Lucas 8:15-47

¹⁵Meneng se benì nesabog diyà te melambò tanà, yan se iling te otaw ontò melobos se pedowan dan. Aw domineg dan te kagi te Timanem, ontò dan iyan egtoloen. Egtayod dan te kelimahan lamig doen ontong dan.”

¹⁶“Aw menemtem se otaw te solò, eked din iyan sengkobi. Eked din heman elesi doton te siyong te katri. Meneng mèpiya aw isawol din iyan diyà te kelengkawan amon keenyagan se didalem te balay.

¹⁷Iling heman kenyan, wedad in-eles songkani eked kitai te modi aldaw. Wedad heman imbolon songkani eked keindan te modi aldaw.

¹⁸“Nayan, keilangan toloen niyo se dinineg niyo. Se otaw kominawà te kebenalan, yan se dogangan te kebenalan. Meneng se otaw eked kinawà te kebenalan, yan se pegwedadan te kebenalan.”

¹⁹Nayan, pegtoladà i Jesus, dimateng se inay din aw menge kedowa din. Meneng wedà dan pekedapag diyà kandin, so ontò medita se otaw netipon kidoen kandin.

²⁰Doen otaw minikagi diyà kandin, “Doton te lowà se inay no aw menge kedowa nikaw. Meibeg dan ekon megkità kamno.”

²¹Timaba si Jesus, “Se menge otaw domineg te kagi te Timanem aw tomolò kenyan, yan se meinang inay ko aw menge kedowa ko.”

²²Nayan, doen sebad aldaw minikagi si Jesus diyà te menge tinoledaan din, “Mèpiya aw matas kidon doton dipag te lanaw.” Penga niyan, simakay dan te belangay.

²³Pegpesalo dan doton, neketedogi si Jesus. Wedà kenamay, dinetengan dan te kelamag ontò mebandes. Dakel se wayeg nekeawop te belangay, aw agpet dan neteled.

²⁴Penga niyan, linoka dan si Jesus, kagi dan, “Pengolo, melemes kidon den.” Neloka si Jesus aw sinagda din se kelamag aw dakel balud. Timunung se kelamag aw migkelinaw se lanaw.

²⁵Penga niyan, minikagi si Jesus, “Wedà pa kedì kelobos se pegsalig niyo kanak.” Meneng nelemitan dan. Nepela dan aw migpebelaw-belaway dan, kagi dan, “Ontò sikandin metolos, so pengkey kelamag aw balud timolò kandin.”

²⁶Penga niyan, dimeleg dan doton medapag te Gerasa dipag te probinsya te Galiliya.

²⁷Pegtenà i Jesus, kinità din se tege Gerasa simongon kandin. Dinetengan sikandin te bosaw, aw nenamay den migpetabeg-tabeg. Kenà eg-ogpà diyà te balay, meneng eg-ogpà doton te menge lebenganan.

²⁸Pegkità din ki Jesus, mig-olangag sikandin, aw limongken diyà ki Jesus, aw minikagi te dakel se kagi din, “Jesus, Batà te Timanem ontò melangkaw, ikà egsamok kanak. Memoyò a den diyà kamno, ikà bag egpeeleg kanak.”

²⁹Yan se inikagi te bosaw, so pinunuan i Jesus se bosaw amon lomowà diyà te otaw. Melikit egdetengan te bosaw se otaw sìyan, aw yan eggeposen sikandin te doma otaw te sengkalì, aw egpentongan dan sikandin, aw gayed dan egbentayan. Meneng egkebogtò se ipeggapos kandin aw eg-ibingen sikandin te bosaw doton te kebigtilan.

³⁰Na, mig-insà si Jesus, “Sinu lay se ngadan nikaw?” Timaba sikandin, “Minelalan.” Yan se intaba din so ontò medita se bosaw egdateng kandin.

³¹Gayed dan egpemoyò diyà ki Jesus te eked din dan peibingi doton te kilot aw ipelumun.

³²Ontò medita se osa nenowal doton te bontod medapag. Nemoyò se menge bosaw diyà ki Jesus aw mepakay diyà kandin malin dan doton te menge osa sìyan. Yan impealin din dan.

³³Yan limowà se menge bosaw lekat te otaw aw minalin dan doton te osa. Penga niyan, kimagnan se kedita te osa pesalo te keba, aw kimahang dan doton te lanaw, aw nelemes dan.

³⁴Pegkità te menge telediyaga te osa kenyan, kimadas dan aw mig-indan dan tepad kenyan doton te lonsod aw kedepagan niyan.

³⁵Penga niyan, dimoton se menge otaw inindanan dan amon komità dan kenyan. Pegdateng dan doton ki Jesus, kinità dan se otaw pinelowaan te bosaw. Nenenoo sikandin kidoen te dapag i Jesus, aw nenelowal den, aw migkèpiya den sikandin. Pegkità dan kenyan, nelemitan dan.

³⁶Inindanan dan heman te menge otaw kimità te pegpelowà i Jesus te bosaw lekat kandin.

³⁷Penga niyan, nemoyò se kedita te tege Gerasa te mesayo si Jesus lekat kidoen, so ontò dan nelemitan. Penga niyan, simakay si Jesus te belangay amon molì doton dipag.

³⁸Meneng nemoyò se otaw pinelowaan te bosaw aw mepakay sikandin tomaking. Meneng wedà din petekingi, so inikegiyan i Jesus,

³⁹“Olì ka den aw peg-indan ka diyà te menge kedomaan no tepad te mèpiya ininang te Timanem diyà kamno.” Penga niyan, nesayo sikandin aw mig-indan diyà te kedita te otaw te lonsod tepad te mèpiya ininang i Jesus diyà kandin.

⁴⁰Peg-olì i Jesus doton dipag te lanaw, medita se otaw simongon kandin, so tapay dan migtagad kandin.

⁴¹Penga niyan, dimoton ki Jesus se sebad obanen te simbahan te Judiyo, ngadan din si Jairo. Limongken sikandin diyà ki Jesus aw nemoyò te domoton si Jesus te balay din,

⁴²so ontò netigdaan se batà din bayi. Yan se temisa batà din, aw menge sempolò teg dowa se omay din. Penga niyan, timaking si Jesus kandin. Medita se otaw timaking ki Jesus aw migpesegsegay dan kidoen te dalan.

⁴³Nayan, doen sebad bayi timaking kandin pigdipenogan te sempolò teg dowa se omay, aw migkewedad se kedakel te kedònan din imbayad te menge doktor, meneng wedad otaw nekebolong kandin.

⁴⁴Pegtaking din ki Jesus, migpedapag diyà te getan din aw nemaed olò te toktok te saol din. Pegketà, negolì se mesakit din.

⁴⁵Penga niyan, mig-insà si Jesus, “Sinu lay se nemaed kanak?” Meneng wedad otaw mig-indan. Minikagi si Pedro, “Pengolo, ikà eg-insà aw sinu se nemaed kamno, so pigdenganan ka te medita otaw.”

⁴⁶Meneng minikagi si Jesus, “Doen gina otaw nemaed kanak, so mig-imanman a te doen tolos limowà lekat kanak amon megpegolì te otaw.”

⁴⁷Nayan, pegketaga-taga te bayi te eked keeles se ininang din, migpedapag sikandin diyà ki Jesus aw tinegangtang tandà te lamit din. Limongken sikandin diyà ki Jesus aw mig-indan aw eden se tod din. Dimineg heman se kedita te otaw te kagi din te negolì den se mesakit din te lekat te pegpemaed din ki Jesus.