Lucas 8:15-47

¹⁵Peru waquin nunacunanam alli allpaman muru pintishqa cuenta cayan. Allapa alli shonquncunawan alli willaquita wiyarmi, creyicuyan. Tseno carmi, imata sufrirninpis tsaracuyan, y allapa allicunata Diospaq rurayan.

¹⁶“Lamparinta sendircur, manam manca rurinmantsu ni catripa rurinmantsu churantsic; sinoqa raramanmi churantsic, wayiman yecoqcunata actsinanpaq.

¹⁷Tse cuentanollam Diospa palabran pacarëcaqcunata y mana musyayanqancunata imecarpis musyayanqa.

¹⁸“Tsemi canan alleq wiyayämë: Wiyacoq caqcunaqa mas allim cäyicuyanqa, peru mana wiyacoq caqcunaqa, ichiclla wiyayanqantapis qonqariyanqam.”

¹⁹Tsemannam Jesuspa mamänin wauqincunawan ashirnin chäriyarqan. Atscaq nunacuna ellucayashqa cayaptinmi, Jesus canqanman yequita puediyarqantsu.

²⁰Juc nunanam Jesusta queno willarerqan: —Mamäniquim wauqiquicunawan shuyarëcayäshunqui waqtacho. Menistiyäshunquish —nir.

²¹Penam nerqan: —Dios palabranta wiyar cäsucoqmi, noqapa mamänïqa y wauqïcunaqa cayan.

²²Juc junaqnam disipuluncunawan lanchaman Jesus lloqarir, nerqan: —Acu lamarpa wac tsimpanman. Tseno niptinnam, eucuyarqan.

²³Ewarëcayaptinnam, Jesus punucärerqan. Tsemannam llutepa bientur qallaquicorqan lamarta laqcheqsätsirnin. Lanchancunaman yacu winacaptinnam undicäyänanpaqna quecayarqan.

²⁴Tsenam Jesusta riyatsiyarqan, queno nishpa: —¡Mayestru, Mayestru, riyaquï! ¡Ushacärintsicnam! —nir. Tseno niyaptinnam, sharcur bientuta mandarqan mana bientunanpaq yacuta mana laqcheqsänanpaq. Y llapanmi shumaq tranquilu ticrarerqan.

²⁵Tsenam disipuluncunata queno nerqan: —¿Imanirtaq noqaman marcäcuyarqonquitsu? Disipuluncunanam allapa mantsacashqa y espantashqa, quiquincuna pura queno ninacuyarqan: —¡Queqa imano nunataq, tselaya bientupis yacupis mandadunta cäsuyänanpaq!

²⁶Galilea probinsiapita eucurnam, lamarpa wac tsimpan Gadara nishqan marcaman chäriyarqan.

²⁷Lanchapita yarpurirnam, tarerqan tse marcapeq supëyoq juc nunata. Tse nunam unena qalapachu puricorqan. Y mana wayincho yachashpam, pantiuncunallacho paracorqan.

²⁸Jesusta riquecurninnam, corillapa ewar, nopanman qoncuriquicorqan. Tsenam nunapa shiminpa supë qaparipa queno nerqan: —Puedeq Diospa tsurin Jesus, ¿imatataq noqacunawan munanqui! ¡Qamtam rogacoq ama imanecayämëtsu!

²⁹Tseno supë nerqan, Jesus “¡Que nunapeq yarqï!” nishqa captinmi. Tse nunapa shonqunchomi unepita supë cacorqan. Cadenacunawan nunacuna tsareta munar, chaquinta, maquinta pancayaptinpis, rachicacharcurmi, supëpa muneninwan tsunyaqcunata eucoq.

³⁰Tsenam supëta Jesus taporqan: —¿Imataq jutiqui? —nir. Tsenam nerqan: —Noqapa jutïqa juc tropam. Tseno nerqan, tse nunacho atscaq supëcuna carninmi.

³¹Jesustam supëcuna yapecuryan rogayarqan queno: —Ama infiernuman qarpulläyämëtsu —nishpa.

³²Tse jircachomi atsca cuchicunata mitsiquicayarqan. Tsenam supëcuna mañepa, queno niyarqan: —Cachecalläyämë taqe cuchicunallaman yecuquiculläyänäpaq —nir. Jesus “ewayë” niptinnam,

³³nunapeq yarqurir, cuchicunaman yecuquicuyarqan. Tsenam, coripa ewar cuchicunaqa jircapita qochaman jeqacurcuyarqan, y shenqacar, wanuriyarqan.

³⁴Tse cuchi mitseqcunanam tse llapan pasaconqancunata riquecur, jinantin marcapa estansiancunapa coripa ewacur, llapanta willacuyarqan.

³⁵Tsenam nunacuna shayämorqan, “Mä, ¿imash pasacushqa?” nirnin. Jesus quecanqanman chärirnam, taririyarqan supëyoq nunata pasepa sanutana, roparishqana y juisiunchona, Jesuspa laduncho tëcaqta. Tseta riquecurninmi, allapa mantsacäyarqan.

³⁶Y ricashqa caqcunanam tseman chaqcunata willayarqan imano tse supëyoq nunata Jesus cachacätsishqanta.

³⁷Tsenam tse Gadarapita nunacuna allapa mantsacur, Jesusta rogayarqan: —Que marcalläcunapita eucullë —nishpa. Tsenam lanchaman Jesus disipuluncunawan lloqarcur, eucorqan.

³⁸Supëpita libracushqa nunanam Jesusta rogarqan pewan eucunanpaq. Peru Jesusnam nunata despidirnin, nerqan:

³⁹—Quedacur, wayiquiman cutiquï. Tsecho willacunqui Dios llapanta qampaq rurashqanta. Tsenam cutirnin, jinantinpa ewar, willacorqan Jesus pepaq llapanta rurashqanta.

⁴⁰Galilea marcaman cutiriyaptinnam, atscaq nunacuna shuyarëcayarqan, cushishqa chasquiyänanpaq.

⁴¹Tsemannam ellucayänan wayicho mandacoq Jairu jutiyoq nunapis chärerqan, y Jesuspa nopanman qonquriquicurnam, rogarqan: —Acu, wayïta eweculläshun —nishpa.

⁴²Tse nunapam jucllella chunca ishque (12) watayoq warmi tsurin, pasëpa lastima qeshyar, wanuquicarqan. Jesus ewarëcaptinnam, atsca nunacuna qatirnin quichquipa quichquiyarqan.

⁴³Chopincunachonam ewecarqan juc warmi, chunca ishque (12) watana yawar ewewan qeshyacoq. Tse warmim imecancunatapis pasepa ranticur, usharqan jampicunanpaq; peru meqan jampicoqpis manam cachacätserqantsu.

⁴⁴Pemi Jesuspa qepanman witïcur, mantunpa cuchunta yatecaporqan. Yateconqan öram yawar ewenin paqwepa tsaquirerqan.

⁴⁵Jesusnam tapucorqan: —¿Pitaq ropäta yatamorqon? —nishpa. Llapan nunacuna “Manam noqatsu” niyaptinnam, Pedru waquin yanaqincunawan niyarqan: —¡Mayestru, quelaya nunachoqa jucnin jucnintaq tanqayäshunqui! ˻¿Tsecu qam ninqui, ‘Pitaq ropäta yatamorqon?˼’

⁴⁶Yapenam Jesus nerqan: —¡Pi carpis yatamashqam! Podernï yarqoqtam mäcorqö.

⁴⁷Tseno yatashqanta mäcuriptinnam, mana imano queta puedir, tse warmi allapa mantsacushpa Jesuspa nopanman qonquriquïcorqan. Y willarqan llapan nunacuna wiyarëcayaptin, imanir yatashqanta y cachacärishqanta.