San Lujc 10:18-39

¹⁸Abiꞌ rëb Jesús loj reeman: ―Waliquidi, naj baguia, ziꞌczi rëꞌp nijs basëëb xguialrniabee xindxab.

¹⁹Naj banee lëjt guialrniabee din gulëëdi guijc ree bëël në guijc ree nixüb, në par güündi gan loj xguialrniabee xindxab sin guial güünx lëjt xhienin.

²⁰Per ad rabaadi guial ruzoob ree xindxab guin xtiidxidi, gol babaa guial ca lajdi loj libr yuꞌ xanyabaa.

²¹Loj hor ziigajc babaa daꞌt Jesús por xSprijt Dios, abiꞌ rëbaman: ―Ruzatan lüj zagdxe, Dad, lüj rniabee xanyabaa në loj guidxliuj, din ni baquieꞌchil loj ree bén rajc në loj ree bén rigniaꞌ, laan ma balüül loj ree bén ad rajczaꞌct. Zian gojcan Dad, din zian guyënl.

²²’Da Dadan banee gra lon. Abiꞌ achut nünbee Jesucrist Xiꞌn Dios, tijbzi Dios, achu tëët nünbee Dios, tijbzi Jesucrist xiꞌnman con ree bén rënman güünbee Dios.

²³Dxel baguiaaman loj ree xbejnman, abiꞌ rëbaman lojzi reeman: ―Xiquilbaa ree bén guguiaa ni cuguiaadi.

²⁴Din naj rni lojdi, zien ree bén badëë xtiidx Dios loj ree bejn në ree rey guyën nuguiaa ni cuguiaadi, per ad baguiaat reeman laan. Guyën reeman nucaagdiajg reeman ni cucaagdiajguidi, per ad bacaagdiajgt reeman laan.

²⁵Tijb mextr rajc ley guzuliman guneenëman Jesús. Abiꞌ din güünman laaman prueb, gunabdiidxaman lojman rëbaman: ―Mextr, ¿xhie rayal günan din gaꞌpan guialnaban tiblayaa con Dios?

²⁶Badxiꞌ Jesús laan rëbaman: ―¿Xhie ca loj ley badëë Dios loj Moisejs? ¿Xhienaag rigniaꞌlan?

²⁷Abiꞌ rëb mextr guin: ―“Guyën xDadil Dios guidib guijc guidib ladxil guyën tëë ben ren ziꞌc rën lüj gajc.”

²⁸Badxiꞌ Jesús laan, rëbaman: ―Zagdxequi badxiꞌlan. Bal güünl zian zajpil guialnaban tiblayaa con Dios.

²⁹Per guyën mextr guin nayaꞌnman zagdxe, gunabdiidxaman loj Jesús, rëbaman: ―¿Chu bénan guiënan ziꞌc rën naj gajc?

³⁰Dxel be Jesús tijb cwent lojman, rëbaman: ―Tijb bén Israel briiman Jerusalén zëman guiedx Jericó. Abiꞌ gunaaz ree xingubaan laaman, gudijn reex laaman gulan tëë reex gra ni caꞌman xt në xabaman, basaꞌn reex laaman ma güjtczaman.

³¹Dxel gudëd tijb bixhioz niz yagaj, per chi baguiaaman bén guin, zijt bicaaman volt, zëtaman.

³²Në tijb bén Levita bén rüjn yudar bixhioz ree, gudëd niz yagaj, chi baguiaaman bén guin, zijt bicaaman volt, zëtaman.

³³Per tijb bén Samaria gudëd niz yagaj, chi baguiaaman bén guin, bayaman laaman,

³⁴dxel gubigaman lod nagaꞌman, badxeꞌman sejt con vin lod nadxeelguijdxaman dxel guxhiiman laan con lajd. Zianz badxiibaman laaman xburaman binëman laaman lënü lod rayaꞌn ree bejn. Yagaj gunajman laaman.

³⁵Chi bareguiaal, chi ma yaguiaj bén Samaria guin, gulëëman milia xieen tioꞌp dxej dxiin badëëman laan loj bén na̱j lidxan, rëbaman lojman: “Gunaj bén guie, bal gunijtil mazri, naj yaguix laan chi yayeꞌcan.”

³⁶Dxel rëb Jesús loj mextr guin: ―Yan, loj guiyon ree bén guin, ¿chu bénan guyën bén gudin ree xingubaan guin?

³⁷Badxiꞌ mextr guinan rëbaman: ―Bén baya laaman. Dxel rëb Jesús lojman: ―Baguiaj, been ziangajc con ben ren.

³⁸Basnuu Jesús zëman abiꞌ bidxinman tijb guiedxdoo, yagaj wejman lidx tijb biin la Mart.

³⁹Yuꞌ tijb xbëlim lam Li. Gurej Li guin guiaꞌ Jesús cucaagdiajguim ni caneeman.