Luk 11:10-27

¹⁰Kunŋan Anutu köulukömakzawi, yaŋön mönö likepŋi buŋa qem aŋguma, yuaigö jarumakzawaŋön mönö mi miwikŋaima. Naŋgunöŋ qemakzawaŋgöra mönö naŋgu öröm waŋgima.

¹¹“Iwiurup eŋgöreŋök daŋön kewö akza: Nahönŋan söragöra qesiiga salupŋe qatö waŋgima.

¹²me kuruk kötŋaŋgö qesiiga skorpion (nendaŋ kömbukŋi pomemba) waŋgima?

¹³Mewögöra iŋini ambazip bölöŋi akze aka töndup kalem ölöpŋi ölöpŋi mi nahönböraturupŋini eŋgibingö mötze ewö, Suep Iwinöŋ mönö kalemŋi denöwö aŋgön kölbawak? Yaŋgö uruŋaŋgö ahakmemeŋi mi neŋgoŋgita tandökŋi kun akza. Miaŋgöra Uŋa Töröŋaŋgöra köuluköba qesim waŋgime ewö, yaŋön mönö sihimŋan i melaiiga uruŋine gema.” Mewö.

¹⁴Ömenöŋ azi kun töŋöt aka numbuŋi jöhöiga mötök maliga Jisösnöŋ ömeŋi mi wuataŋgöiga kota mosöri nesilamŋan lolohoiga kunbuk keu jiyök. Keu jiiga ambazip kambu yeŋön mi eka welipköget.

¹⁵Welipkögetmö, yeŋgöreŋök tosatŋan kewö jiget, “Yaŋön mönö öme yeŋgö kembuŋini Katakömulat yaŋgö ösumnöŋ ömewöröme eŋguataŋgömakza.”

¹⁶Mewö jigetka tosatŋan Jisös keugö bötaknöŋ örömapköra esapköm waŋgiba kewö qesiget, “Gi mönö jim kutunöŋga Suepnöhök aŋgöletot kun asuhuiga ekin.”

¹⁷Qesigetmö, yaŋön uru mötmötŋini möt teköba kewö jii mötket, “Kantri denike yeŋgö galömurupŋinan sutŋine aŋgururuk aka julmei, yeŋön mönö ayuhum aŋgugetka kantriŋinan böliba sahopŋanök ahöma. Mewöyök miri kungö könagesö yeŋön julmei, miriŋinan mönö qeqelaŋlaŋ ahöma.

¹⁸“Mötket! Satangö könagesö yeŋön mewöyök sutŋine aŋgururuk aka julbeak ewö, yeŋön mönö gawman nupŋini membingö osigetka ömetohoŋinan mönö denöwö kinbawak? Iŋini nöŋgöra kewö jize: Yaŋön Katakömulatkö ösumnöŋ ömewöröme eŋguataŋgömakza.

¹⁹Mewö jizemö, mötket, nöŋön Katakömulatkö ösumnöŋ ömewöröme közöl eŋgibileŋak ewö, eŋgö alaurupŋinan mönö dagö ösumnöŋ mi közöl eŋgibeak? Miaŋgöra yeŋön mönö keuŋini ölŋi me qahö, mi kewöta jim teköme.

²⁰Mi jim tekömemö, Anutugö ösumŋan nöŋgö börö kesötni sölölöhöi öme eŋguataŋgömakzal ewö, Anutugö bemtohoŋan mönö eŋgöreŋ kam kuŋguza.

²¹“Azi köhöikŋan timbi liŋgipŋambuk miri gölmeŋi galöm meiga sukinapŋan mönö kahaimök ahöma.

²²Mewö ahömapmö, azi köhöikŋi kötökŋan luhuba kaba qeba luhut al waŋgiba timbi liŋgipŋi nariyöhi, mi körek waŋgita qezaŋda sukinapŋi memba anda alaurupŋi mendeŋ eŋgima.

²³“Kunŋan nömbuk qahö maljawi, yaŋön mönö qetal niŋgimakza. Kunŋan ambazip nöŋgö qetne tokomegöra qahö öröm eŋgimakzawi, yaŋön mönö mendeŋ eŋgimakza.” Mewö.

²⁴“Ömenöŋ azi uruŋeyök kota gölme qararaŋkölkölŋe anda laŋ liliköba mala luhut memamgö miri jaruba kun qahö miwikŋaiba ölan yöhöiga kewö jima, ‘Mirini mosöta kazali, miaŋgöreŋ mönö kunbuk liliŋgömam.’

²⁵Mewö jiba liliŋgöba miriŋi usuŋda meŋölöi ahöyöhi, mi mewöŋanök ahöi miwikŋaima.

²⁶Mewö miwikŋaiba anda öme tosatŋi 7 eŋguaŋgitma. Öme 7 mi nanŋi oŋgita bölöŋi kötökŋi akze. Yaŋön mi eŋguaŋgiriga kaba miri mi öŋgöba miaŋgö uruŋe malme. Mewö aiga azi miaŋgö könaŋi mutuk kileŋkileŋ ahökmö, könaŋgep bölim qölim teköma.” Mewö.

²⁷Jisösnöŋ keu mewö jiba mali ambazip kambu sutŋineyök ambi kunŋan qeta Jisös kewö jii mörök, “Gömokni, ambinöŋ gölöm ala gömimba juzu gumohom gihiyöhi, nöŋön yaŋgö mötpi simbawoŋ akza.”