LUKU 11:10-27

¹⁰Zaakɛ gbɛ̃ kɛ̀ wɛ́ɛ kɛ̀n wè kpáa, gbɛ̃ kɛ̀ wɛ̀tɛ sↄ̃ è e, gbɛ̃ kɛ̀ gbà lɛ̀n, weé wɛ̃nɛ.

¹¹Amↄa kɛ̀ á nɛ́nↄ vĩ, tó a nɛ́ kpↄ̀ wɛ́ɛ kɛ̀awa, a dé bé eé mlɛ̃̀ sɛ́ à kpáa?

¹²Ke tó à nɛ́ konɛgbee wɛ́ɛ kɛ̀awa, a dé bé eé swí sɛ́ à kpáa?

¹³Baa kↄ̃n a zaakɛɛo, á pↄ́ maa kpana a nɛ́nↄa dↄ̃. Weé a De kɛ̀ kú musu Nini kpana gbɛ̃ kɛ̀ aↄ̃ wɛ́ɛ kɛ̀anↄa pↄ́ o dↄↄ́?

¹⁴Yesu e zĩn swãdo kpadugu goo gbɛ̃a. Kɛ̀ zĩn pì gòa, swãdoo pì nà yã'onaa, ben yã pì bↄ̀ parii saɛ.

¹⁵Ben aↄ̃ gbɛ̃kenↄ bè: È zĩn goḿma kↄ̃n zĩnnↄ kí Bɛlɛzɛbubu gbãaaomɛ.

¹⁶Ben gbɛ̃ pãndenↄ à yↄ̃̀ wà gwà, aↄ̃ à gbèka à sèeda ke kɛńnɛ kↄ̃n Luda gbãaao.

¹⁷Kɛ̀ Yesu ń laasuu dↄ̃̀, ben à bèńnɛ: Kpata kɛ̀ à gbɛ̃nↄ íbɛtɛ kpà kↄ̃o é kaatɛ. Ua kɛ̀ à gbɛ̃nↄ íbɛtɛ kpà kↄ̃o é gↄ̃ bɛzĩ ũmɛ.

¹⁸Tó Setãn íbɛtɛ kpà kↄ̃n a gbɛ̃nↄo, à kpata é gì kɛↄ́? Má ò lɛ kɛ̀ ée bee mɛɛ̀ zĩn goḿma kↄ̃n Bɛlɛzɛbubu gbãaao yãnzimɛ.

¹⁹Tó Bɛlɛzɛbubu gbãaan mɛɛ̀ zĩnnↄ gooḿma, a gbɛ̃nↄ è goḿma kↄ̃n dé gbãaaomɛ? Lɛmɛ a zĩnda gbɛ̃nↄ a ɛgɛ bò lɛ.

²⁰Tó ma zĩngommana nɛ́ Luda ↄgbɛmɛ, àgↄ̃ dↄ̃ kɛ̀ kí kɛ̀ Ludaa kà mↄ̀ à a len gwe.

²¹Tó gↄ̃sagbãaa gↄ̃kɛbↄnↄ kũna èe a ua dãkpaao, à auzikinↄ ègↄ̃ aafiamɛ.

²²Mↄde tó gbɛ̃ kɛ̀ à gbãaa dɛalaa mↄ̀ à gɛ̃̀zi à gbãaa mↄ̀nɛ, eé à gↄ̃kɛbↄ kɛ̀ à náanɛ kɛnanↄ sɛ́ɛ eé à auziki kpaatɛtɛńnɛ.

²³Gbɛ̃ kɛ̀ kúmaoroo bↄ̀ ma kpɛɛmɛ. Gbɛ̃ kɛ̀ è pↄ́ kakↄ̃amaoroo è fãakↄ̃amɛ.

²⁴Tó wà zĩn gò gbɛ̃a, ègↄ̃ likↄ̃aa zↄ̃ↄ gukorin àgↄ̃ vɛ̃ɛkii wɛtɛɛ. Tó èe ero, ben è be: Mɛ́ liara mà tá ma bɛ ziiamɛ.

²⁵Tó à kà gwe, è e à waana wásawasa zɛ́azɛa,

²⁶ben è gá zĩn kɛ̀ aↄ̃ pãsĩ dɛalaanↄ sɛ́ɛ mɛ̀n swɛɛplaa à suńyo, aↄ̃è gɛ̃ wà vɛ̃ɛn. Lɛmɛ adee gwena zãa zaaa ègↄ̃ dɛ à káakupↄla.

²⁷Kɛ̀ Yesu e oo lɛ, nↄgbɛ̃ ke pũ̀tã zà guu à bè: Aubarikadeen nↄgbɛ̃ kɛ̀ n i à yↄ̃ kpàmmaa ũ.