia bona aposetolo taudia do lau siaia lao, vadaeni haida do idia alaia mase, ma haida do idia dagedage henia.’

⁵⁰Unai dainai peroveta taudia ibounai edia rarana idia habubua vadaeni, tanobada hamatamaia dekena amo, unai kerere be inai hari nega taudia edia latanai.

⁵¹Oibe, lau hamaoroa umui dekenai, Abela ena rarana ia bubua ia mai bona Sekaraia ena rarana idia bubua, ia be pata helagana bona Dubu Helaga edia huanai idia alaia mase, inai ibounai ena kerere be inai nega taudia edia latanai.

⁵²“Taravatu hadibaia taudia, madi umui be dika. Badina be aonega ena ki umui abia siri vadaeni. Umui be umui raka vareai lasi, bona raka vareai ura taudia edia dala umui koua.”