Luuka 8:15-47

¹⁵Kaa ɗo aawdi ndii saami e leydi mbelndi ɗoo, ɓeen ngoni nanirooɓe konngol ngol ɓerɗe belɗe, laaɓuɗe, so kayba ngol faa ngol rima.

¹⁶—Fay gooto huɓɓataa lampa so hippa hen la'al naa soorna ɗum ley leeso. Ko waɗata dee, sinndan ɗum, yalla eka yaaynana naatooɓe.

¹⁷Sabi walaa fuu ko ɲooɓi ko ɓanngintaake, walaa ko suuɗii ko annditataake faa yaltinee sella.

¹⁸Ndennoo, tiiɗee e no nanir-ɗon nii, sabi jogiiɗo fuu, ɓeydante. Kaa mo walaa oo, fay ko miilata ana jogii koo teetete.

¹⁹Inniiko e miɲiraaɓe makko worɓe ngari e makko, kaa ɓe keɓaali yottaade mo saabe jamaa.

²⁰O haalanaa inna makko e miɲiraaɓe makko ana ndarii sella ana njiɗi yiide mo.

²¹Nii o jaabii, o wii: —Innam e miɲiraaɓe am yo nanooɓe konngol Laamɗo ngol so ngollira ɗum ɓee.

²²Ɲannde wootere Iisaa e taalibaaɓe mum naati laana. O wii ɓe: —Lummben weendu nduu. Ɓe ndeerti.

²³E ley lummbugol ngol, mo ɗaanii. Oon wakkati fuu, henndu mawndu immii, laana kaa heewi ndiyam, ka hosi mutude.

²⁴Ɓe ɓadii, eɓe pinndina mo eɓe mbiya: —Moobbo, Moobbo, miɗen nii kalkoo! O fini, o jahii e henndu nduu e bempeeje ɗee, non fuu wii teen!

²⁵Caggal ɗum, o wii ɓe: —Hoto hoolaare mon woni? Ɓe kuli, ɓe cuŋli, eɓe mbiyondira e ko'e maɓɓe: —Ko oo gorko woni? Omo yamira fay henndu e ndiyam, ɗi ɗowtanto mo.

²⁶Caggal ɗum, ɓe panndoyi leydi Gerasankooɓe, peewtondirndi e leydi Galili.

²⁷Nde o ƴeenti ndee, gorko laddaaɗo, jeyaaɗo e ngeenndi ndii, joppuɗo kaddule ko ɓooyi so tuddoyii janaale, wari e makko.

²⁸Nde o yii Iisaa ndee, o wulli, o diccii yeeso mum, o haali faa toowi, o wii: —Iisaa, Ɓii Laamɗo Toowɗo, ko njiɗ-ɗaa waɗude kam? Miɗo ɲaage, pati torram.

²⁹Walaa ko o wiiri non, sinaa Iisaa yamirii seyɗaani oo yalta e neɗɗo oo. Oo seyɗaani ana war-wartannoo e makko cili keewɗi. Oon ana geƴƴetenoo juuɗe e koyɗe fuu, geƴƴiree calali, kaa o taƴan ɗum fuu, seyɗaani oo regina mo ngeenndi, naɓa mo ley ladde jeereende.

³⁰Iisaa lamndii mo, wii: —Hono mbiyete-ɗaa? O jaabii: —Miɗo wiyee «Jamaa». O wii ɗum non, sabi seyɗaani'en heewɓe ana ngondi e makko.

³¹Ɓe ndarii eɓe ndaarda Iisaa pati o yamira ɓe ɓe naatoya e iduru.

³²Sewre girooji mawnde ana durannoo ɗon e hoore waamnde haayre. Seyɗaani'en ɓee ndaardi mo o duŋanoo ɗum'en naatoya e ley girooji ɗii. O duŋanii ɓe.

³³Ɓe njalti e neɗɗo oo, ɓe naati e ley girooji ɗii. Sewre ndee fuu diiri, iwi hoore waamnde haayre too, naatoyi e ley weendu nduu, yoolii.

³⁴Nde durooɓe ɓee njii ɗum ndee, ɓe ndogi, ɓe njantanoyii ɗum yimɓe ngeenndi ndii e seraaji mum.

³⁵Ɓeen ngari ƴeewde ko waɗi koo. Nde ɓe njottii Iisaa ndee, ɓe tawi laddanooɗo oo ana jooɗii bannge makko, ana ɓoornii kaddule, yeeɗɗitii. Nii kulol nanngi ɓe.

³⁶Yiinooɓe ɗum ɓee njantanii yimɓe no laddanooɗo oo selliniraa.

³⁷Yimɓe leydi Gerasa fuu ndaardi Iisaa yoppana ɗum'en leydi mum'en, sabi kulol manngol nanngi ɗum'en. O naati laana, o witti.

³⁸Mo seyɗaani mum ribbaa oo, ndaardi Iisaa acca o jokka e mum. Kaa Iisaa wirfintini mo, wii:

³⁹—Hootu suudu maa, kumpitaa yimɓe maa ko Laamɗo waɗan maa. O yehi, o ooynii e ngeenndi ndii fuu ko Iisaa waɗani mo koo.

⁴⁰Nde Iisaa wartunoo ndee, jamaa oo jaɓɓii ɗum, sabi yimɓe fuu ana ndoomunoo ɗum.

⁴¹Non gorko biyeteeɗo Jayrus, hooreejo suudu waajordu, wari e makko, diccii yeeso makko, ndaardi mo o wara galle mum,

⁴²sabi ɓiyum debbo bajjo, mo duuɓi mum mbaarata e sappo e ɗiɗi, ana haɓana yonki. E ley yaadu Iisaa ton nduu, yimɓe ɓilli ɗum sanne.

⁴³Debbo gooto, mo tuundi mum taƴataa ko waarata e duuɓi sappo e ɗiɗi, ana tawaa ton. Ko mo joginoo fuu mo sawrorike faa laaɓi, kaa fay gooto heɓaali sellinde mo.

⁴⁴Mo iwri caggal Iisaa, mo memi kommbol saaya mum. Ɗon e ɗon ƴiiƴam ɗam taƴi.

⁴⁵Iisaa wii: —Homo memi kam? Kaa nde wonnoo fay gooto jaabaaki, Piyeer wii: —Moobbo, hakkunde yimɓe ngon-ɗaa, eɓe ɓillu maa.

⁴⁶Iisaa wii: —Won memɗo kam, sabi mi maatii won semmbe iwɗo e am.

⁴⁷Nde debbo oo annditinnoo ɗum suuɗataako ndee, wari ana siɲɲa, diccii yeeso makko, haali hakkunde yimɓe fuu ko saabii so memi mo e no selliri ɗon e ɗon.