25Ara musano i kis sapat o Jerusalem a risano o Simion, a tene tokodos ma a tene urur kai torom o God. I ser kis langlang sur o God in ulaun a taro Israel, ma a Tokodos na Nion i kis uni.
26A Tokodos na Nion i sa upuaso tari toromi lena ken mat lakit, tuk ut ra in tama tar a Karisito anun a Labino.
27A Tokodos na Nion i mugu i sur in ruk unin noworo na rumu na etabor. Ra i tama pas der suano der wanpat nama nat, o Iesu, sur der in pitar tari torom a Labino, elar nami ra di sa tumus tari una Warkurai.
28O Simion i los pas o Iesu nama ru lamano, ra i watung wakak torom o God lenri,
29“Labino, uniri un ulangolango ru iau, anum a tultul, sur an nan nama malmal, elar ut nama num a liliman torom iau.
30A sa tama tar a Tene Ulaun namin matang, a Tene Ulaun ra u tulu ru i.
31U sa waninar tari umatan a kum kabotaro rop.
32I a talapor sur in utalapor anum a kisapi torom det ra awu sur a taro Israel, ma sur a minamar torom anum a taro Israel.”
33O tamano ma o nano der kisin doko una kum wasiso ra o Simion i watungi un o Iesu.
34O Simion i watung udan detul, ra i watungi tan o Maria, o nan o Iesu, lena, “Tama i, a nat ri, o God i pilok pasi sur a susut na te Israel det in iru uni, ma a susut kai det in laun uni, ma sur a ukinalong ra a susut na taro det in rosumur gusuni.
35Ra det in rosumur gusuni, in upuaso a kum nuknuk tagun a balandet. Ma ui, a tupunuk ra un taramo i in elar namin totok na inaim ra in so anum a nilaun.”
36Ara ino bulung, a poropet, a risano o Ana, a nutun o Panuel, tagun a kabotaro Aser. I sa takano laulau, i sa tiwal na noino ma wat na kilalo anunu ma i ula mukut. Der nolin pas kut a wonom mawit na kilalo, ra numur anun a musano i mat. A ino ri ke wan taru gusun a rumu na etabor, i ser lotu una kum mirum ma a waspi, i ser wewel ma i ser wararing.
Luk 2
Luk 2:25-36