Luka 11:27-52

²⁷I sar o Isus vaćeri ine adava, nesavi đuvli oto narodo vičinđa: “Bahtali i đuvli koja akharđa tut ano vođi hem dinđa tut čuči!

²⁸A o Isus phenđa: “Po bahtalei okola so šunena o lafi e Devlesoro hem ćerena le!”

²⁹Sar čedela pe ine po baro narodo, o Isus lelja te vaćeri: “O manuša kola živinena ano akava vreme, oni bišukar manuša. Rodena mandar znako, ali znako na ka del pe lenđe sem o čudesija so ćerde pe e Jonase.

³⁰Sar so adava so ulo e Jonase inele znako e manušenđe kola živinde ki diz Niniva da o Devel bičhalđa le, ađahar hem so ka ovel maje, e Čhavese e Manušeserese, ka ovel znako e manušenđe kola živinena avdive da o Devel bičhalđa man.

³¹Ko dive ked ka ovel e Devlesoro sudo, i carica koja angleder vladinđa ki južno phuv ka uštel hem ka osudini e manušen kola akana živinena adalese so ali taro krajevija e phuvjakere te šunel e caro e Solomone kova inele but mudro, a akatei tumencar po baro e Solomonestar, a tumen na mangena te šunen!

³²Ko dive ked ka ovel e Devlesoro sudo, o manuša kola živinde ani purani diz Niniva ka ušten hem ka osudinen e manušen kola akana živinena adalese so on pokajinde pe ked o Jona propovedinđa, a akatei tumencar po baro e Jonastar, a tumen pana na pokajinđen tumen!”

³³“Niko na tharela i svetiljka i te čhivel la ko garavdo than ili talo čaro, nego čhivela la ko than zaki svetiljka te šaj dikhen o svetlost okola kola đerdinena.

³⁴Ti jakhi sar svetiljka te telose. Kedi ti jakh šukar, sai to telo osvetlime. A kedi ti jakh bišukar, hem to teloi ani tomina.

³⁵Adalese pazin da o svetlost so mislineja dai ana tute nane tomina.

³⁶Tei sa to telo pherdo oto svetlost, bizo jekh kotor oti tomina, tegani sa to dživdipe ka ovel osvetlime sar ked i svetiljka osvetlini tut.”

³⁷Ked o Isus vaćerđa adava, nesavo fariseji vičinđa le te xal maro koro leste. I o Isus đerdinđa lese ko čher hem čhivđa pe uzalo astali.

³⁸A o fariseji dikhindoj adava, čudinđa pe so o Isus na thovđa ple vasta angleder o xajba, palo adeti e jevrejengoro.

³⁹A o Gospod o Isus phenđa lese: “Oja, tumen o fariseja kosena i šolja hem o čaro od avrijal, a pherđen len tumara pohlepaja hem bišukaripnaja.

⁴⁰Hulavonalen! Nane li o Devel okova kova ćerđa e manuše, kova džanel le hem od avrijal hem od andral?

⁴¹Akavai pošukar: den e čororenđe sar milostinja okova so isi tumen, so xalane ićerena ano šolje hem ano čare, i ka oven čista hem od andral hem od avrijal.

⁴²Ali jao tumenđe e farisejenđe so dena e Devlese dešto kotor oto začinja hem oto sa o povrće, a na marinena te ćeren averenđe okova soi pošteno hem te mangen e Devle. Valjani te den o dešto kotor, ali na troman te bistren te ćeren adava soi po bitno.

⁴³Jao tumenđe e farisejenđe so volinena te bešen ko anglune thana ano sinagoge hem so volinena ked o manuša, pherde poštujiba premala tumende, pozdravinena tumen ko trgija.

⁴⁴Jao tumenđe adalese so injen opasnost sar soi o bioznačime grobija upra savende o manuša phirena, a na džanen.”

⁴⁵Tegani nesavo oto učitelja e Mojsijasere zakonestar phenđa e Isusese: “Učitelju, hem amen vređineja adale lafonencar.”

⁴⁶A o Isus phenđa: “Jao hem tumenđe, učiteljalen e Mojsijasere zakonestar! Čhivena upro manuša pharipe but pharo te akharen ađahar so dena len pravilja save našti te ićeren, a ni najeja na mangena te mrdinen te pomožinen lenđe te akharen adava pharipe.

⁴⁷Jao tumenđe, adalese so vazdena spomenici e prorokonenđe kolen tumare pradada mudarde.

⁴⁸Adaleja mothovena da odobrinena adava so ćerde tumare pradada: on mudarde len, a tumen vazdena lenđe spomenici.

⁴⁹Adalese o Devel mudro vaćerđa tumendar: 'Ka bičhalav lenđe prorokonen hem apostolen. Nekas olendar ka mudaren, a nekas ka jurinen.'

⁵⁰Akala generacijatar ka rodel pe o rat sa e prorokonengoro savo thavdinđa pana taro ćeriba e phuvjakoro,

⁵¹pana taro rat e Aveljesoro sa đi o rat e Zaharijasoro, kova inele mudardo maškaro žrtveniko hem i svetinja ano Hram. Oja, vaćerava tumenđe, akaja generacija ka ovel osudime zako adava rat so thavdinđa!”

⁵²Jao tumenđe, učiteljalen e Mojsijasere zakonestar! Adalese so e narodostar garavđen o ključo oto džandipe e Devlesere carstvostar. Korkore na đerdinđen maškaro adava udar hem na mukljen te đerdinen ni okola kola mangle te đerdinen.”