San Lucas 2:25-36

²⁵Mane mɨri. Maza ampune, Simeón munmikane, Jerusalén pɨpulura uzta. Usne nil uz kit Diosta paikwara. Usne Dios nɨrɨtmika amtu payu tɨrizta, us Israel awaruza kiwainnanakima. Diospa Sɨnam Izpulne ussa piz kit

²⁶sunpa ussa piankamninta. Ussa kaizta: “Irachasmin, nune Cristora, Anpat ɨnintumikasha, iztɨnazi,” kizta.

²⁷Diospa Izpulne Simeónta Diospa yalta ɨninta. Kwiztane, Jesúspa papihshkas akkuhshkas Jesústa Simeón tukin karailta. Uspane Moisés ɨninta aizpa kishiailta.

²⁸Simeónne ussa sap kit mut kit “Diosne kwisha wari,” kiz kit kaizta:

²⁹“Ap Anpatne, nune nawa kin namta aizpa kirɨt. Mane nane, up kiwainmumikane, kalpain irɨnash,

³⁰na ap kasukasain up watsat mɨlmumikasha iztɨt akwa.

³¹Nune ussa watsarɨt mɨj, wan awa ussa izanapa.

³²Usne Judío awachiruza kiwainnanazi, Diosta piankamanapa. Israel awaruzne us akwa wat kulanazi.”

³³Josékas Jesúspa akkuhshkas Simeón pashpawa kaizta aizpa kwisha iztaspailta.

³⁴Suasne Simeónne usparuza kaiznara: “Diosne uruza me wat kirɨt,” kiznara. Suasne usne Maríara, Jesúspa akkuhshta kaizta: “Izti. Sun pashpane Dios nɨramika i. Us kaizta aizpa mɨamtuchi akwa, akkwan Israel awaruzne wan kaarɨnazi. Usne mamaztuza, us kaizta aizpa mɨmturuza, watsat mɨlnanazi. Akkwan awane ussa nɨjkulamanazi. Ussa kwail paraanazi.

³⁵Jesús usparuza kurunnakane, akkwan awane uspa kaijchukin Jesúspa minñamtu aizpa nɨjkulanazi. Une ayukmarain kwisha naizanazi, tɨ kwiz kaijchukin pamtukanain,” kizta.

³⁶Suane maza ashampane, Dios pit kainammmikane, tuazi. Ana munta. Usne Fanuelpa pashu azi. Aserpa kwal azi. Mane usne kwisha ɨnkwa azi. Nimpihshasmin kasara kirɨt. Siete año paiña ampukasa uztawane, Aserpa ampune irɨt.