LUKA 8:15-47

¹⁵Tsono ire yomwe idagwera pamataka ya pandovolo ni wanthu omwe ana mtima wa bwino na wakulungama. Ndipo iwo akabva fala ambateweza na kulimbika. Na tenepo ambabala bzisapo bzabwino.

¹⁶Palibe munthu omwe ambaphatiza m'bvuniko aciugwanankira na mkhate, ayai aciuikha pantsi patalimba. Tsono, ambauikha padzulu kuti wanthu akapita ambawone ceza.

¹⁷Na tenepo palibe cinthu cakubisala comwe cingadzasaye kusokoloka. Napo cakubisidwa comwe cingadzasaye kudziwika ayai kuwoneka padeca.

¹⁸Tetekerani bwino! Ule omwe ana bzinthu kale an'dzapasiwa pomwe. Tsono ule omwe alibe cinthu. Napo bzing'onong'ono bzomwe ali kuyesa kuti anabzobzo an'dzatengweredwa pomwe.

¹⁹Ndipo mai wa Jezu na abale wace adabwera kuti kudzamuwona. Tsono iwo alibe kukwanisa kupita mukhana iyemo thangwe mukhadadzala wanthu. .

²⁰Ndipo wanthu adakamuuza kuti: “Mai wako na abale wako ali panjapa. Nakuti iwo an'funa kukuwona.”

²¹Tsono iye adawatawira kuti: “Mai wangu na abale wangu ni wale omwe ambabva Fala la Mulungu aciliteweza.

²²Pantsiku ibodzi Jezu adapakira m'mwadiya na ateweri wace aciwauza kuti: “Mbatiendeni ng'ambu inango ya thawale ire.” Na tenepo iwo adayenda.

²³Pomwe akhayambukapo, iye adakhwenchedwa na tulo. Ndipo m'thawalemo mudacita conzi cikulu kwene-kwene, na tenepo mwadiyayo ukhalodzika. Pamwepo iwo akhali pa pangozi ikulu.

²⁴Ndipo ateweriwo adakam'musa aciti: “Misiri, Misiri, tiri kulobzika!” Pomwe iye adamuka adaimisa condzico na kubvunduka kwa madziko. Na tenepo condzico cidaima na bzentse bzicikhala bwino.

²⁵Ndipo iye adawabvundza aciti: “Kodi kukhulupirara kwanuko n'kuponi?” Ndipo iwo adabva mantha na kudabwa na tenepo akhambabvudzana kuti: “Kodi mbani omweyu? Iye ali kuimisa condzi na madziyu, ndipo ibzo bzicibvuma kuima.”

²⁶Ndipo iwo adayambuka thawale la Galileya acifika kumphimpha ya Jeraseno.

²⁷Pomwe iwo adatsama adagumana na munthu m'bodzi wa mundzindamo omwe akhagwa bziwanda. Ndipo iye akhambakhala pezi kuyambira kale-kale. Ndipo iye akhakhala lini m'nyumba maka m'thenje.

²⁸Pomwe iye adawona Jezu adakuwa acibzithusa m'minyendo mwace acilewa kuti “Nandi Jezu! Kodi un'funa kundicitanyi? Nakuti ndiwe Mwana wa Mulungu wa Wakudzulu.” Ndiri kukukumbira kuti uleke kundiboneresa!

²⁹Tsono Jezu akhadatonga kale kuti bziwandabzo bzicoke m'thupi mwa munthumo. Nakui ntsiku zentse iye akagwa ndipo wanthu akham'anga na manyolo bzikamugwa wanthu akhamumanga na manyolo manja na minyendo acimbamulindira. Tsono iye akhambabwedza manyoloyo acithawira m'thengo.

³⁰Jezu adam'bvundza kuti: “Kodi dzina lako ndiwe yani?” Ndipo iye adatawira kuti: “Ndine Bzulu. Nakuti iye akhagwa bziwanda bzizinji kwene-kwene.

³¹Ndipo bziwandabzo bzidamukumbira kuti asaye kubzithothera kuCidindi.

³²Pafupi na pamwepo pakhana nkhumba zikhadya m'phepete mwa kaphiri. Ndipo bziwanda bzidamukumbira kuti abzirekere bzipite munkhumbamo. Ndipo Jezu adabzireka bzicipita.

³³Na tenepo bziwandabzo bzidacoka mu munthuyo bzikapita mu nkhumbamo. Ndipo nkhumbazo zidapolika zicikagwera m'thawale, ndipo zentse zicifa.

³⁴Pomwe amakabusa wa nkhumbazo adawona bzimwebzo, adathamanga acikawuza wanthu kumzinda na m'mii.

³⁵Ndipo wanthu azinji adakawona bzomwe bzidacitikabzo. Pomwe iwo adafika pakhana Jezupo adakawona munthu omwe akhadacosedwa bziwanda ule akhadakhala m'minyendo mwa Jezu. Ndipo adabanganuka akhadabvala pomwe. Na tenepo iwo adabva mantha.

³⁶Ndipo wanthumbo winango omwe adawona bzidacitikabzo, adawafotokozerambo ninga mowme adalimbisidwira munthu nyabziwanda ule.

³⁷Na tenepo aJerasenewo, adamuwuza kuti acoke m'mwemo thangwe iwo akhana mantha kwene-kwene. Ndipo iye adapakira mwadiya acibwerera.

³⁸Ndipo munthu omwe adazulidwa bziwanda ule adakumbira Jezu kuti ayendenayembo. Tsono Jezu adamuletsa, acimuwuza kuti:

³⁹“Bwerera! Ndoko kumui ukafotokozere andzako bzentse bzomwe Mulungu wakucitirabzi. Na tenepo iye adayenda mu mzinda acikafotokoza bzentse bzomwe bzidacitikabzo.

⁴⁰Pomwe Jezu adabwererapo, nthithi wa wanthu udamutambira bwino. Nakuti iwo ukhadikhira iye.

⁴¹Na tenepo adabwera munthu m'bodzi dzina lace Jairosi, ntsogoleri wa nyumba yakupembera. Ndipo iye adabzithusa m'minyendo mwa Jezu. Na tenepo iye adamudandaulira kuti ayende naye kumui kwace.

⁴²Nakuti mwanace wa cikazi omwe akhali m'bodziyo yekha, wa magole khumi na mawiri akhadasala pang'ono kufa. Pomwe Jezu akhayenda wanthu azinji akhamupsindiza.

⁴³Tsono pakhana mkazimbo winango omwe akhaduwala matenda ya kumwezi, mpaka magole khumi na mawiri. Tsono palibe munthu omwe adakwanisa kumulapa.

⁴⁴Ndipo iye adayenda mbuyo mwa Jezu acikhuya kumphepete kwa mkanjo wace. Panthawe imweyo matenda ya kumweziyo yadaduma.

⁴⁵Ndipo Jezu adabvundza kuti: “ Kodi mbani wandikhuyayu?” Tsono wanthu wentse adagaza. Ndipo Pedru adatawira kuti: “Misiri, wanthu ali kukupsindizaniwa ndiwo akukhuyani.

⁴⁶Tsono Jezu adangingimira kuti: “Alipo munthu m'bodzi wandikhuya. Thangwe ndabva kuti mphambvu zacoka m'thupi mwangumu.

⁴⁷Nakuti iye alibe kukwanisa kubzibisa. Ndipo iye adabwera ali kutetemera. Na tenepo adabzithusa m'minyendo mwa Jezu, acifotokoza pakati pa pawanthu wentse kuti adamukhuiranyi. Ndipo Jezu adamulimbisa tani pomwe panthawe ibodzi-bodziyo.