LUKA 10:18-39

¹⁸Bena ia ese e hamaorodia, elo, Lau ese Satana na itaia, kevaru na heto, guba amo e moru.

¹⁹Lau eto siahu na henimuimu, gaigai bona doadoa ba moi tao, bona inai tauna ena siahu idoinai danu ba moia tao; bona ḡau ta ese basine hadikamui.

²⁰Ḡau tamona, lauma dikadia ese e kamonai henimuimu na basio moaleIaia; a ina hari ba moalelaia: ladamui na guba ai vada e tore.

²¹Una negana ai Iesu na Lauma Helaḡa bagunai e hisi dae, eto, Tamagu e, guba bona tanobada Lohiana, na hanamomumu, badina be ini ḡau aonega taudia bona lalo-parara taudia edia amo vada o huni, a memero karukarudia ediai vada o hahedinarai. Momokani, Tamagu e, badina be emu lalo-hadai namona benai.

²²Ḡau iboudiai na Tamagu ese vada e henigu: tau na Natuna asi dibana, Tamana mo sibona; bona tau ta Tamana asi dibana, Natuna mo sibona, bona Natuna e uramu baine hahedinarai henia tauna.

²³Bena e roha kerehai, ena hahediba mo sibodia e hereva henidia, eto, Ini ḡau o itamu taumui matamui na vada nanamo;

²⁴badina be peroveta taudia bona hanua pavapavadia hutuma e urava umui o itamu ḡaudia bema ita, to asie itava, bona umui o kamonaimu herevadia bema kamonai, to asie kamonaiva.

²⁵Bena taravatu tauna ta e tore isi, ia e dibaḡania, eto, Hahediba taumu e, ede baina kara toma mauri hanaihanai iabina?

²⁶Iesu eto, Taravatu bukana lalonai ede e torea toma? Ede o duahia toma?

²⁷Ia e haere, eto, Lohiabada emu Dirava ba lalokau henia mai lalomu idoinai, mai laumamu idoinai, mai goadamu idoinai, mai daramu idoinai; bona, Dekemu tauna ba lalokau henia, sibomu o helalokaumu heḡereḡerena.

²⁸Iesu eto, Emu haere na maoro; unu ba kara toma be ba mauri.

²⁹A ia be sibona e hekikwo, bena ma e henanadai, eto, Lau dekegu tauna be daika?

³⁰Iesu ma e haere, eto, Tau ta Ierusalem amo Ieriko e laova ai na dadidadi taudia haida ese e davaria; bena ena dabua e dadihai, e dadabaia, mokona e mase, bena e rakatania.

³¹Hahelaḡa tauna ta ena laolao una dala amo ela; hari tau e itaia, to e rakaia hanai.

³²Levi oreana tauna ta danu unuheto, una gabu ai e kau, e itaia, to ma e rakaia hanai.

³³A Samaria tauna ta ena laolao ai ienai e kau, e itaia; bena e bogaia hisi,

³⁴dekena ela, dehoro bona vine ranuna amo berona e dairi, e kumi; bena ena doniki ai e hahelaia kau, henitao rumana e laohaia, unuseni ai e reḡua.

³⁵Daba ai e tore isi, silver monidia rua e vai, ruma biaguna e henia, eto, Ba naria namonamo, a imaluu ienai baine doa, baina lou mai negana ai davadia baina henimu.

³⁶Oi dahaka o tomamu? Idia tatoiosi daika be hari dadidadi taudia ese e haberoa tauna dekena tauna aita gwauraia?

³⁷Ia eto, E bogaia hisi tauna. Bena Iesu eto, Aola, oi danu unu ma ba ha kara toma.

³⁸Edia laolao ai hanua ta ai e kau, unuseni ai hahine ta, ladana Mareta, ese e abia dae ena ruma ai.

³⁹Ia na mai tadina, ladana Maria; bena hari Maria ela, Lohiabada aena badinai e helai, ena hereva e kamonai.