Luku 8:15-47

¹⁵Kutupa mo epeke kenkena꞉ lopa꞉la꞉ wae ale manuta꞉ pi opua homu pu haleme wanda꞉hali ikana꞉ma꞉ honkopu hao epeke tupa꞉ minaata꞉ ika꞉ kiliki aneke a꞉eluekema꞉ pa putia pelimikie leekeme.

¹⁶Yesuma꞉ alota꞉ Hali ma꞉nda꞉ma꞉ lamepa ka꞉waata꞉ sini tiekema꞉ na mea dopuaniao o bedi tokele pa꞉ta꞉ na u hala꞉me. Koto hau na pikita꞉ wanda꞉hali a꞉pa honda꞉ pambetiki pitolo handena꞉ yeketa꞉ mo lamepa u hala꞉ alena꞉ u hala꞉me.

¹⁷Ala꞉ta꞉ ma꞉nda꞉ a꞉mbao panka꞉ ula꞉ aleta꞉ hama nane peneme yao mea a꞉pa wilieke. Kutupa make ala꞉ta꞉ ma꞉nda꞉ tote pealimi ekita꞉ pa̱a̱na꞉ peneme yao mea ipilimikie leekeme.

¹⁸Koto ekina꞉ta꞉ ikana꞉ma꞉ pi opu haleme ekita꞉ wotu handeteke hao hapa꞉peke. Ekipeke ma꞉nda꞉ma꞉ ala꞉ta꞉ ma꞉nda꞉ wia꞉ka꞉na꞉ta꞉ kota꞉ ipikita꞉ haka꞉ta꞉pao ota꞉ wotu milieke. Pate hali ma꞉nda꞉ma꞉ ala꞉ta꞉ ma꞉nda꞉ na wia꞉ka꞉na꞉ta꞉ kota꞉ mo hosikieki make ipika꞉ honema꞉ Ulume laa wia꞉eki kone yoka꞉ mealieke leekeme.

¹⁹Yesuna꞉ ama꞉ make hameke tonuma꞉ ipiki handolo epemekepate Yesu teke pa꞉ta꞉ pua꞉peke na yeekeme. Ekipeke wanda꞉hali anekehapuma꞉ Yesu mea hopa꞉liao haemekeme.

²⁰Ma꞉nda꞉ma꞉ Yesu pa꞉ta꞉ a꞉pa alota꞉ Naka꞉ ama꞉ kame tonuta꞉ neke handuluekema꞉ da hama do a꞉pa halememe leekeme.

²¹Koto leeke Yesuma꞉ mo wanda꞉hali paeyao pa꞉ta꞉ alota꞉ Koda꞉na꞉ pi opua pu haleme wanda꞉halita꞉ yaka ama꞉ kametonu halememe leekeme.

²²Nate ma꞉nda꞉na꞉ Yesu ipika꞉ disaipolo haliweki ame̱le̱ pua kawaso ma꞉nda꞉na꞉ pitulu pemekeme. Yesuma꞉ iki pa꞉ta꞉ alota꞉ Nikita꞉ do ikali tunkula mone tea꞉na꞉ bape leekeme. Kutupata꞉ iki kini pea puluta꞉

²³mo kawaso pulu haena꞉ta꞉ Yesuta꞉ u peliekeme. Kutupa koto kone po tilipu tieke epeeketa꞉ mo ikalita꞉ kawaso tukiki pa꞉ta꞉ tumbieke ekima꞉ta꞉ homa꞉la꞉ ekita꞉ teke pa꞉ta꞉ yeekeme. Koto ekina꞉ mo haliwekita꞉ paala꞉ tiekema꞉ homemekeme.

²⁴Kutupa ikana꞉ma꞉ Yesu a꞉pa tiao alota꞉ Aneke halio. Aneke halio. Nikita꞉ teke pa꞉ta꞉ do homoloma꞉ handa꞉e lemekeme. Koto lemeke Yesu tiaota꞉ mo hande honkopu wopu hake po tilipu pa꞉ta꞉ make mo la꞉ma꞉ la꞉ma꞉ piki honkopu hake ikali yaapo pa꞉ta꞉ta꞉ Paae leeke handaa ipilika꞉ honkopu paeyao upa lopaata꞉ la꞉ma꞉ na piki e̱ pondo na lepekeme.

²⁵Kutupa Yesuma꞉ ipika꞉ disaipolo haliweki pa꞉ta꞉ alota꞉ Ika꞉ hone tulaleme ekita꞉ hando ka꞉ta꞉pe laa lota꞉ piekeme. Koto leekepate iki paeyaoma꞉ penkilipa꞉tia pominolo make paala꞉ma꞉ wotu homolo hata꞉ ika꞉ ika꞉ kone alota꞉ Do halita꞉ epi ya꞉ka꞉ta꞉pe. Mo ikali pita꞉ po tilipu yaapoma꞉ ipika꞉ pi ota꞉ opitelepeme lemekeme.

²⁶Koto hau pea paeyeketa꞉ Yesu ipika꞉ disaipolo haliweki ame̱le̱ mo Kedasa kenke pa꞉ta꞉ kawasona꞉ pua opa꞉liaemekeme. Koto Kedasa kenketa꞉ mo Ka꞉lili kenke nanema꞉ hao mo ikali leke tunkula pua mone tea꞉na꞉ ula꞉me.

²⁷Yesuma꞉ mo kawaso mina꞉pa꞉lao mo ikali tea꞉na꞉ pulu haena꞉ta꞉ mo hoke temokomanu pitiki hali ma꞉nda꞉ mo daoni ma꞉nda꞉ pa꞉ta꞉ hao ipiki manda꞉hande pipikime. Ota꞉ amba꞉ hande hatiki a꞉paata꞉ ame make mo someta꞉ aka꞉ na yameke make da pa꞉ta꞉ na hao polu make ipikita꞉ mo homo hayeke haliweki u haemeke tikene da pa꞉ta꞉manu hao hayekeme.

²⁸Ipikana꞉ma꞉ Yesu handaata꞉ wi tieke alo hata꞉ Yesuna꞉ anke pa꞉ta꞉ handa꞉niao kenkena꞉ tu lopaata꞉ wi anekema꞉ pa alo alota꞉ Yesuo. Neketa꞉ Koda꞉ Manda Hala꞉ Tiekena꞉ Eiyekee. Nakana꞉ma꞉ I̱ yaapo eki hau puluekema꞉ pitelepe. Nakana꞉ma꞉ I̱ pa꞉ta꞉ tanda na kia꞉pee laa honke leekeme.

²⁹Koto leeke ekita꞉ Yesuma꞉ mo hoke temoko pa꞉ta꞉ Pue leeke ekina꞉ leekeme. Nate paeyao mo hoke temokoma꞉ mo hali wotu lu keatiki pomu hayekeme. Nate ma꞉nda꞉ nina꞉ta꞉ mo halita꞉ dipula pitao senipu manuma꞉ ipika꞉ kiki anke mea tonkao u hatiki pimikipate kone ipikana꞉ma꞉ mo senipumanu tunkula꞉ lubepi pia꞉tiki peaata꞉ mo hoke temokoma꞉ koto halita꞉ hapu hayeke alena꞉ lu mea pua꞉tiki piekeme.

³⁰Yesuma꞉ mo hali pa꞉ta꞉ alota꞉ Naka꞉ bikita꞉ epi ya꞉ka꞉ta꞉pe laa lota꞉ pieke handaa ipikana꞉ma꞉ alota꞉ Yaka bikita꞉ Eleke elekee leekeme. Koto leeke ekita꞉ temoko eleke eleke wotu ipiki pa꞉ta꞉ pitieke ekina꞉ leekeme.

³¹Mo hoke temoko tonuma꞉ta꞉ Yesu pa꞉ta꞉ honke honke wotu alo hata꞉ alota꞉ Niki mo tanda mu halo poloma꞉ naku ka꞉ka꞉na꞉ tieke pa꞉ta꞉ dipula pitulu pomono na tapaapeke lemekeme.

³²Koto alena꞉ ma꞉na꞉ titi monema꞉ hayeke peiyene tea꞉na꞉ ne nalo haena꞉ mo hoke temoko tonuma꞉ Yesu pa꞉ta꞉ honke alota꞉ Mo ma꞉na꞉ titina꞉ weleke pa꞉ta꞉ pitulu pomono lae lemeke handaa Yesuma꞉ ika꞉ honke lemeke tupa꞉ pa pina꞉ la kiaeyekeme.

³³Koto ekina꞉ ikana꞉ma꞉ mo hali mina꞉pa꞉lao ma꞉na꞉ titina꞉ weleke pa꞉ta꞉ pitulu pemekeme. Kutu pimikita꞉ mo ma꞉na꞉ paeyaota꞉ mo peiyene paeleeke alena꞉ a̱i̱ya pua hola꞉pa꞉niao ikali pa꞉ta꞉ puaata꞉ ikali naa honki lemekeme.

³⁴Mo ma꞉na꞉ titi handeteke haemeke haliwekima꞉ mo pieke ekimanu handaata꞉ pindipa puata꞉ daoni nane haemeke wanda꞉hali make koto daoni tekepa꞉ta꞉ haemeke wanda꞉hali make la꞉tiki pomimikime.

³⁵Koto ekina꞉ mo wanda꞉halima꞉ hande pieke ekimanu handuluekema꞉ pua Yesu pa꞉ta꞉ a꞉paata꞉ amba꞉ hande weleke pa꞉ta꞉ hoke temokomanu pitieke halita꞉ Yesuna꞉ anke teke pa꞉ta꞉ dau yama epeke hone wia pitiekeeki handolo hata꞉ta꞉ iki paeyaoma꞉ paala꞉ma꞉ homemekeme.

³⁶Mo hali mea epeaaso piekeeki handemeke wanda꞉halima꞉ mo piekeeki manuta꞉ mo epemeke wanda꞉hali pa꞉ta꞉ la halemekeme.

³⁷Kutupa mo Kedasa kenke wanda꞉hali paeyaoma꞉ paala꞉ma꞉ homolo hata꞉ Yesu pa꞉ta꞉ alota꞉ Nakana꞉ma꞉ niki mina꞉pa꞉lao pue lemekeme. Koto lemeke Yesuma꞉ mo kawasona꞉ pitulu pua peekeme.

³⁸Kutu pitolo haena꞉ mo hoke temokomanu tolu lieke halima꞉ Yesu pa꞉ta꞉ honke alo alota꞉ I̱ta꞉ neke yaapo pana꞉e leekeme. Koto leeke Yesuma꞉ mo hali paa tapaaso hata꞉ alota꞉

³⁹Neke naka꞉ da nane paa la꞉ka꞉la pua Koda꞉ma꞉ neke pa꞉ta꞉ pia꞉ hande ekimanu paeyao wanda꞉hali paeyao pa꞉ta꞉ pua la hala꞉tiki pu hapeke leekeme. Koto ekina꞉ta꞉ mo halima꞉ ipika꞉ teke da nane puaata꞉ Yesuma꞉ ipiki tamba꞉ miekeeki paeyaosiki wanda꞉hali pa꞉ta꞉ pua la hale hale piekeme.

⁴⁰Yesu mo kawasona꞉ pita ikali leke mone tea꞉na꞉ paa la꞉ka꞉la peeke pita꞉ma꞉ta꞉ wanda꞉halima꞉ ipika꞉ opolo polo pieke ekina꞉ yu wia handeteke haemeke ekina꞉ ta꞉na꞉ma꞉ wopu homemekeme.

⁴¹Koto tomona꞉ta꞉ hali ma꞉nda꞉ ipikita꞉ mo pi hotu haemeke dana꞉ you hali bikita꞉ Diaitusima꞉ a꞉pa Yesuna꞉ anke teke pa꞉ta꞉ panda꞉ puniao ipika꞉ da pa꞉ta꞉ epena꞉ honke leekeme.

⁴²Pa ekipeke ipika꞉ ota꞉ homeke hayeke bapita꞉ 12 yeeke wandikita꞉ tekesiki pa꞉ta꞉ homuluekema꞉ taapolo pitieke handaa leekeme. Koto leeke Yesu pulu haena꞉ mo wanda꞉hali anekehapu mandane mandane yama꞉ a꞉pa momba꞉laaso hata꞉ Yesu mea daka꞉pa daka꞉pa puluekema꞉ taapemekeme.

⁴³Kutupa mo wanda꞉hali anka꞉lopuna꞉ mo bapi 12 andusa꞉na꞉ we yopu hayeke wanda꞉ ma꞉nda꞉ hayekeme. Ipika꞉ yeni tamba꞉ mina꞉yeke dokeda haliweki pa꞉ta꞉ ipika꞉ mani paeyao hala꞉tiki piekepate ipika꞉ yenita꞉ ota꞉ na epeaeyekeme.

⁴⁴Kutupa mo wanda꞉ma꞉ mo wanda꞉hali anka꞉lopuna꞉ puata꞉ Yesuna꞉ hoki nanema꞉ a꞉pa ipika꞉ dopieke dau honiki wataeyekeme. Koto tomona꞉ kone hande we yapeeke ekita꞉ paeyekeme.

⁴⁵Yesuma꞉ mo wanda꞉hali pa꞉ta꞉ lota꞉ pitolo alota꞉ I̱ta꞉ epima꞉ wataeya꞉pe leekeme. Mo wanda꞉halima꞉ alota꞉ Niki ma꞉nda꞉ma꞉ na wataoma꞉me lemeketa꞉ Pidama꞉ Yesuna꞉ pi hombo peaaso alota꞉ Tekehalio. Do wanda꞉halima꞉ neke mea hopa꞉liao daka꞉paasa꞉ handa꞉e leekeme.

⁴⁶Koto leekepate Yesuma꞉ alota꞉ Ekipeke I̱ tukiki pa꞉ta꞉ ula꞉ honkoputa꞉ ma꞉nda꞉ teke pa꞉ta꞉ puleke handaa ma꞉nda꞉ma꞉ I̱ ota꞉ wataeya꞉me laa loa꞉me leekeme.

⁴⁷Mo wanda꞉ma꞉ Yesuma꞉ I̱ma꞉ pua꞉ ekita꞉ handa꞉ ya꞉ka꞉ta꞉me laa pututuma꞉ homa꞉tia a꞉pa Yesuna꞉ anke teke pa꞉ta꞉ a꞉pa panda꞉ puniaeyekeme. Wanda꞉hali paeyaona꞉ leke tonka꞉na꞉ hata꞉ mo wanda꞉ma꞉ Yesu pa꞉ta꞉ ipika꞉ dau honiki wataeyeke ekina꞉ teke make mo ipika꞉ yeni koto kone paeyekeeki make laa haleekeme.