Lucas 2:25-36

²⁵Mârâ ume uguondo Simeão tâtyem myakâwâm Jerusalémdâ. Judeu domodo ezewenry eynynonro mykâinane. Deus ize ato ara lelâ mykâinane aidyly. Alâ mykâinane typemugudo emakerim Deus ingonodyly nhenuendyly. Eagâlâ mykâinane Deus Ispiritury.

²⁶“Âiguely iraynâ ese âmâ Deus Ingonotyby” Deus Ispiritury kehobyrylâ Simeãoram.

²⁷Jesus Deus ety odaji sato emedyly ume Deus Ispiritury aguely myakâwâm Simeãoram: — Idâ Deus ety odaji — kely. Aituo myakâwâm idâly. Maria, José warâ iamudo Jesus agâ saindylymo myakâwâm; Deus itaumbyry iweniby agueho ara aidylymo.

²⁸Aituo Simeãoram âzeholymo. Simeão iamudo nhanâdyly. Deus koendonroem awyly wâgâ aguely:

²⁹— Iweâma tuomare urâ, Pymâ Deus. “Igonose urâ” myguehobyry migonodâma. Alâ ise. Tâwâlâ ise iweâma yiguely.

³⁰Ienugue kehoenma setai, merâ kurâ domodo emakerim âydâpa âetyby.

³¹Idânârâ kurâdo emakerin-em migonodâ.

³²Judeu keba modoram xutuen-honze âdara Deus ize awyly, iajinu wâne kydadakobâdo nhesagonly myara. Mâkâ wâgâ, judeu domodo koendâ aguehonze, kurâ domodo mâinduakeyby — kely myakâwâm Simeão Deusram.

³³Simeão iamudo wâgâ aguely tindatuo myakâwâm José, Maria warâ âsewânilymo.

³⁴Simeão agueondyly myakâwâm eyanmo: — Deus agâmolâ ise, nhenimoem — kely. Aituo myakâwâm Jesus isenra aguely: — Deus induakeyby wâne merâ iamudo, kypemugudo judeu domodo ewy âmery neinwâmpyramo olâ ise. Awylygue ise Deus agâpa âieholymo. Igueduomo âji tâdâsenagazedoram ise idâlymo. Tâlâ pylâ olâ ise âmery einwânni modo. Deus eydâpa nâiehobamo ise-ro warâ. Igueduomo eydâ atoram ise idâlymo. Âmerylâ ise kurâ domodoram âdara âsemaguelymo wâgâ aguenri. Toenzepa olâ ise izepanro modo.

³⁵Deus âdara kydawyly xutuen-honze, Jesus eynynâ, eynynâba warâ kydawyly. Âsenagazeze âmâ, âmery aietaynlygue. Espadague ihoguyby ara ise âmâ — kely Simeão, Jesus isenra.

³⁶Ilâpyryem myakâwâm aripi Ana saindyly, Deus itaumbyry agueim, Maria, José warâ iamudo agâ, Deus ety oday atomoram. Fanuel exiry myakâwâm mâkâ, judeu domodo ewy myakâwâm Aser iweompyry. Âwynsaundoem tatay myakâwâm ohogüinly. Sete anu ohogüimbyem awyly ume olâ myakâwâm iso iguely.