لُكِ 11:10-27

¹⁰مِشِ نَشَن بِرِن مَشَندِ تِمَ، عَ عَ سْتْمَ نّ. مِشِ نَشَن سٍ قٍنمَ، عَ عَ تٌمَ نّ. مِشِ نَشَن نَادّ كْنكْنمَ، عَ رَبِمَ نّ عَ بّ.»

¹¹«بَبَ مُندُن نَ وٌ يَ مَ نَشَن شَ دِ يّشّ مَشْرِنمَ عَ مَ، عَ سَ بْشِمَسٍ سٌ عَ يِ رَ؟

¹²شَ عَ سَ تْشّلّ نَن مَشْرِن وٌ مَ، وٌ نْمَ تَلِ سٌدٍ عَ يِ رَ؟

¹³شَ وٌ تَن مِشِ كٌبِيٍ قَتَ سٍ قَنيِيٍ قِدٍ وٌ شَ دِيٍ مَ، بَبَ عَلَ نَشَن نَ عَرِيَننَ، عَ دَنفِ وٌ رَ ثٌن! عَ عَ شَشِلِ سّنِيّنشِ قِمَ نّ عَ مَشَندِ مَيٍ مَ.»

¹⁴عِسَ نَشَ حِننّ ندٍ كٍرِ شّمّ قْشْ رَ نَشَن نُ بَرَ عَ كَنيِ قِندِ بٌبٌي رَ. عِسَ تٌ نَ حِننّ كٍرِ، بٌبٌي نَشَ وْيّن، حَمَ نَشَ كَابَ.

¹⁵كْنْ مِشِ ندٍيٍ نُ نَ عٍ يَ مَ، نٍيٍ عَ قَلَ، «عَ حِننّيٍ كٍرِ مَ حِننّ مَنفّ بّلّسّبُلُ نَن سَابُي رَ.»

¹⁶مِشِ فبّتّيٍ نَشَ فَنتَنيِ سَ عَ يَ رَ عَ مَشْرِنقٍ رَ عَلَ شَ تْنشُمَ ندٍ مَ.

¹⁷عِسَ تٌ عٍ شَ مَحْشُنيِ بِرِن كٌلٌن، عَ نَشَ عَ مَسٍن عٍ بّ، «لَنتَرٍيَ نَ مَنفّيَ نَشَن كُي، عَ مُ بُمَ. دٍنبَيَ لَنتَرٍيٍ قَن، عٍ كَنَمَ نّ.

¹⁸سٍنتَنّ شَ مَنفّيَ نْمَ بُدٍ شَ لَنتَرٍيَ نَ عَ كُي؟ وٌ نَشّ عَ ﭑ حِننّ كٍرِ مَ بّلّسّبُلُ سَابُي نَن نَ.

¹⁹شَ ﭑ تَن حِننّيٍ كٍرِ مَ بّلّسّبُلُ نَن سَابُي رَ، وٌ تَن شَ مِشِيٍ قَ عٍ كٍرِ مَ ندٍ سَابُي رَ؟ نَ كُي، عٍ تَن نَن يَتِ وٌ مَكِيتِمَ.

²⁰كْنْ شَ ﭑ تَن حِننّ كٍرِ مَ عَلَ سّنبّ نَن سَابُي رَ، عَلَ شَ مَنفّيَ نِينِ يَتِ نَن بَرَ وٌ لِ.»

²¹«شَ سّنبّمَ عَ شَ بَنشِ كَنتَمَ فٍرٍ سٌسٍ رَ، عَ هَرِفٍ بِرِن نَ كَنتَرِ نَن كُي.

²²كْنْ شّمّ فبّتّ نَ قَ نَشَن سّنبّ فبٌ عَ بّ، عَ نْمَ نّ عَ رَ، عَ عَ شَ فٍرٍ سٌسٍيٍ بَ عَ يِ عَ نُ لَشِ نَشٍيٍ رَ، عَ عَ هَرِفٍ بِرِن عِتَشُن مِشِ فبّتّيٍ رَ.»

²³«مِشِ نَشَن مُ ﭑ قْشْ رَ، عَ تِشِ ﭑ كَنكٍ نّ. نَشَن مُ ﭑ مَلِمَ مِشِ سْتْدٍ، عَ نَ مِشِيٍ رَيٍنسٍنقٍ نّ.»

²⁴«حِننّ نَ فبِلٍن مِشِ قْشْ رَ، عَ سِفَمَ يِرٍ مَشَرٍ لِنفِرَ فبّتّ قٍندٍ، كْنْ عَ مُ عَ تٌمَ. نَ تّمُي عَ عَ قَلَمَ عَ يّتّ بّ، ‹ﭑ شَ فبِلٍن ﭑ مَ بَنشِ كُي ﭑ كٍلِشِ دّننَشّ.›

²⁵عَ نَ فبِلٍن مّننِ، عَ عَ لِمَ نّ نَ بَنشِ مَكْشِ، عَ رَشُنمَشِ عَ قَنيِ رَ.

²⁶نَ تّمُي، عَ سِفَمَ نّ عَ سَ قَ حِننّ سٌلٌقٍرٍ فبّتّيٍ رَ نَشٍيٍ حَاشُ عَ بّ، عٍ بِرِن سٌ نَ بَنشِ كُي، عٍ سَبَتِ نَا. نَ كُي، نَ مِشِ شَ قٍ حَاشُمَ نّ دَنفِقٍ سِنفٍ رَ.»

²⁷عِسَ تٌ نُ يِ قٍيٍ قَلَقٍ، فِنّ ندٍ نَشَ عَ شُي عِتٍ حَمَ تَفِ، «سّيوّ نَ فِنّ بّ نَشَن عِ بَرِ، عَ شِحّ قِ عِ مَ!»